Дүйнөлүк рекорд. ПРЕЗИДЕНТ БОЛГУСУ КЕЛГЕНДЕРДИН САНЫ – 81

Кыргызстан президенттикке койгон талапкерлердин саны боюнча «Гиннесс китебине» кирсе болчудай. Анын ар бир төртүнчүсү убактылуу жумушу жоктор.

25-августта талапкерлерди расмий каттоо иши аяктайт. Каттоодон өтүүгө 100 миң сом өлчөмүндө күрөө, 30 миң адамдын колун топтоо жана мамлекеттик тил боюнча экзаменден өтүүкерек. Президенттик шайлоо 30-октябрда өтөт.

ЖАРЫЯ: ПРЕЗИДЕНТ ТАЛАП КЫЛЫНАТ!
16-август күнү президенттикке койгон талапкерлердин арызын кабыл алуу мөөнөтү аяктап, алардын саны башында 83тү чапчыды. Бирок эртеси ажо болмокчу эки журналист эсине келдиби, айтор, талапкерлигин алып салышты. Ошентип, 81 талапкер боюнча эксперттер түрдүү пикирлерин айтышууда. Бул көрүнүш бир чети Кыргызстанда эркиндик бар экенин айгинелесе, экинчиден, «кандай адамдын президент боло ала тургандыгы жөнүндө түшүнүктүн жоктугун билдирет» дешет. «Талапкерлердин баары эле президент болом дегендер эмес. Кээлери имиджин жогорулатуу үчүн, дагы бирөөсү кийин небере-чөбөрөгө мактана жүрүү үчүн катышып жатышат» деген ойлор басымдуу.

ЖУМУШСУЗДАР ӨЛКӨНҮ БАШКАРЫШАБЫ?
БШКга арыз берген 83 талапкердин 19ун жумушсуздар түзөт. Буга чейин айымдардан президенттикке талапкер катары Токтайым Үмөталиеваны эле көрүп келсек, бул ирет Роза Отунбаева шык бергенби, 6 аял арыз тапшырды. Алардын 53ү Бишкектен, 29у аймактардан, ал эми бир талапкер – Кубанычбек Апастын Москвада тургандыгы маалым болду. Ошондой эле 15и мамлекеттик кызматкер, 42си коммерциялык уюмдарда эмгектенишет. Улуту боюнча 80 талапкер кыргыз болсо, 2 орус жана 1 казак бар.

“АТА ЖУРТТУН” АЖЫРЫМЫ КӨРҮНДҮ
Жогорку Кеңештеги фракциялардын ичинен «Ата Журт» алдыга озуп, Камчыбек Ташиев, Курманбек Осмонов, Марат Султанов жана Нариман Түлеев өңдүү өкүлдөрү ат салышмакчы. Айрым «көрөгөчтөр» «Ата Мекен» фракциясынан акыркы күнгө чейин «Равшан Жээнбеков да ат салышат» деп келишкени менен, ал ушактар суу кечпеди. «Ата Мекендин» лидери Өмүрбек Текебаев менен катар ушул эле партиянын өкүлү Кубатбек Байболов да өз алдынча арызын тапшырды. «Ар-намыс» фракциясынын башчысы Феликс Кулов талапкерлердин катарында көрүнбөйт. Бул фракциядан Анарбек Калматов, Турсунбай Бакир уулу жана Акылбек Жапаров «чоң казатка» аттанышты. КСДП ынтымактуу түрдө Алмазбек Атамбаевди көрсөтсө, коалициянын бир мүчөсү – «Республика» премьерди колдоо менен «бул шайлоодо паспыз» деп четте калууну туура көрдү.

КИМ ЭНЕ ТИЛИН ЖАКШЫ БИЛЕТ?
Ажолукка аттангандардын кыргыз тили боюнча билимин текшерүү 3 баскычтан турат. Анда 5 ката кетирген адамга «2» деген баа коюлат. Талапкер 30 мүнөттүн ичинде 3 барактан ашпаган бетке өздүк программасын жазып чыгышы керек. Андан тышкары талапкер адабий тилде программасын так жана түшүнүктүү айтып берүүсү зарыл. Жыйынтыгында чыгармадан алынган үзүндүнү көркөм окушат.