КЫЗГАНЫЧТАН КЫЛМЫШКА БИР КАДАМ ЖЕ ЗАМАНБАП ОТЕЛЛОНУН ЖОРУГУ

“Кызганычтын чеги менен болгону – сүйүү, чегинен ашып кеткени – оору” дешет. Өткөн жылдын акыркы күндөрүндө Бишкек шаарында муунтулуп өлтүрүлгөн келиндин сөөгү табылган. Кылмышка анын мурунку күйөөсү шектелип, кызганычтан улам муунтуп өлтүргөн деген шек менен тергөөдө сурак берип жатат.

ШАРФЫ МЕНЕН МУУНТУП...
Тергөө учурунда маалым болгондой, окуя төмөнкүчө болгон:
Руслан менен Нурзат (каза болгон келиндин аты-жөнү өзгөртүлдү) мындан 4-5 жыл мурун сүйүшүп-күйүшүп жүрүп ата-энелерине айтпай эле
үйлөнүп алышат. Алгач жакшы эле жашап, кийинчерээк экөөнүн оту күйүшпөй калат. Ал ортодо кыздуу да болушат. Элдин айтымында, экөө
ажырашып, кайра жарашып жүрүшкөн. Бирок учурда экөө эки башка жашашчу экен.
Кылмыш болгон күнү Руслан Нурзатка телефон чалып, “кызыма белек алып койдум, айылга ала барып бер” деп сүйлөшкөн экен. Ошентип, Нурзат жумуштан чыккандан кийин экөө Нурзаттын батирине жакын жерден жолугушат. Үйгө бара жатып дүкөнгө чогуу киришет да, тооктун сан этин, өзүнө бир бөтөлкө арак, Нурзатка деп сыра алышат. Үйгө кирип тамак жасап ичишип, Руслан аракты ичип түгөтөт. Кантсе да мурун экөө чогуу жашашкан да, тамактанган соң төшөк салып жатып калышат. Түн бир оокумда үй ичи түтөгөнүнөн улам экөө тең ойгонушат, көрсө, тамекинин чогу түшүп, төшөк күйүп түтөгөн экен. Суу чачып өчүрүшүп, кайра жаткандан кийин Нурзатка бейтааныш бир эркек телефон чалып калат. Нурзат “мен азыр сүйлөшө албайм” деп телефонун коюп салат. Эркектин сүйлөгөнүн угуп калган Руслан “сен эмне үчүн башка эркектер менен сүйлөшөсүң?” деп чыр салат. Экөө айтыша кетишет. Ошол убакта Нурзат Русландын колуна башын коюп жаткан экен. Руслан жаткан жеринде эле Нурзатты муунтуп, мойнун сындырганга аракет жасайт. Мойну сынбаганы менен, Нурзат эсин жоготот. Руслан ордунан туруп, эки жакты карап көзүнө шарф урунат, аны алып кырылдап кыйналып жаткан Нурзаттын мойнуна салып муунтуп баштайт. Дем албай калганда гана коё берет. Кийинип, Нурзаттын телефонун алат да, үйдү сыртынан кулпу менен жаап чыгып кетет. Сокулук айылындагы байкесинин үйүнө барып, эч нерсе болбогондой жатып алат. Эртеси Нурзаттын телефонун мешке салып өрттөп жиберет.

“СӨӨК КӨГӨРҮП, ЖЫТТАНА БАШТАПТЫР”

