"Орозо кечиримдин айы". Мурдагы депутат Атазов президенттен Мамыркулованы бошотууну суранды

Жогорку Кеңештин мурдагы депутаты Шайлообек Атазов социалдык тармактагы баракчасы аркылуу президент Садыр Жапаровдон эркин журналист Канышай Мамыркулованы камактан бошотууну өтүндү.

Ал өлкө башчыдан Орозо айында кечиримдүү болууну суранды.

"Ал учурда Ак үйдөгү саткындардын, эки жүздүү кошоматчылардын курмандыгы болуп калды… Урматтуу Садыр Нургожоевич!
Орозо айы кечиримдин, ырайымдын жана сабырдын айы. Сиз энелерге жалпы эле аялзатына терең сый-урмат менен мамиле кылып келгенсиз. Канышай эжени эне катары кечирип, үй камагына чыгарып берсеңиз, Орозо айында айкөлдүк болот эле. Канышай эже сыяктуу журналисттер бийликтин өзүнө керек. Сын болгон жерде өнүгүү болот. Коомдо баары эле бир жактуу кол куушуруп кул сыяктуу жүгүнүп калганда мамлекеттин, элдин келечеги коркунучта калат. Мамлекет үчүн эң коркунучтуу кылмышкерлер – саткындар, кошоматчылар болууга тийиш!" - деп жазган ал.

Ошондой эле Атазов Мамыркулованы өз кесибинин мыкты адиси деп баса белгилеген.

Эске салсак, Канышай Мамыркулова 20-мартта Бишкек ШИИББ тарабынан кармалган. Ага карата Кылмыш-жаза кодексинин 278-беренеси (Массалык башаламандыктар) менен кылмыш иши козголгон. Бишкектин Биринчи май райондук соту ал 19-майга чейин камакка алынганын маалымдады.

Автор: Кылымбек Бейшеев
Фото: Интернеттен алынды