Бир бүркүм... ЧЫНЫБАЙ ТУРСУНБЕКОВ КОАЛИЦИЯ ЛИДЕРИ БОЛОБУ?..

Кытайдын “Шенсия көмүр-химиялык өнөр жай” компаниясы Кара-Балта шаарындагы нефтини кайра иштетүүчү заводунун курулушуна 600 миллион доллар инвестиция сарптайт.
“Ата Журт” фракциясынын лидери Камчыбек Ташиев президенттик шайлоого бараткандыгы үчүн Садыр Жапаров анын ордун убактылуу ээледи.
Өкмөт кызматтык унаалардын санын кыскартат.
Экономикалык тескөө министри Учкунбек Ташбаев: “2014-жылга карай бардык мамлекеттик органдардын жетекчилери кыргыз, орус жана англис тилдерин билүүгө милдеттендирилет”.
Өкмөт 2012-жылдан тарта дүйнөнүн 57 өлкөсү үчүн визасы жок режимди киргизмекчи.
2011-2012-окуу жылдарында 2222 билим берүү мекемелери ишке киришип, анда 1,2 миллион билим алуучулар окуйт.
Эмдиги жылдан тарта мектеп окуучулары ар бир китеп үчүн 25 сом ижара акысын төлөп калышы ыктымал.
КСДП фракциясынын депутаттары коалициянын лидери Канатбек Исаевди Чыныбай Турсунбековго алмаштыруу керектигин сунуштап чыгышты.
Ош шаарында “Ак кызмат” жаштар уюму Кыргызстандын Эгемендүүлүгүнүн 20 жылдыгына арналган социалдык көрнөк- жарнактарды өрттөп салышты. Алардын ою боюнча, боз үйдүн үстүнө жабылган Кытай, Орусия жана АКШнын желектеринен турган сүрөттөр кыргыз идеологиясына каршы келет.
Борбордук мечит президенттик шайлоодон кийин өз курулушун баштайт.
Өкмөт “Газпром” компаниясына мурунку “АзияУниверсалбанк”, азыркы “Залкар” банкын сатып алууну сунуштады.
“Кувейт” фонду Бишкек-Нарын-Торугарт жолунун реконструкциясына 12 миллион доллар насыя бөлдү.
Хажимурат Коркмазов жана Акылбек Эшимов “Ата Журт” менен “Республика” фракцияларынын чыгып кеткен депутаттарынын ордуна келип, ант беришти.
Быйыл дыйкандарга баш-аягы 565 миллион сом көлөмүндөгү 4,7 миң насыя берилди.
Депутат Светлана Левина мектептердеги окуу жылын 20 күн кечирээк баштоону сунуштады. Анын айтымында, туристтик сезон, эгин жыйноо жана кышка камылга көрүү окуучулардын сабагына тоскоолдук жаратат.
Кыргыз-кытай чек арасы 12-сентябрь күнү Кытайда Ай майрамы белгилене турганына байланыштуу убактылуу жабылат.
“Мегаком” компаниясына ай сайын орточо эсеп менен 30 миллион сом киреше түшөт”,- деп эл өкүлү Дастан Жумабеков айтты.
Бишкек шаарында Дүйнө эл эпосторунун II фестивалы башталды.
Жогорку Кеңеш Кыргызстан президентинин үй-бүлө мүчөлөрүнө «мамлекеттик коргоого алуунун кереги жок» деген чечим чыгарды.
Айыл чарба министри Төрөгул Беков АКШнын департаментинен 100 миң тонна буудай, 10 миң тонна шекер жана 2 миң тонна өсүмдүк майынан турган гумжардам көрсөтүүсүн сурады.

Элвира Караева
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (0)

Комментарий калтыруу үчүн өз ысымыңыз менен кириңиз же каттоодон өтүңүз.

№ 462, 9-15-сентябрь, 2011-жыл