Мүзүр Мамбетов: «ГҮЛМИРА ӨЗҮНҮН АГАЙЫН СҮЙЧҮ»

“Сирень гүлү”, “Ак жамгыр”, “Кызыл гүл” ырларын чогуу ырдаган жубайлардан түзүлгөн “Кеңеш” тобу бул аптадагы каармандарыбыз. Экөө учурда экинчи наристесин кубанып күтүп турган чагы. Экөөнө тест катарында окшош суроолорду өз-өзүнчө берип, бири-бирин канчалык деңгээлде билишерин баамдап көрдүк.

МҮЗҮРДӨН ГҮЛМИРА ТУУРАЛУУ:

– Гүлмира эркеби?
Мүзүр: – Ооба.
Гүлмира: – Ооба.

– Жакпаган сапаты?
М.: – Боёнуп отура бергени.
Г.: – Көк беттик.

– Сиздеги Гүлмирага жакпаган сапат?
М.: – Айтып туруп, аткарбай койгонум.
Г.: – Көк беттиги.

– Келинчегиңиз кайсы ырчы жигитти жактырат?
М.: – Нурлан Насип.
Г.: – Нурлан Насип.

– Экөөңөр чогуу жасаганды жактырган иш?
М.: – План түзүү.
Г.: – Кино көрүү.

– Гүлмиранын ушул убакытка чейин жашырып айта албай жүргөн сыры барбы?
М.: – Билбейм, болушу мүмкүн.
Г.: – Бар.

– Алгачкы сүйүү канча жашында келген?
М.: – Мектепте окуп жүргөндө өзүнүн агайын сүйчү экен. Канчанчы класс экенин билбейм.
Г.: – 9-классымдан баштап Шакрукх Кханды жакшы көрөм. Мүзүрдү да ошого окшоштуруп сүйүп калгам

– Эмне жөнүндө кыялданат?
М.: – Сулуулук салонун ачсам дейт.
Г.: – Көп балалуу болсом дейм.

– Үйдө ким көп “косяк” ке­тирет?
М.: – Мен.
Г.: – Мен.

– Канчанчы өлчөмдөгү бут кийим киет?
М.: – Билбейм.
Г.: – 37.

– Азыр тырмагы кандай түстөгү лак менен боёлгон?
М.: – Байкабадым.
Г.: – Боёк жок.

– Кечинде эмнелерди ойлоп жатат?
М.: – Билбейм.
Г.: – Салып жаткан үйүбүз эртерээк бүтсө экен деп.

– Балаңыздын туулган күнү качан?
М.: – 25-июль, 2006-жыл.
Г.: – 25-июль, 2006-жыл.

– Берилип жасаган тамагы?
М.: – Манты.
Г.: – Палоо.

– Сизге калп айтабы?
М.: – Балким.
Г.: – Айтам. Анткени кээде айымдарга гана тиешелүү сырлар болуп калат.

– Кайсы гүлдү жакшы көрөт?
М.: – Көпкө чейин соолубаган бир гүл бар го, ошону.
Г.: – Роза гүлү жагат.

– Гүлмиранын эмнесине көп комплимент айтасыз?
М.: – Тамактарына.
Г.: – Тамактарыма. Же ошентип алдап жейби, билбейм.

– Жашоодогу эң жакын досу ким?
М.: – Эжеси.
Г.: – Зияда деген курбум.

– Азыр жанында канча акча бар?
М.: – Жакшы эле бар болчу.
Г.: – 2-3 миң сомдой бар.

– Үйгө кеч келип калганда кандай тосуп алат?
М.: – Жакшы эле.
Г.: – Кеч деле келбейт.

– Азыр Гүлмира эмне жөнүндө ойлонуп жатат?
М.: – Мен жөнүндө.
Г.: – Эч нерсе ойлогон жокмун.

– Эсте каларлык белеги?
М.: – Сүйлөшүп жүргөндө 23-Февралга костюм-шым белек кылган.
Г.: – Бир жолу жашыл көйнөк бергем. Ошол эсинде калса керек.

