БАБАНОВ СУПЕРМЕН ЭМЕС

“ООБА, УТЕМУРАТОВ МЕНЕН ЖОЛУККАМ”
 Өкмөттүн 100 күндүк иш жыйынтыгы талкууланарда интернетте Казакстан президентинин атайын өкүлү Булат Утемуратов менен Бабановдун сүйлөшүүсүнүн стенограммасы таркап кеткен. "Чү" дегенде эле баарлашуу оппозициядан башталып, Бабановдун диалогунда аларды "сарт" атап сөккөн сөздөрү да кезигет. Орусия менен мамилеси начар болуп жатканын, бирок Бабанов баары өз изине түшүп кетерин айтат ал жерде. Утемуратов “майга чейин "Мегакомдун" ишин жаап бергиле. Биз берчүбүздү бергенбиз, эми сен убадаңды аткар” десе, Бабановдун “эч ойлонбоңуз, азыр оппозициянын протесттик маанайын акча менен жаап алайын” деп жооп бергени жазылат. Бул стенограмма чындыкка дал келеби, кандай жол менен алынганы белгисиз.
Буга чейин деле мындай компроматтарга күбө болуп жүргөнбүз. Андыктан ЖКнын жыйынында депутаттар 100 күндүктү унутушуп, дароо сенсацияга жабышышты. Өмүрбек мырза казак өкүлү менен жолукканын тастыктап, бирок стенограммадагы сөздөр айтылбаганын, анын атайы даярдалган жалаа экенин билдирди. Камчыбек Ташиев кошула кетип: “Казакстандан инвесторлорду кызыктырабыз деп сүйлөшкөнүңөр го жакшы экен, бирок мончого эле барбасаңар болду”,- деп кыйыта сүйлөсө, Бабанов “эми биз мончого ким менен барышты билебиз да” деген жооп узатты.
Муну менен экөө "К.Ташиев Москвадагы мончодо Айдар Акаев менен жолугушту" деген кабарды козгой кетишти.

ЖЫЙЫНТЫКТАН КЫСКА КЕП
Өкмөт башчы программаны аткарууда каталар болбой койгон жок, бирок көптөгөн иштер жасалды дейт. 100 күндүк иш программасында эң ийгиликтүү жыйынтыктардын бири катары мамлекеттик кирешенин 16,4 миллиард сомго көбөйүп, ал эми мамлекеттик бюджеттин чыгымдары 800 миллион сомго кыскарганы белгиленди.
Өкмөттүн 100 күндүк ишине канааттанбаган депутаттар да чыкты. “Ар-намыс” фракциясынын депутаты Анарбек Калматов өкмөт коалиция менен иштебей жатканын айтты. Ошондой эле КСДПнын депутаты Данияр Тербишалиев "Супермен же Бетмэн келсе да, коюлган тапшырмаларды 100 күн ичинде жасай албайт" деди.

БАБАНОВ ӨЗҮ ЭМНЕ ДЕЙТ?
Премьерге карата "Ахмат Бакиевдин качуусуна жардам берди, кендерге лицензияны эски эле коррупциялашкан жол менен берүүгө тиешеси бар жана улутташтырылган бакиевдик объектилерди ээлеп алууда" деген дооматтар айтылып жаткан. Ал суроо, сын-пикирлерге төмөндөгүчө жооп кайтарды:
"Сиздер колдоп берген мамлекеттик бюджетти 2011-жылга салыштырмалуу 14 пайызга көп кабыл алдык. Ал толугу менен аткарылып жатат. Бул көмүскөдөгү экономикага бөгөт койгонубуздан болууда. Каржы полициясын жоюп жатабыз. Мындай иштер эч качан жасалган эмес".
Парламенттин депутаттарын "Өмүрбек Бабановду эмне үчүн эки-үч айдан бери Орусия кабыл ала элек?" деген суроо кызыктырды. “Азыр Орусияда жаңы президент келип, өзгөрүүлөр болуп жатат. Бул процесс бүткөндө Орусияга барам”,- деп жооп берди депутаттардын суроосуна. Ал эми “Ата Журт” фракциясынын лидери Камчыбек Ташиев "премьер-министрдин Орусияга барганга акчасы жок болсо, биз жардам беребиз" деп какшык ыргытты.