EURO 2012: ФРАНЦИЯ
Ассоциациясы түзүлгөн жыл – 1919-жыл.
Башкы машыктыруучусу – Лоран Блан.
Капитаны – Юго Льорис (“Лион”).
Мыкты бомбардир – Рекордчу: Тьерри Анри (51), азыркылардан Карим Бензема (13).
Эң көп оюн өткөргөн оюнчусу – Рекордчу: Лилиан Тюрам (125), азыркылардан Флоран Малуда (73)
Эң ири жеңиши – 10:0 эсебинде Азербайжанды (1995-жыл, 6-сентябрь).
Эң ири жеңилүүсү – 17:1 эсебинде Даниядан (1908-жыл, 19-октябрь).
Жетишкендиктери – 2 жолку Европа (1984, 2000) бир жолку Дүйнө чемпиону (1998).
ФИФАнын рейтингинде 16-орунда.
ФУТБОЛДУ ЖОЛГО САЛГАНДАР
Франция футболдук дөө-шаа эле эмес, футболду өнүгүү жолуна салган өлкө. Учурдагы ФИФА жана УЕФА уюмдарын түзүүдө алар активдүү катышкан. Алар Бразилия, Бельгия, Румыния сыяктуу согушка чейинки 3 Дүйнө чемпиондугунда тең ойношкон. Алгачкы жеңиш 1958-жылкы мундиалда катталып, коло тагынышкан. Франциялыктардын жемиштүү жылдары – 80-жылдар. М.Платини, Ж.Тигана, А.Жиресс, Л.Фернандес сыяктуу алтын курам "Евро-1984тү" утуп, 1986-жылкы мундиалда колого ээ болушкан.
Негизи, француз футболунун өзгөчөлүгү – универсалдуулугунда. Стандарттык соккуларды мыкты аткарышат. Франция дүйнөдө кадырлуу курама командалардын катарына биринчи жолу өз үйүндө өткөн 1998-жылкы мундиалды утуп кошулган. Анын артынан Европа чемпиондугун утуп, азырынча мундиалдын артынан Европа чемпиону аталган жалгыз команда. Ошол чемпиондук алар үчүн акыркы болуп келүүдө. 2006-жылы мундиалдын финалында утулуп, "Евро-2008" жана "ЮАР-2010до" катары менен тайпалык баскычта учушту. "ЮАР-2010до" Доменек менен айрым футболчулардын ортосунда чыр чыккан. Эки-үч оюнчу менен катар Доменек курамдан айдалып, Франция көлөкө астында калгандай болгон.
КОМАНДА БУТКА ТУРДУБУ?
Бирок үмүт шамына Лоран Блан жалын бүркүп, 2010-жылы курамды колго алды. "Францияга кет-кет келди" дегенди жокко чыгарган мсье Блан канчалык кыйын болсо да, буга чейин 5 ирет катары менен Европа биринчилигинде чыгып, Францияны 6-ирет чыгарды. Тандап алуу оюндары өз үйүндө Беларуска жеңилүү менен башталганы менен, акыркы турда Босния жана Герцеговинаны утуп, "Евро-2012ге" барчу жолго түштү. Блан мелдешти утуу талабы жок деп, “биз дагы да болсо жаңы команда түзүүдөбүз. Тайпадан чыксак болду, калганын көрөбүз” деди. Бландын азыркы тизмесинде "Евро-2008ге" баргандардан 6, легионерлерден 10 футболчу бар.
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
