МИКАЭЛЬ
– Микаэль, ырчылык өнөргө канча жашыңдан аралаша баштагансың?
– Кичине кезимден, тагыраак айтсам, бала бакчага барып жүргөндө эле ырдаганды жакшы көрчүмүн. Ырга болгон кызыгуум өзүм менен кошо өсүп отуруп, акыры ырчы болуума алып келди. Алгач орусча, түркчө, англисче ырларды ырдап жүргөм. 16 жашка толгондо Түркияга колледжге окуганы кеттим. Ал жактан окуп да, ырдап да жүрчүмүн. Ыр дүйнөсүнүн алгачкы сабактарын Түркиядан алгам десем болот. Түркиядан мен көп жакшы нерселерди үйрөндүм. Бирок, баары бир мекениме болгон сагыныч мени бир жарым жылдан кийин туулган жериме кайтып келүүмө себепкер болду. Келгенден соң, ырчы болуу тилегим ишке ашып, эл алдына ырдап чыгып калдым.
– Түрк тилин Түркияга барганга чейин билчү белең?
– Мектепте окуп жүргөнүмдө дос балдарымды күнүгө кечинде таппай калам. Көрсө, алар түрк тилин үйрөнүүгө курска барып жүрүшүптүр. Ошентип, аларды ээрчип барып, мен да курста окуп калдым. Анан түрк тилин алардан дагы жакшы өздөштүрүп кеткем. Азыр түркчө суудай сүйлөйм.
– Алгачкы сахна эсиңде болсо керек?
– Түркияда жүргөнүмдө чоң сахнада эмес, кечелерде ырдап жүргөм. Ал эми мекенимде биринчи жолу чоң сахнага күзүндө чыккам. Ошондо өз сахна ушунчалык ыйык экенин сезгем.
– Сени журналдардан да көрүп жүрөбүз. Моделдикке кандайча келип калгансың?
– Мен кичинемден ырчылык менен бирге моделдикке да абдан кызыкчумун. 9-класста окуп жүргөнүмдө моделдик агенстводо иштеген Евгения, Лена деген кыздар менен таанышып калдым. Алар менин шыгымды байкашып, жактырып калышып ишке чакырышкан. Алгач биринчи көргөзмөдө такалуу бут кийим кийип чыкканым эсимде. Ошондон тартып модель болуп иштей баштагам. Учурда болсо Бишкектеги “New Star” деген жаңы моделдик агенствонун директорунун кызматын аткарып жатам.
– Ал эми «Ажыдаар» арагынын рекламалык ролигине кандайча тартылып калгансың?
– Роликке тартылуу сунушу моделдик агенстволордун биринен түшкөн. Сценарийи мага жаккандыктан, макулдугумду бергем. Роликке тартылуу үчүн тату салонуна барып, денеме ажыдаардын сүрөтүн тарттыргам.
– Сени көптөр улуту башка деп келишет?
– Мени көптөр түрктөргө окшоштурушат. Бирок, менин атам да, апам да кыргыз. Ошондуктан, мен толук кандуу кыргызмын.
– Көңүлүңө жаккан адамың барбы?
– Болгон. Бирок, ал Түркияда кала берди. Анын да улуту кыргыз болчу. Андан башка сүйүүмдү арнай турган кызга кезиге элекмин.
Маектешкен Жаркынай Нусубалиева
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
