КАРА ДУБАДАН КАНТИП КОРГОНУУГА БОЛОТ?

Адатта жарыяланган макалабыз бир топ талкуу жаратат. Бирок бул жолу замандаштарыбыздын талуу жерине тийгенби, телефондун жаагы басылбай койду. Сөз гезитибиздин мурунку санында “Сүф, сүф, сүйдүрүп берем, баасына жараша...” деген аталышта, учурда коомубузга кеңири жайылган "баш айлантуу" тууралуу жарыяланган макалабыз жөнүндө. Көзү ачыктар кантип башты айлантары жана баалары тууралуу жазганбыз. Окурмандардан “мындай дубалардан кантип коргонууга болот?” деген суроо көп келгендиктен, кайрадан бул темага кайрылдык.

«КАРА ДУБАЛАРДАН СҮННӨТ ДУБАЛАРЫ КОРГОЙТ»
Равшан Эрматов, Кыргызстан Мусулмандар дин башкармалыгынын үгүт- насаат бөлүмүнүн башчысы:
– Кара дубанын өзүнө токтоло турган болсок, бул – көзү ачыктар үчүн акча табуунун жеңил жолу болсо, алсыз адамдардын үмүтсүздүгүнөн келип чыккан өзүн-өзү алдоо. Жакшы дубабы, жаман дуба, кара дуба болобу, алардын кабыл болушу бир гана Жараткандан. Дуба оңой эле кабыл алынып калчу нерсе эмес. Ысытып, суутуп, сүйдүртүп, кара дубалатып салам дегендер ашырып сүйлөгөндүк жана бул сөздөрдүн кудурети жок.
– Бирок жашообузда бул ыкма менен күйөөлөрдү тартып алгандар же ушундай жол менен үйлөнгөндөр да жок эмес. Практикада көрүп жүрөбүз го...
– Мындан коргонуу системасын Алла Таала өзү берген. Эң негизги коргонуу системасы адамдын өзүндө. Дайыма даарат менен жүрүү, экинчиси, эртең менен жана кечинде сүннөт дубаларды калтырбастан окуу – эң бекем коргонуу. Үйдөн чыгып жатканда “Аллага тобокел кылдым” деп, үйгө кирерде “Ассалом Алейкум, Бисмиллахир рохмаани рохиим” деп келме келтирсе, шайтандын кадамы эшикте калат. Жатар төшөктү үч сыйра силкип, “Алхамдуллила” деп Аятул Курси жана кыска сүрөлөрүн окуп, алакан жайып бата кылуу керек.
– Кара дуба кимдерге таасир этет?
– Ооба, мындай көрүнүштөр да бар. Кара дубанын таасири окутулган адамдын коргонуу системасы жок болсо, толук тийиши мүмкүн. “Дубаны дуба кайтарат” дейт, ал адам өзүнө тийиштүү сүннөт дубаларды, келмелерди келтирип жүрсө, андай жаман дубалардан оолак болот.
–“Өтүшүп кетиптир” деген кептерди да угуп калам...
– “Тиги төлгөчүнүн дубасы өтүп кетиптир” деген нерсе – анын аброюн көтөрүп жаткан нерсе. Биз күндүзү жүрүп калабыз же түндөсү, анан биздин жаныбызда дайыма жин-шайтандар да аралашып жүрөт. Адамга таасир этип калганын байкабай калабыз. Кээде жүрөгү сыгылып, кулактарына шуулдаган үндөр угулуп калат. Медициналык аппараттарга түшсө таза чыга берет. Бирок адам уктай албай, кыжалат болуп, кыйнала берет. Мына ушундай учурда көзү ачыкка барса, ал “силерге кара дуба түшкөн” деп айтса, ал оорулуу адам ого бетер ооруп калат. Орусча айтканда, “самовнушение”. Жин окуган атайын адамдар бар, ошолорго кайрылып жинин куудуруп салса, ал адам айыгып кетет. Көздүн сугу түшүп калышы мүмкүн, көз түшсө кабыргага чейин алып баруучу күчү бар дейт. Адам баласы мындан да коргонуп жүрүшү керек. Жин-шайтан, көз, сөз тийбеш үчүн анын тиешелүү дубаларын окуса, андан арыла алат. Ошондуктан кара дубага ишенүү менен мамиле жасабаңыздар. Кара дубага ишенсең, бул дубанын таасирин күчөтөт. Кара дубадан коргонуу үчүн Фатиха, Аятул Курси, Кафирун, Ихлас, Фалак, Ан Нас сүрөлөрүн окусаңыз болот.

ТӨЛГӨЧҮ ЦЫГАНДАРГА АЛДАНБАЙЫН ДЕСЕҢИЗ, ОКУП КӨРҮҢҮЗ!
Светлана Бровкина, психолог:
– Адамдын психикасы бала кезден баштап калыптанат. Чоң эне-чоң аталары, ата-энеси мындай иштерге ишенген болсо, балада да мистикага, төлгөчүлүккө же ушул сыяктуу нерселерге ишеними калыптанып калат. Гипноз бар экени илимий түрдө аныкталган. Бирок бул нерсенин ар бир адамга эле күчү жете бербейт. Гипноз – өтө терең транс абалы. Бизде транс абалына түшүрүүчүлөр гана бар.
Адамдын жүзүндө микромимикалар бар жана аны адам өзү көзөмөлдөй албайт. Көп учурда көзү ачыктар адамдын ички толгонуусун мимикасы аркылуу окуп коёт. Анан аларды көзү ачыктар өз кылтагына оңой эле иле алышат. Цыгандар ушул жол менен иштешет. Мисалы, кайгылуу, ойлуу бара жаткан адамга келип “сен азыр аябай кыйналып жатыптырсың, көйгөйлүү маселе болуп жатыптыр” деп айтат. Тиги таң калат, ал турсун Кудайындай ишенип алат. Анткени ал чындап эле кыйналып жатат да. Ошентип, өзү билбестен аны менен сүйлөшүүгө кирет. “Мени тааныбаган эле адам менин көйгөйүмдү кайдан билсин, мунун көзү ачык окшойт” деген ойдо калат.
Цыгандар адамдын психологиясын жакшы өздөштүргөн жана адамды тез эле башкарып, өзүнө ишендирип алышат. Ал сизге сүйлөйт, сиз ага жооп бересиз, ошентип, сиз өзүңүздү алдоого шарт түзүп жатканыңызды байкабай калышыңыз мүмкүн. Мен төлгөчү, көзү ачыктардын баары тең алдамчы деп айтуудан алысмын. Ичинде чындап эле алтынчы туюму күчтүүлөрү бар. Бирок алар чанда кездешет. Азыр элдин жашоого болгон көз карашы тар, ошол себептен алар ар кандай көзү ачык дегендерге ишенүүдө. Алардын кылтагына илинбөө үчүн “ЖОК!” деп катуу үн, ишенимдүү жүз менен айтышың керек. “Шашып жатам” деп айттыңыз дегиче анын кылтагына илинип, акчаңыздан айрыласыз. Сиз ага жооп берүүңүз менен өзүңүзгө аны жакындатууга жана алдоого шарт түзүп жатасыз. Ал эми "мени дубалап салыптыр" деп ишенүү туура эмес. Медицинада муну плацеба деп атап коёт, мындай айтканда, өзүн-өзү ишендирүү. Адам баласы өзү каалаган нерсеге гана ишенет.

Мальвина Уметбекова
koom@super.kg

 Кыстарылган видео