Кылмыштын бетин ачкандардын бири Бишкек шаардык Свердлов РИИБинин Кылмыш иликтөө бөлүмүнүн кызматкери Эркин Орозбеков окуяны төмөнкүчө баяндап берди:
– Белгисиз аялдын сөөгү табылгандыгы тууралуу маалымат түшөр замат окуя болгон жерге кесиптешим экөөбүз жетип бардык. Батирге берилүүчү төрт бөлмөлүү үй экен. Анын биринде 25-30 жаштардагы азиат түспөлүндөгү келиндин сөөгү жаткан экен. Мойнуна өзүнүн эле шарфы салынып муунтулуптур, тили сыртка кичине чыгып калыптыр. Сөөк эки-үч күн жатып, көгөрүп, жыттана баштаптыр. Анан ошол жерде жашаган коңшуларынан сураштырып, кылмышка илинчек болуучу жоопторду ала албадык. Эшиги сыртынан кулпу менен жабылгандыктан, үйдө бирөө бар экендигин эч ким билбептир. Алардын айтымында, келин тигүү цехинде иштеп, үйгө дайыма убагында келип-кетип, курбулары гана келгени болбосо, башка эч ким деле келчү эмес экен. Жаткан төшөгүнүн кичине жери күйүп, суу сээп өчүрүлүптүр.
Каза болгон келиндин өздүгү аныкталып, ал 1983-жылы Талас облусунда туулган М.Н. болуп чыкты. Туугандарынан, тигүү цехинде чогуу иштеген курбу кыздарынан сураштырып, алгачкы шек мурунку күйөөсү Русланбек Арзымбеков деген жигитке түштү. Себеби ал каза болгон күнү Нурзатка телефон чалып “кызыма Жаңы жылга карата белек алып койдум, сага берип кетейин” деп сүйлөшкөнүн курбусу уккан экен.
Аны үч күндөн кийин кармадык, алгач “мен ал күнү башка жакта болгонмун. Жолукпаганыма, телефон аркылуу сүйлөшпөгөнүмө да көп болду” деп жаткан. Анан ага ошол күнү ким менен, качан, кайсы жерде туруп телефон аркылуу сүйлөшкөндөрүн көрсөттүк, телефонундагы чалуулар боюнча. Ал күнү ага “сен аялыңды өлтүрдүң беле?” деген суроо да берген жокпуз, “эртең да келип көрсөтмө бер” деп коё бердик. Эртеси күнү өзү келип, “болгонун айтып берейин, баары бир кан коё бербейт” деп кылмышын мойнуна алды.

“ДАЙЫМА САБАЧУ ЭКЕН”

Каза болгон Нурзаттын агасы Акылбек:
– Нурзат үй-бүлөбүздөгү алты эркектин арасында жалгыз кыз. Мектепти бүткөндөн кийин Бишкек шаарындагы 18-лицейде окуган. Аны аяктаган соң тигүү цехинде иштеп жүрдү. Негедир турмушка чыкканын жашырып, бизге көпкө айтпай жүрүп, анан күйөөсүн тааныштырды. Башында жакшы эле жашап жүрүшкөн, анан уруша башташыптыр. Бир жолу “Руслан жумушума келип ызы-чуу кылып жатат” деп мага телефон чалып калды. Иштеген жерине кирип, Русландын карындашыма кол көтөргөнүн көрүп калдым. Сабап жатканын көрүп, чыдабай уруп жибергем. Ошол окуядан кийин гана карындашым күйөөсүнүн зөөкүрлүк кылып жүргөнүн айтып берди. Көрсө, дайыма сабачу экен. Ошондон кийин экөө жашабай калышкан. Бирок Руслан “жашайм” деп кайра келип жүрчү экен.
Акыркы жолу 24-декабрда телефон аркылуу сүйлөшкөм, “айдын аягында айылга барып келем” деген. Үч жаштагы кызы апамдын колунда эле. Ошол күндүн эртеси телефону өчтү, эки күн байланыша албай койдук. Анан "эмне болду экен?" деп жеңем үйүнө барып, каза болгонун билип жатабыз. Мага да агамдын телефону менен бир жигиттер чалып, “карындашыңдын батирине келип кал” дешти. Барып дендароо болуп туруп калдым, карындашымды муунтуп өлтүрүп койгон экен.

Свердлов риибинин кылмыш иликтөө бөлүмүнүн башчысынын орун басары Замир Бектенов:
– Бул факт боюнча Кылмыш жана жаза кодексинин 97-беренеси (киши өлтүрүү) боюнча кылмыш иши козголгон. Соттук-медициналык экспертизанын жыйынтыгында муунтулуп өлтүрүлгөнү билинди. Оперативдүү иликтөөлөрдүн натыйжасында бул кылмышка шектүү делинип Н.Мнын күйөөсү, 1988-жылы Тогуз-Торо районунда туулган Русланбек Арзымбеков аттуу жаран кармалып, кылмышын мойнуна алган. Учурда Руслан Арзымбеков СИЗОдо, тергөө иштери уланып жатат.

Нурбек Абдыкадыров
koom@super.kg

 Кыстарылган видео