Ош облусунда кыш жана байытылган көмүр өндүрүүчү заводдор ачылды. Иш-чарага Садыр Жапаров катышты

Бүгүн, 20-мартта Ош облусунун Кара-Суу районунун Таш-Арык айылында кыш жана байытылган көмүр өндүрүүчү заводдор ачылды. Бул туурасында президенттин маалымат кызматы билдирди.

Маалымдалгандай, ачылышка мамлекет башчысы Садыр Жапаров өзү катышты.

Президент инвестицияларды, анын ичинде жеке фонддорду жана банктык салымдарды тартуу бизнес-коомчулуктун мамлекеттин экономикалык саясатына болгон ишенимин бекемдээрин жана башка инвесторлорго Кыргызстан жаңы өндүрүштөргө ачык экендигин жана өлкөдө ири бизнес-долбоорлорду ишке ашыруу үчүн жагымдуу шарттар түзүлгөндүгүн көрсөтүп турарын баса белгиледи.

Андан соң ишкананын кызыл тасмасы кесилип, мамлекет башчысына чийки затты даярдоодон баштап, даяр продукцияны таңгактоого чейинки продукцияны өндүрүлүшүнүн толук автоматташтырылган цикли көрсөтүлдү.

"9 миллиондон ашык доллар өлчөмүндөгү каражатка ишке ашырылган бул инвестициялык долбоор Кара-Суу районунун калкы үчүн 250 жумушчу орун түзмөкчү. Жылына 50 миллион даана кирпич жана 600 миң тонна көмүр продукциясын өндүрүү планы бар", - деп айтылат маалыматта.

Аягында Садыр Жапаров жергиликтүү тургундар менен баарлашты, алар аймакка көңүл бурганы, демилгелерди колдогону жана маанилүү социалдык жана инфраструктуралык долбоорлорду ишке ашырганы үчүн ага ыраазычылыгын билдиришти.

Автор: Замира Ниязбекова