ЖАНАР ЖЫРГАЛГА ЖЕТТИ

«Супер-Инфонун» тандоосу боюнча «2010-2011-жылдын супер телеалпаруучусу» Жанар Акаев 2-июнь күнү үйлөндү. Келинчеги Жыргал өзүнүн эле кесиптеши. 26 жаштагы Жанар Алайдын кымыз жыттуу баласы болсо, 22деги Жыргал Аксынын айпериси. Эмесе, журналист жуптардын ак тоюнан сөз баштайлы.

ЖУРНАЛИСТ ЖУПТАР БАЯНЫ

– Куш боо бек болсун, жигит!
– Рахмат!

– Жанар, үй-бүлөлүү жашоо жыргал бекен?
– Жыргал болуп жатат, ооба (күлүп). Бирок үйлөнгөндөн кийин экөөбүз толук кандуу жашап жатабыз деп айталбайбыз. Тойдун эртеси айылдан келген конокторду узаттык. Аларды тоого алып чыгып, ойноттук. Мындайча айтканда, туугандар үчүн эле жашап жаткандайбыз. Анын эртеси виза даярдаганы Астанага жөнөп кеттик. Үйгө келип эле силердин редакцияга жөнөдүк. Тамак деле ичелекпиз.

– Анда бал айын Казакстанда өткөрдүңөрбү?
– Эми бал айы деп айталбайбыз. Шаарды кыдырып, анан өзүбүздүн жумуштар менен жүрдүк.
Жыргал: – Сөзүнөн кармап калайын, бал айын, буюрса, Венецияда өткөрөбүз. Өзү сөз берген.
Жанар: – Мен саякатты жакшы көрөм, буюрса, бир канча өлкөгө барганга ниеттенип жүрөм.

– Ат араба менен Бакыт өргөөсүнө бармакчы элең, байкасам, ат арабаң автобуска айланып кеткендей.
– Ат араба менен барайын деп деле ойлодум. Сонун аттар деле бар экен. Ошол идеям жакшы болчу. Бирок шаарда ат араба менен тойлоп жүрсө, автотыгын болуп кетчүдөй. Мен үйлөнүп жатат элем деп аппак болуп ат арабада жүрсөм, элдин баарынын жинине тийбейин дедим. Автобуста эле айландык.
Жыргал: – Биз өзү чачып-төкпөй, тыкан эле, бул жактагы жакын туугандарды чакырып өткөрөлү дегенбиз. Көпчүлүккө жар салбай, «технично» эле үйлөнүп алалы деп жүргөнбүз. Бирок кыргыз салты менен кыргызбы, билбейм, улууларга жеңилип калдык. Тойду өзүбүз уюштурдук. Бизде кат-каттап машиналарды артынан ээрчитмей деген жок болду. Андайга Жанар да, мен да каршы болдук.
Жанар: – Ашыкча чыгымдын не кереги бар? Куда-кудагыйлар бири-бирине кийит кийгизмей дегенди, калың бермей деген салттарды жасаган жокпуз. 30 адам менен тоого чыгып, чакан тойчук жасап өткөрүп коёлу деп ойлогом. Туугандарым болбойт «ой, мен баланчанын тоюн жегем, мен ага мынча акча алпаргам» деп, кыскасы, «алыш-бериш деген бар» дешти. Бир чети туугандардын кеп-сөзүн укпай коюу болбоду. Чынында, той өткөргөн жаштар өзүбүз эле кыйналмакпыз, ошентип отуруп бир топ чыгымдарды жок кылдык. Балдар айтышты, «дос, менден Жип, менден башка машина» деп. Аларга айттым «ай, жок, мени жакшы көрөсүңөр, билем. Койчу, жөн эле өткөрөм» дедим. Жип менен эмне, шаарды аралап токтотуп коёбуз, ашыкча чыгым. Ошентип, досторум автобус жалдап келишти. Сүрөттөрүбүздү чыгарып, чаптап, ичин жасап алдык. Автобуста кайра жакшы экен, кенен, жеңелер, достор болуп ырдап-бийлеп бардык.

– Ким өкүл ата болду?
– Өкүл аталыкка Султан Каназаровду койдум. Ал аябай жакшы жигит, мыкты журналист да. Өкмөттүк аппараттын маалыматтык саясат бөлүмүнүн башчысы. Бирок мен анын кызматына кызыгып койгон жокмун. Экөөбүз башынан эле жакшы пикирдешпиз. «Азаттыкта» иштеп жүргөндө мени ага окшоштурушчу, сүйлөгөнүбүздү да. Мага ага катары дайыма кеңешин айтып келген калыс жигит.

– Ар жердин салты ар башка, Алай менен Аксынын салты кандай болду?
Жыргал: – Салт салт менен экен. Көп нерсе адамдын өзүнөн окшойт. Жаңыдан куда түшүп барат дегенде Жанар экөөбүз чочулап жатканбыз, баары бир Аксы менен Алайдын салтында айырма болсо керек деп. Анан эле чалышты, баары жакшы дешип.
Жанар: – Алайдан делегация Аксыга барган деп кой. Кудайга шүгүр, бири-бирин өмүрү көрбөгөн эки жак жылуу кабыл алышып, аягында тууган болуп чыгышыптыр. Тойдо ата-энелерибиздин ынак болуп жүргөнүн көрүп, кубанып калдык. Кээде салт кармабайбыз деп ашыкча батышчыл болуп кетпедимби деп ойлоп коём. Мен Жыргалдын үйүнө баратам, бутумда кроссовка, жынсы шым деп кой.

– Канча киши келди, эмне белек берди дегендей?..
– 200дөй киши чакырдык. Белек алдык, көбүнчөсү акчалай. Анан тойдон кийин минтип үйдө деле болбогон соң бизге түшкөн белектерди кандай белек, эмне белек деп ачып көрө элекпиз. Тойдо Ширин Айтматова Чыңгыз Айтматовдун китептерин белекке берди.

– Мындан бир топ убакыт мурун маегибизде «кызым жок» дей койдуң эле, кийинчерээк Жыргал «сайгылады» бейм, ээ, ачыкка чыга баштадың?
– Ха-ха-ха, анда мындай болгон да. Жыргал экөөбүз ошол күнү урушуп кеткенбиз. Элдин баары ойлойт экен, мени күлүп эле жүрөт деп, жок, менин да ачуум бар да. Анан «сүйлөшкөн кызың барбы?» деп сураганыңарда айтайын деп айталбайм, көкүрөктө жанагы ачуу тарай элек да! Жумушка барсам, жайнаган «Супер-Инфо». Жыргалга көрсөтпөй каттым. Эжелери окуп айтышкан экен. Анан кайра кечирим сурап абалдан чыккам.

– Прагага аттанганы турасыңар, сапарыңар байсалдуу болсун. Бактылуу жаштардан болгула!

Бурул Исмаилова
star@super.kg

 Кыстарылган видео