ПАРАКОРЧУЛУКТУН ТАМЫРЫН КЫРКУУГА БИЙЛИКТИН ЭРКИ ЖЕТЕБИ?

АПТАНЫН “КААРМАНЫ”
Исхак Пирматов – “Республиканын” жүзү, көзгө басар “балапаны”, Бабановдун ишенген кадры. Төшүнө депутаттык белги такканга чейин бензин саткандардын арасында популярдуу болчу. Жогорку Кеңештеги “согуштук тиреши” Текебаев менен өтүп, экөө кызыл чеке болгонго чейин барышкан. Өмүрбек мырза “Пирматов “Кыргызнефтегаз” ишканасынын жетекчиси болуп турганда коррупциялык иштерге тиешеси болгон” деп чыккан эле.
Туура бир жылдан кийин "айсбергдин" чокусу дагы суу үстүнө көтөрүлдү. Бул сапар “Ата Мекен” лидеринин катышуусу жок. ЖКнын жыйынында төрага Асылбек Жээнбеков Башкы прокуратурадан тоголок кат келип түшкөнүн билдирди. Бул орган Исхак Пирматовду кылмыш жоопкерчилигине тартуу боюнча депутаттардан макулдук сураган. "Кара тизмеге" түшкөн “республикачы”: “Мен кылмыш иши деп өлкөдөн качып кетпейм. Аягына чейин туруп, ак экенимди далилдеп берем”,- дегенге жетишти.

АПТАНЫН “БОМБАСЫ”
Бейрасмий маалыматтарга ылайык, Башкы прокуратура жакын арада депутаттар Камчыбек Ташиев, Нариман Түлеев, Нурлан Сулаймановго каршы кылмыш иштерин козгойт имиш. Чынында, мурунтан эле Өзгөчө кырдаалдар министрлигинин экс-башчысы, Бишкек шаарынын мурдагы мэри жана Транспорт жана коммуникациянын экс-министринин паракорчулукка, кызматтык абалдан ашыра пайдаланууга байланыштуу иштери бар экени айтылган. Айтмакчы, Башкы прокуратура бул адамдарга карата ЖКга макулдук суроо боюнча эч кандай кат жөнөтпөгөнүн билдирди. Албетте, бул утурумдук. Шамал болбосо, чөптүн башы кыймылдамак эмес.

ЖАЗ ЖАРЫШЫ – РЕВОЛЮЦИЯ СЕЗОНУ
Учурда жер көөп, анын боорун жашыл чөп менен байчечекейлер тытмалай чыгууга даярданып жаткан кези. Аюу чээнден чыгып, келгин куштардын арты менен жакында мал жайлоону көздөй жөнөйт...
Адатта, окуучулардын көктөм тууралуу тажатма дил баяны ушинтип башталат эмеспи. Бирок соңку 7 жылдык тарых барактарында жаз көтөрүлүш, толкундоо, митингдер менен сүрөттөлө баштады. Мына, Ташиев жана Мадумаров жаздын алгачкы күнүн Ош шаарында миңдеген кишилер менен белгилөөгө билек түрө киришиптир.

ЧЕГИРТКЕДЕН КОРККОН ЭГИН ЭКПЕЙТ
Дал ушул макал учурда президент Алмазбек Атамбаевге бап келет. Анын карамагында болгон
УКМКнын алдындагы Коррупцияга каршы кызмат “Мегакомдун” башкы директору Азамат Мурзалиевди камаса, Башкы прокуратура кол тийбестикке жамынган эл өкүлдөрүнө каршы "ууга" чыкты. Өлкө лидери майда-барат жумуштар менен эмес, чынында эле “акула” менен “киттердин” иши менен алек. Жаздын, демек, митингдердин келе жатканын билип туруп атаандашы Камчыбек Ташиевге каршы күрөш башташын саясий эрк дегенге болот. Ал эми Атамбаев ошол күрөштү аягына чейин жеткиреби же орто жолдо сүйлөшүүлөр менен калабы, балким, оппозицияга жеңилип береби, муну алдыдагы сезон белгилеп берет.