БИШКЕК, МЕН СЕНИ СҮЙӨМ!

Өлкөсү – Кыргызст
Жанры – Комедия, драма
Тасманын жаратуучулары – Руслан Акун, Александр Цай, Сауле Алымбекова, Степан Головаш, Эльдар Супатаев жана Чыңгыз Төрөбеков
Ролдордо – Марина Ким, Ляля Ли, Ален Офойо, Чыңгыз Төрөбеков, Александр Цай, Замирбек Сооронбаев, Ольга Жигулёва, Нурбек Савитахунов жана башкалар
Чыккан жылы – 2011
Тасманын узактыгы – 1саат 55 мүнөт

БАШ КАЛААНЫ БААЛАЙБЫЗ
Фильмде Бишкек шаарынын учурдагы кадимки көрүнүшү сүрөттөлөт. Тасма ичине 10 окуяны камтып, анда Бишкек шаарында жашаган түрдүү адамдардын тагдыры чагылдырылган. Сюжети жөнөкөй. Шаардык жаштар, түнкү клубдарда капчыктуу жигиттерди издеген сулуу кыздар, кымбат машиналуу мырзалар, тууган-тааныштарынын аброюна таянып иштеген жаштар, адамдардын үй-бүлөгө жана сүйүүгө болгон мамилеси, саясат, достук, эркектер менен айымдардын ой жүгүртүүдөгү айырмачылыгы... Анан, албетте, ушул окуяларга күбө болгон тасманын «башкы каарманы» – Бишкек шаары же Малышка Би. Окуялардын узактыгы 6 мүнөттөн 12 мүнөткө чейин. Кино жаратуучулардын негизги максаты – жаштардын аң-сезимин ойготуп, патриоттук духун күчөтүү, жашаган шаарынын баркын билүү, баалоо.

АЛТЫ АДАМДЫН ЭМГЕГИНЕН ЖАРАЛГАН
Фильмдин жаратуучулары катары Руслан Акун, Александр Цай, Сауле Алымбекова, Степан Головаш, Эльдар Супатаев жана Чыңгыз Төрөбековдорду атасак болот. Аталган ысымдар тасманын башынан аягына чейин активдүү катышып, бирөөсү режиссёр болсо, экинчиси продюсер, үчүнчүсү координатор болуп, тасманын жаралышына зор салымын кошушкан. Андыктан режиссёр, продюсер, оператор деп бөлүп отурбай эле, жалпы тартуу тобуна катышкан чыгармачыл адамдардын атын атоону туура көрүшкөн. Аталган адамдардын баары башталгыч режиссёрлор.

ИДЕЯСЫ
«Бир баш жакшы, эки баш андан жакшы» демекчи, алты адамдан алты башка ой жаралып, жогорудагы тасманы тартуу идеясы пайда болгон. Буга чейин кыргыз киносуна жаңылык киргизген жакшы кинону тартуу тилеги ар бир эле башталгыч режиссёрдо жашап келсе, эми алар чогулуп кыска метраждуу фильмдерди бириктирип, бир тасманы жарыкка алып келип отурушат.
Фильмдин «Париж, мен сени сүйөм!», «Москва, мен сени сүйөм!», «Нью-Йорк, мен сени сүйөм!» деген кинолордон айырмасы, сарпталган каражатта болушу мүмкүн. Чет өлкөлүктөр киносуна миллиондогон акча жумшап, ар бир окуяны өзүнчө режиссёр тартса, бизде бирин-экин демөөрчүлөрдүн жардамы менен жогоруда аты аталган алтоо ишке ашырышкан.

АКТЁРДУК КУРАМДА 100ДӨЙ АДАМ...
Жалпысынан тасмага 100дөн ашуун адам тартылса, алардын 50сү эле башкы ролдогу каармандар. Сценарийин жазып жатканда эле ролго ылайыктуу тааныш-билиштерин караштырып коюшкан. Мындан сырткары интернеттеги социалдык тармактагы достор аркылуу да издешкен. Кээ бир эпизоддоруна атайын гонорар төлөп Орус драма театрынын актёрлорун алышса, көпчүлүк актёрлор акысыз тартылып беришкен. Ал эми фильмдеги сулуу кыздардын көпчүлүгү моделдер.

КОЛДООЧУЛАР ЖӨНҮНДӨ
Фильм 2011-жылдын май айында тартылып баштап, ушул эле жылдын сентябрь айында бүткөн. Тасманын ортосуна келгенде каражат түгөнүп калып, режиссёрлор демөөрчүлөрдүн колдоосуна муктаж болушканын жашырышпады.
Тасманын режиссёрлорунун бири Руслан Акун: «Президенттик шайлоонун алдында эки-үч саясатчы «тасманы шайлоонун алдында көрсөтөлү» деп кайрылып, чоң суммадагы акча сунушташты. Бирок баарыбыз жакшы көргөн шаарыбызга багышталып тартылган тасманын атын булгагыбыз келген жок. Жардам бергендер көп эле болду. Бири машинасын берип турса, экинчиси үйүн берип жатышты»,- дейт.

САУНДТРЕГИ УЧУРДА ПОПУЛЯРДУУ
Тасманын ичинде он чакты саундтрек бар. Алардын арасынан жаштар арасында популярдуу болуп жаткан “Oakland city” тобунун аткаруусундагы “Малышка Би” аттуу чыгарманы азыр ар бир уюлдук телефондон угууга болот. Ырдын кайырмасына атайын Нурбек Савитахуновду чакырышкан. Нурбек өзү музыкант. Жакында эле Англиядан келип тасмага тартылып калган. Ал эми тасмага жакшы маанай тартуулоочу музыканы жаш композитор Садан Баялиев аттуу жигит жазган.

Лунара Бекиева
kino@super.kg

 Кыстарылган видео