АЛЫСТЫ ЖАКЫН КЫЛГАН WWW.SUPER.KG

"Аганы көрүп ини өсөт" демекчи, "Супер-Инфонун" "иниси" www.super.kg бүгүнкү күндө өзүнүн мобилдүүлүгү, маалыматка бай экендиги менен кыргыз тилдүү сайттардан өзгөчөлөнүп келет. Анын жаралуу тарыхы да баарыбызга кызык болсо керек...

www.super.kg сайты тууралуу кызыктар

• Сайтта учурда 20 982 колдонуучу бар. Бул сан күн сайын өсүп турат.
• Форумда баш-аягы 415 112 билдирүү бар.
• 2011-жылы ЮСАИД уюмунун Кыргызстандагы өкүлчүлүгү жана "M-Vector" компаниясынын сурамжылоосу менен www.super.kg өлкөбүздөгү гезиттерге таандык сайттардан кирүүчүлөрүнүн саны боюнча алдыңкы орунга чыккан.
• 2011-жылы "Супер-Инфо" гезитинин жамааты жана www.super.kg сайтынын колдонуучулары биргеликте бак тигип, "Достук багы" деп аташкан.

www.super.kg сайтынын жаралуу тарыхы 2005-жылдарга барып такалат. Анткени аталган сайттын жаратуучусу, "Супер-Инфо" гезитинин негиздөөчүсү Кылычбек Султанов окурмандар менен байланышты жакшыртуу, кыргызстандыктарды гана эмес, чет жерде жүргөн мекендештерибизди да өлкөбүздөгү жаңылыктар, кызыктуу маалыматтар менен кабардар кылууну көздөп, көпкө ойлонот. Акыры кыргызча сайт ачууну максат кылат да, бул оюн бир жылдан ашык бапестеп багып жүрүп, 2006-жылдын 28-мартында ишке ашырат. Ал күндөрдү сайттын жаратуучусу Кылычбек Султанов мындайча эскерет:
– Чындыгында, ал кезде сайт ачуу, болгондо да кыргызча сайт ачуу өтө кыйын эле. Эсимде, көпкө чейин бул жаатта түшүнүгү бар мыкты адис таппай кыйналгам. Долбоордун ишке ашышына жардам кылам дегендер көп эле чыккан. Бирок алардын долбоорду ишке ашыруу убактысы, ишинин сапаты мени канааттандырган эмес. Издештирип жүрүп акыры Михаил аттуу программист жигитке токтолуп, экөөбүз бири-бирибиздин оюбузду толуктап отуруп www.super.kg сайты жаралган. Көп тармактуу кыргызча сайт түзгөндөрдүн алгачкыларынан болгонум үчүн терминдерди, сөз айкаштарын которуу, аларды колдонуу жагынан жакшы эле кыйналгам. Ошол которгон терминдердин арасынан "пароль" – "сыр сөз" деген термин аябай эсимде калыптыр.
Ишимдин жыйынтыгын ойлоп, башынан эле сайттагы ар бир сөзгө, үтүр-чекитке чейин карап, жумушумду бир топ татаалдатып алган элем. Веб-портал боюнча түшүнүгүм кеңейген сайын сайттын түзүлүшүн, дизайнын жылына 3-4 жолу алмаштырган учурларым болгон. Кыйналганыма карабастан, бул иштин түйшүгүнө жамаатыбыздан 1-2 адамды гана кээде аралаштырып калганым болбосо, негизинен, 4 жылдан ашык сайт менен өзүм жалгыз алектендим. Албетте, мага сырттан адистер жардам беришчү. Кийин, 2010-жылдан тарта гана акырындан бул ишке жамаатымды аралаштыра баштадым.
Ооба, сайт жаралгандан тарта бир топ өзгөрүүлөргө учурап, жаңыланып келе жатканы талашсыз. Бүгүнкү күндө сайттын мүмкүнчүлүгү кең. Колдонуучулар жаңылык алуу менен бирге кыргыз обондорун угуп, клиптер, элдик видеолор, макалалар боюнча өз пикирлерин калтырып, форумда түрдүү темалар боюнча талкуу жүргүзүп, жылдыздарга, өлкөнүн жооптуу кызматтагы чиновниктерине, саясатчыларга суроо узатып, түз жооп ала алышат, курбу-курдаш таап жана башка кызыктарга ээ болушат.

