Бул саныбызда апта каарманы болгон Гүлзинат Суранчиева күн деминде дайым тажабай колдонгон, татымынан танбаган нерселери тууралуу баяндады.
ҮЧ ЧЕКИТТҮҮ ҮЧ УШАК
– "Гүлзинат капчыктуу чоңдордун эле тойлоруна барат. Карапайым, капчыгы жукалардын өтүнүчүнө кол шилтеп барбай койгон текеберлиги бар" деген сөздөр айтылып келет...
– Чынын айтканда, той-топурларга көп барбайм. Бирок чакырган кишинин капчыгы жука деп шагын сындырган учурлар эсимде жок. Балким, өзүмдүн жумуштарымдан бошобой калып "бара албайм" деп айтканымды башкача түшүнүп алып таарынып калышкандыр... Негизи, тойлордогу “ставкам” 300 доллар. Кээде 100 долларга деле ырдайм.
– Сизге карата “вокалы күчтүү, бирок хит ырлары жок, жакшы продюсер керек” деген сындар айтылат...
– Албетте, чыгармачылыкка жаңы аттанганда хитке айланган ырларым болбосо керек. Бирок “Шантелл” тобунда жүргөндө “Өмүр”, Кош жылдыз” деген ырларым аябай эле хит болгон. Ал эми учурда “Сезим”, “Ты и я” аттуу ырларымды хит ырлардын сабына киргизем. Мага продюсердин кереги жок.
– "Гүлзинат күйөөсүнүн мээсине чай кайнатат" деген кептер бар экенин айтып калышат, сахналаштарыңыз...
– Каяктан билип алышты, ыя? Ха-ха-ха... Менин оюмча, сырттан бизди көргөн адамдарга жолдошумдун мага кылган мамилесинен улам башына чай кайнаткан айымдардай көрүнсөм керек. Чынында, ал менин айткан сөзүмдү кылып, толук колдоп турат. Ал мени, мен аны сүйөм. Анан дагы бир жолу кайталай кетейин, жолдошунун мээсине чай кайнаткандардан эмесмин.
Бахияна Сатылганова
star@super.kg