Ташиев кыргыз-тажик чек ара чырында ысык-көлдүк жигиттин жасаган эрдигин айтып берди (видео)

Бүгүн, 19-марттагы Жогорку Кеңештин комитеттеринин биргелешкен жыйынында УКМК башчысы Камчыбек Ташиев кыргыз-тажик чек арасындагы куралдуу кагылышууда эрдик менен каза тапкан лейтенаттын окуясын айтып берди.

Жыйында кыргыз-тажик чек арасы боюнча келишимди ратификациялоо маселеси каралып жаткан.

"Ысык-Көлдүк жигит Ворух анклавынын жанындагы Тамдык заставасына башчы болуп барат. Анан бир айдан кийин согуш башталып кетет. Ошондо ал балдардын баарын тоого качырып ийет дагы, өзү жалгыз калат. Ал бардыгын чыгарып ийдим деп ойлогон. Бирок заставадагы мончонун ичине жаңы барган солдат коркуп кирип алат. Тиги командир өзү жалгыз атышып, душмандарды жакындатпай согуша берет. А берки бала болсо баарын көрө берет.

Тажиктер граната ыргытып, тиги баланы жарадар кылып, сүйрөп чыгышып, куралды башына такап, "жеңилдим" деп айтасың дешет. Бала болсо "багынбайм" деп коёт. Ошондо тигилер лейтенантты башка атып өлтүрүшкөн. Мунун баарын мончодо бекинип отурган солдат көрөт. Анан 2 күндөн кийин баягылар кеткенде тиги солдат мончодон чыгып, качып кеткен", - деди ал.

Белгилей кетсек, эки өлкө ортосунда 2021-жылы апрель-май жана 2022-жылы сентябрь айларында кандуу кагылышуулар болгон.