Бактыгүл Сокушова, www.super.kg сайтынын редактору: "САЙТКА ТЫНЫМСЫЗ КӨЗӨМӨЛ КЕРЕК"
– www.super.kg сайтына редакторлук кылып келе жатканыма 1 жылдан ашып калды. Техникалык жумуш болгондуктан, сайтты күнү-түнү тынымсыз карап турууга туура келет. Кээде свет өчүп калат, кээде сервер иштебей калат. Мындай учурларда кандай болбосун кырдаалдан чыгуунун айласын табуу керек.
Жетекчибиз Кылычбек Султановдун түн ортосунда телефон чалып "бул иштебей жатат" деп уйкудан ойготкон учурлары да болот. Муну мен түшүнүү менен кабыл алып, кырдаалды жөнгө салам. Анткени биздин сайт дүйнө жүзүн камтыгандыктан, колдонуучуларыбыз ар кайсы континенттерден киришет. Андыктан убакыт-саатты да эске алышыбыз шарт. Мисалы, Кыргызстанда түн ортосу болсо, Японияда таң атат, ал эми АКШда түш чен болот. Ар бир континенттеги колдонуучуларыбызга шарт түзүп берүү – биздин милдет.

КОЛДОНУУЧУЛАР САЙТ ЖӨНҮНДӨ ЭМНЕ ДЕШЕТ?

Айтмырза Абылкасымов (Барс), сайттын эң улуу колдонуучуларынын бири:
– 64 жаштамын. Өзүм Аксы районунда турам.www.super.kg сайтына 2008-жылдын октябрь айында катталгам.
"Азыркы учурдун маалымат булагы – интернеттен өтөрү жок" дегенди угуп, эски компьютеримди чөнтөк телефону аркылуу интернет желесине туташтырып, ар кайсы сайттарга кирип жүрчүмүн. Бир күнү капысынан www.super.kg сайтына туш келип калгам. Эми көктөн издегеним дал алдымдан табылганына кубанганымды айтпагыла! Алгач колдонуучуларга жакшы кошула албай, алар менен тең ата сүйлөшүп, жазгандарын үтүр-чекитине чейин сындап жаман да көрүнгөнмүн. Мага жини келгендер "бул сайтка киргенден да жададык, ушул Барстын айынан..." деп модераторлорго чейин арызданып, ал тургай мени сайттан айдап жиберүүгө аракеттенишкен. Бара-бара көпчүлүк форумчулар менин сындарыма көнүп, 2009-жылы "Супер сынчы" деген наам ыйгарышкан.

Айдай Омуралиева (Аydаshkа), сайттын чет өлкөдөгү активдүү колдонуучуларынын бири:
– www.super.kg сайтына Австрия өлкөсүнөн кирем. Сайтка 2010-жылы октябрь айында катталгам. Ошол күндөн бүгүнкү күнгө чейин кирбей калган бир да күнүм боло элек. Бул жакта "Супер-Инфонун", анын ичинде сайттын фанаттары болгон мекендештер көп болгондуктан, байма-бай жолугушууларды өткөрүп турабыз.
Сайтка кирүү мен үчүн өзүнчө эле ырахат! Күн сайын форумда ар кандай кызыктуу темалар ачылып, талкууга алынып турат. Кээде берилип кетип убакыттын өткөнүн да билбей калам. Эсимде, бир жолу форумда отуруп баламды бала бакчадан алууну унутуп калыптырмын.

Гүлкайыр Сайдимарова (azalove), сайтты эң көп убакыттан бери колдонуп келе жаткандардын бири:
– Башында жөн эле кирип макалаларды окуп чыгып кетчүмүн. Кийин, 2007-жылы кирип, "Супер-форум" иштей баштаганын окуп дароо катталгам. Бул сайт – менин жашоом. Мен үчүн чыныгы жашоомо караганда виртуалдык жашоом кызык. Колдонуучулардын жүзүн көрбөй туруп алардын жазган билдирүүлөрүнөн кандай адам экенин билип, өзүңө курбу тапсаң да болот. Менин досторумдун баары ошол жакта. Ал гана эмес, 5 жашыбыздан бери көрүшө элек курбумду да ушул жактан таап алгам. Арабызда дос болуп, ал тургай баш кошуп балалуу болгондор да бар.

Дамира Арстанова
koom@super.kg

 Кыстарылган видео