– Тест бүткөндө сизге берер биринчи суроосу кандай болот?
М.: – "Үй жыйнаш керек" дейт болуш керек шыр эле.
Г.: – Кайсы жакка барабыз?

ГҮЛМИРАДАН МҮЗҮР ТУУРАЛУУ:

– Интернеттен кыздар менен таанышабы?
Г.: – Жумуштар менен гана болбосо, таанышпайт.
М.: – Жок, интернетке киргенди билбейм.

– Кайсы өлчөмдөгү бут кийим киет?
Г.: – 39-40.
М.: – 40.

– Досторуна көп көңүл бурабы же сизгеби?
Г.: – Мага.
М.: – Экөөнө бирдей.

– Карыганда сакал коёбу?
Г.: – Койсо керек.
М.: – Ооба. Бул сүннөт.

– Сүйүүсүн сизге кандай билдирген?
Г.: – “Сени сүйөм” деп.
М.: – Туулган күнүндө күмүш шакек берүү менен.

– Кандай “привычкасы” бар?
Г.: – “Энеңди урайын” деген сөздү көп айтат.
М.: – Бирөөнүн кулагын кармаганды жакшы көрөм.

– Таарынганда кандай адам?
Г.: – Көк бет.
М.: – Ачуулуу.

– Оюңузча, сизге айтпай туруп кылган иштери барбы?
Г.: – Бар деп ойлойм.
М.: – Ага айтпай ыр жазам.

– Баласын көбүрөөк жакшы көрөбү же сиздиби?
Г.: – Баласын го.
М.: – Бала таттуураак го.

– Койду жиликтеп, устукан тартканды билеби?
Г.: – Билбейт.
М.: – Билем.

– Романтикпи?
Г.: – Ооба.
М.: – Анча эмес.

– Кайсы жери көп ооруйт?
Г.: – Башы.
М.: – Желкем.

– Айына канча акча табат?
Г.: – Санап көрө элекмин.
М.: – Жакшы эле табам, сыр бойдон калсын.

– Балдарыңыздардын кимге окшош болушун каалайт?
Г.: – Өзүнө.
М.: – Кыздардын апасына, балдардын мага окшош болгону жакшы.

– Кайсы күнү үйлөнгөнсүздөр?
Г.: – 16-июль, 2002-жыл.
М.: – 16-июлда, Гүлмиранын туулган күнүндө. Жылын унутуп калыпмын.

– Сүйүүгө канча жашында туш болгон?
Г.: – Айткан эмес.
М.: – 8-класста классташ кызымды сүйүп калгам.

– Жактырган тамагы?
Г.: – Куурулган картошка.
М.: – Беш бармак.

– Жолдошуңузга арык кыздар жагабы же толуктарбы?
Г.: – Айткан эмес.
М.: – Арык.

– Кайсы сапатыңызды жактырат?
Г.: – Токтоолук, кечиримдүүлүк.
М.: – Кечиримдүүлүк.

– Көп колдонгон сөзү?
Г.: – “Энеңди урайын”.
М.: – “Иншаллах”.

– Калп айтып койчу жайы барбы?
Г.: – Кээде айтат. Алдап жатканын көздөрүнөн билип коём.
М.: – Кээде айтууга туура келет.

– 14-февралда эмне белек кылды?
Г.: – Эч нерсе.
М.: – СМС жаздым.

– Кайсы жагында калы же тырыгы бар?
Г.: – Сол кашынын үстүндө жана далысында калы бар. Тырыгы жок.
М.: – Чекемде калым, оозумдун оң жагында тырыгым бар.

Бирге түтүн булатып, чогуу жашап жаткандарына 10 жыл болгонуна карабастан, азырынча бул түгөйлөр бирин-бири толук таанып-биле элек экен деген жыйынтыкка келдик. Жан шериктерге үй-бүлөлүк бакыт каалайбыз.

Перизат Музуратбекова
star@super.kg

 Кыстарылган видео