«TEQUILA» тобу: «ЫРЛАРЫБЫЗ ЫСЫК БОЛСУН ҮЧҮН ТОПТУ «TEQUILA» ДЕП АТАГАНБЫЗ»

“Тумар” радиосунун 4 жылдык мааракесин куттуктап, кошуна Казакстандан “Tequila” тобу келет. “Казакстандагы топтордон жандуу ырдап айырмаланабыз” деген топтун ырчысы Динара менен эксклюзивдүү маек курдук.

– Саламатсызбы, Динара, топтун жаралуу тарыхы тууралуу айтып берсеңиз...
– Салам. Топ 2005-жылы продюсерибиз Эрик Тастембеков тарабынан түзүлгөн. Курамыбызда үч кыз бар: мен, Роза, анан Анастасия. Баарыбыз топко келгенге чейин эле ырдап жүрчүбүз.

– Эмнеге “Tequila” деп атап койгонсуңар?
– Аталышын продюсерибиз койгон. Tequila деген шаар бар Мексикада. Ошол шаарда ушундай эле аталышта ичимдик чыгат. Биздин ырларыбыз да ушул ичимдик сыяктуу ысык, элге энергия тартуулаган хит болсун деген максатта койгонбуз.

– Силердин тобуңардын башка казакстандык топтордон айырмасы эмнеде?
– Эң башкы айырмачылыгыбыз, жандуу үн менен ырдаганыбызда.

– Топтун курамында үч сексуалдуу кыз бар. Силер орусиялык “ВИА Гра” тобун туурайсыңарбы?
– А эмне, “ВИА Гра” мезгилдин эталонубу? Биздин өзүбүздүн стилибиз, үнүбүз, талантыбыз бар.

– Мырза менен таанышканда алгач эмнесине көңүл бурасыз?
– Биринчи эле маданияттуулугуна. Андан кийин интеллектине болуш керек.

– Кийим алууда брендине көңүл бурасызбы?
– Негизинен, сатып алган кийимиң кымбат болобу, арзан болобу, башкысы, жарашыктуу жана ыңгайлуу болуш керек. Калганы кийинки орунда.

– Айтсаңыз, кара пиарга көз карашыңыз кандай?
– Биз андай пиар менен алектенип көргөн эмеспиз жана ал нерсеге маани бербейбиз. Ошондой пиарды жаратып жаткандарды да түшүнбөйбүз.

– Силерди Орусияда билишеби?
– Биз гастролдор менен Орусиянын бир нече шаарларына барып концерт коюп келгенбиз. Бирок баары тааныйт дегенден алысмын.

– Жакынкы аралыктагы пландарыңар кандай?
– Алдыга койгон пландар толтура. Негизги максатыбыз – репертуарыбызды хит ырлар менен толтуруу.

– Буга чейин Кыргызстанга келгенсизби?
– Ооба, Бишкекке жана башка шаарларына барганмын.

– Пластикалык хирургдун кызматынан пайдалангансызбы?
Жок.

– Кайсы топко окшошкуңар келет?
– Эч кимге.

– Топтогу кыздардын баары бойдокпу?
– Мен үй-бүлөлүүмүн, калгандары бойдок.

– Юрмаладагы “Жаңы толкун” сынагына да катышкан экенсиңер...
– 2006-жылы жарым финалына чейин жеткенбиз. Ал эми эл аралык сынактар тууралуу айта турган болсом, катышкыбыз деле келбейт. Алардын деңгээлине чыкканга аракет кылбайбыз. Бизге өзүбүздүн чөлкөмүбүздөгү эле аудитория жетиштүү.

– Топтогу кыздар абдан келишимдүү, келбетиңерге кантип кам көрөсүңөр?
– Негизи, табиятыбыздан эле ушундайбыз. Бирок ар бир айым сыяктуу эле бетибизге кам көрөбүз.

– Музыкага кандай талап коёсуңар?
– Эң башкы талап, ыр сапаттуу жана мазмундуу болуп, анан, албетте, бизге жагышы керек.

– “На восток” деген ырыңардын автору ким?
–Бул ырыбыздын автору –өзбекстандык ырчы DJ Nemo.

– Репертуарыңарда канча ыр жыйнак бар?
– Азырынча бирөө эле. Буюрса, алдыда көп максаттар бар, алар ишке ашса, анда мындай ыр жыйнактардын далайы чыгат.

– Кыргызча ырдап калышыңар мүмкүнбү?
– Балким...

– Кыргызстандык күйөрмандарыңызга айтайын деген сөзүңүз бар болсо керек...
– “Тумар” радиосунун туулган күнүнө карата 20-мартта Спорт Ордосунда өтчү концертибизге сөзсүз келип көңүл ачып кеткиле. Сиздер үчүн ырдап, жакшы маанай, позитивдүү энергия тартуулоого даярбыз. Билишимче, радионун жамааты концертте көрүүчүлөр үчүн атайын зер буюмдарды, тиричилик техникаларын ойнотот экен.

Лунара Бекиева
star@super.kg