"Акыркы секундда". Айпери Медет кызы үчүнчү ирет Азия чемпиону болду (видео)

Кыргыз балбаны Айпери Медет кызы Иорданиянын Амман шаарында өтүп жаткан күрөш боюнча Азия чемпиондугунда алтын байге утту.

Ал финалда индиялык балбан кыз менен кез келди. Беттеш бүтөрүнө 8 секунд калганда индиялык балбан астыда келе жаткан. Бирок, Айпери Медет кызы атаандашынын артына өтүүгө жетишип, беттеш бүтөрүнө 2 секунд калганда атаандашын артка айлантып дагы 2 упай алып, эсеп санын 6:6 кылып, жеңишти камсыздады.

Беттеш бүтөрү менен индиялык машыктыруучу жерди чаап, "челленж" баскычын басты. Калыстар видео кайталоону көргөндөн кийин Айпери Медет кызына дагы бир упай берип, эсеп саны 7:6 болду.

Муну менен Айпери Медет кызы үчүнчү ирет Азия чемпиону болду.

Буга чейин ал 2022-жылы Улан-Батордо жана 2024-жылы Бишкекте өткөн Азия чемпиондугунда алтын байге уткан.