РОЗА ОТУНБАЕВАНЫН УУЛУ ҮЧҮН МАНАСТЫН ЭСТЕЛИГИ ЖӨН ГАНА ТЕМИРДИН БИР КЕСЕГИ...

Роза Отунбаеваны кыргыздын башын бириктирип, намыс үчүн, илгертен келе жаткан салт үчүн өз баласын өлүмгө тике кароого буюрган Курманжан даткага теңеп келебиз. "Өлкө оор абалда турганда баш болду, журт энеси болду, татыктуу башкара алды" деген мактоого татып келген Роза айымдын жалгыз уулу Атай Садыбакасовдун бир билдирүүсү кейишке салбай койгон жок.
Президент Алмазбек Атамбаев Орусиянын баш калаасында Манастын эстелигин ачып келбедиби. Роза айымдын уулу Атай ошол иш-чара тууралуу өз пикирин жазыптыр, интернетте социалдык тармактагы баракчасына. Атай мырзанын пикиринен кыскача үзүндү келтирсек:
“Президент Манастын кезектеги эстелигин Москвада ачты. Ал 80 миллион сомду, башкача айтканда,
1 миллион 739 миң долларды чапчыды.
Орусиялыктарга каяктагы жомоктун баатырына бир жарым миллион доллар коротуунун эмне кереги бар? Бирок бул алардын акчасы дечи, мага десе өрттөп салбайбы, акчаларын.
Мага түшүнүксүз болуп жаткан жери, биз менен силердин акчаңардан 370 миң долларды, кайдагы темирди (Манастын эстелигин айтып жаткандагысы!) башка өлкөнүн кайдагы бир көчөсүнө коюу үчүн сарптоонун кереги бар беле? (Билишибизче, эстеликти жасап, тургузууга мамлекеттин казынасынан акча коротулбаган. Атамбаев, Бабанов баштаган чоңдордун акчасынан жасалган).
Депутаттар мамлекеттин 10 литр бензини үчүн биринин этин бири жешет, 100 доллардык айлыгы бар мамкызматкерлерди кыскартып жатышат. Анан эле миллион доллардын үчтөн бир бөлүгүн түзгөн акчаны каяктагы темирге (!), болгондо да мекенден 3 миң чакырым алыска жайгаштырууга коротушат...”
Экс-ажонун уулу, “башка өлкөгө темирдин бир кесегин ушунча акча коротуп койгондон көрө, ал акчаны өз өлкөбүздөгү маселелерди чечүүгө коротушпайбы” деген мааниде учурдагы ажону сынга алыптыр. Анын “өлкөбүздөгү маселелер чечилбей жатат” деп күйүп-бышканына ыраазы эле болдук дечи, бирок анын бүткүл кыргыз журту туу туткан Манасты темирдин бир кесегине теңегени таң калтырбай койгон жок.
Роза Исаковна Союз кезинде, кийин эгемендүү Кыргызстандын атынан көптөгөн чет өлкөлөрдө иштеп жүрдү. Албетте, мунун артынан уулу Атайга илим-билимдин очогу болгон өлкөлөрдөн билим алууга шарт түзүлдү. Кыргыздын канчалаган таланттуу, зирек, жигердүү жаштарынын көзү чачырап жетпей жүргөн жерлерде билим алды, жашады, тарбияланды. Ошентип жүрүп жан дүйнөсү эли үчүн маанилүү болгон руханий баалуулуктардан куру калган өңдүү. Атайдын мындай билдирүүсүн окуп, Чыңгыз Айтматовдун маңкурт тууралуу баяны эске кылт дей түшөт. Курсактын камы, экономика деген маселелер, албетте, алдыңкы орунда. Бирок жан дүйнө, руханий баалуулуктарды сызып салууга болбойт да. Алмаз Атамбаевдин: “Кыргыздын өнүгүп кетишине төрт гана нерсе катуу тоскоол жаратып келет: коррупция, улутчулдук, жердешчилдик, анан маңкурттук”,- деп бир кейигенин уктум эле. Бекеринен чыкпайт да мындай кейиштер.