МЕН СҮЙГӨН КАРАГАТ

Өлкөсү – Кыргызстан
Чыккан жылы – 2011
Жанры – Мелодрама, комедия, боевик
Продюсери – Бек Борбиев
Режиссёру – Руслан Машрапов
Оператору – Азиз Осмоналиев
Сценарийин жазган – Бек Борбиев
Композитору – Өктөм Сапар уулу
Ролдордо – Бек Борбиев, Назира Бердигулова, Санжар Бердибеков, Жакут Сыдыков, Мая Давлеткулова, Жыргал Тєрєгелдиев жана башкалар
Тасманын узактыгы – 1 саат 29 мүнөт

СҮЙҮҮНҮН АРУУЛУГУ ЖОЛУГУУДА ЭМЕС, САГЫНУУДА
Орусиядан өз мекенине кайтып келаткан Шумкар (Бек Борбиев) жолдон кырсыкка кабылат. Каракчылар аны тоногондон кийин атып, сууга ыргытып жиберишет. Айыл четинде жашаган Мурат ага аны кокусунан көрүп калып, суудан алып чыгып үйүнө алып келет.
Боорукер, камкор Мурат аганын үйүндө энесиз өскөн жалгыз бой кызы – Жамал бар эле. Шумкар Мурат аганын үйүндө жашап жүрүп, анын эрке кызынын карагаттай көздөрүнө, эрининдеги калына, жүзүндөгү жылдызына арбалгандан арбала берет. Жамал да Шумкарды сүйүп калган эле. Бирок экөө тең сезимдерин айтуудан тартынышчу. Ошентип, Шумкар "карагатынын" чайын ичип, жараатынан айыгат.
Күндөрдүн биринде Шумкар Жамал шаарга баратканда жакын досу Керээзге жазган катын берип коюусун өтүнөт. Катты окуган Керээз Жамал менен айылга заматта жетип келет. Мурат аганын үй-бүлөсүнө рахматын айтып, Жамал менен коштошуп, Шумкар досу менен өз жолуна түшөт. Арадан күндөр өтөт. Бирок Шумкардын оюнун баарын Жамал ээлеп, аны унута албай же сүйүүсүн айта албай бушайман болот. Бул маалда Жамал да так ушундай абалда эле. Күтүлбөс жерден Керээзди бизнесине байланыштуу кримдүйнөнүн өкүлдөрү атып кетишет. Досу үчүн өч алмакчы болгон Шумкар да чек арадан дарыя кечип өтүп бараткан жеринен окко учат.

ИДЕЯСЫ БЕК БОРБИЕВГЕ ТААНДЫК
Тасманы тартуу иштери 10-майда Токтогулдан башталып, август айында аяктаган. Жалпысынан тасмага майда-чүйдө эпизоддорду кошпогондо 28 актёр катышкан. Фильмде жашоодогу криминалдык көрүнүш, капысынан адамдын тагдырынын өзгөрүшү, адамдардын сүйүүгө болгон мамилеси, ач көздүк, байлык, достук, күтүлбөгөн оор кырдаалдарга адам кантип туруштук бере алганы көрсөтүлгөн. Кримдүйнө менен мамлекеттик органдарда иштеген кызматкерлердин тил табышып алып, рейдерлик менен бирөөнүн мүлкүнө кол салуу көйгөйү да кеңири чагылдырылат.
Режиссёр Бек Борбиев менен 1993-жылдан бери жакын тааныш болуп, ага агасындай мамиле кылат. “Мен сүйгөн карагат” тасмасын тартуу тууралуу ойду Бек Борбиев өзү сунуштаган. Экөө кеңешип, сценарийин талдап, актёрдук курамды бир пикир менен бекитишкен.
Тасма тууралуу режиссёр – Руслан Машрапов мындай дейт:
– Мен чыгармачыл инсан катары жараткан эмгегимди тамакка салыштырам. Мисалы, ашпозчу ар кайсы кошулмалар менен тамакты даамдуу кылып жасайт эмеспи. Ошонун сыңары, мен да эмгегиме кичине күлкү, ый, ыр, криминалдан чымчып кошконго аракет кылдым. Негизинен, тасманын өзөгүндө сүйүү жатат, бирок башка жанрлар да бар.

“БАШ КААРМАН РОЛДОН БАШ ТАРТЫП...”
– Санжар Бердибековго туура образ таптык деп ойлойм. Ал тасмада өзүн эле ойноду. Элден да “Санжар фильмдин көркүн ачыптыр” деген сөздөрдү угуп калдым. Ал эми Жамалдын ролундагы Назира Бердигулова деген актрисаны тартууну мен сунуштагам. Бирок Назира башкы ролго эмес, Жамалдын курбусунун ролуна бекитилген болчу. Тилекке каршы, Жамалдын ролуна тартыла турган модель кыз эртең тартуу иштери башталат деген түнү чалып, белгисиз себептерден улам баш тартып койду. Күтүүсүздөн Назирага башкы ролду берүүгө туура келди,- дейт режиссёр.

Бек Борбиев, ырчы, продюсер:
– Мен фильмде ролумду жеткиликтүү аткара алдымбы же жокпу, аны эл таразалап, эл чечсин. Бул – мен тартылган экинчи фильм. Алгач 1993-жылы жаңы ырдап чыгып жүргөндө Нурбек Эген менен Руслан Машраповдун “Ак жоолукчан” деген тасмасына катышкам.
"Мен сүйгөн карагат" фильминин сценарийин өзүм жаздым. Уюштуруу иштеринин баарына активдүү катыштым. Кыйынчылыктар көп болду. Бирок баарыбыз жапа тырмак жардамдашып, жети айда тартып бүттүк. Ал эми тасмадагы бардык кооптуу жерлерди каскадёрдун жардамысыз эле өзүм аткарып жаттым. Айрыкча дарыяда агып бараткан эпизод эстен чыкпайт. Ошондо суунун муздагы мээме чыккан. Тартуу учурунда кызыктуу да, күлкүлүү да окуялар көп эле болду.

КЫЗЫКТУУ МААЛЫМАТТАР

• Тасма Бишкек, Токтогул, Ысык-Көл аймактарында тартылган.
• Шумкар менен Жамалдын дөңсөөдө жаратылышка суктанып отурган Ак-Булак көлүнө жетүү үчүн Токтогулдан ары 2 саат машина менен, андан улай, 2 саат ат менен барышкан.
• Тасманын саундтрегин ырчы – Мая ырдайт.
• Фильмдин башында Жамал үйгө кирип келип, канга боёлгон кишини көрүп көзүн алайтып туруп калмак. Ал эпизод 50-60 дубль менен тартылып, бирок фильмге кирбей калган.
• Тасманын эпизоддук ролунда бильярдчы – Каныбек Сагынбаев да бар.

Лунара Бекиева
kino@super.kg

 Кыстарылган видео