ЖЫЛДЫЗДУУ БАЛДАР КАНДАЙ КИЙИМ КИЙИШЕТ?

Голливуд жылдыздары өздөрүнүн гана атактуулугу үчүн жан үрөбөй, балдарын да сүйрөй жүрүшөт. Ал тургай белгилүү басылмалар жыл сайын дүйнө жылдыздарынын эң стилдүү балдарын аныкташат. Быйыл бул сыйлуу наамды Дэвид жана Виктория Бекхэмдердин 1 жаштагы кызы Харпер багындырды. Ал эми биздечи? Бул суроого жооп табууга көмөктөшүп, биздин шоу дүйнөдөгүлөрдүн балдарын сынга койдук. Атактуулар балдарына кандай кийим кийгизип, кайдан сатып беришет, бир төгүлүп-чачылып айтып алышсын.

АЙЫМА – АНЖЕЛИКАнын кызы
Саркеч айым Анжеликанын улуу кызы Айыма да апасын тартчудай. Төрт жарым жаштан жаңы ашса да, кийим тандоо жагына өзү кийлигишет экен. Анжелика бул тууралуу мындай дейт:
– Айыманын бала бакчага кийген кийимдерин гана дүкөндөн албасак, конокко кийчүлөрүн өзүм тигем. Себеби кызым “мама, мен сиздикиндей көйнөк кийгим келет” дей берет, анан өзүмдүкүнө окшоштуруп тигип берем. Айыманын гардеробунда 8 эң кымбат көйнөгү бар. Алар менин кичине кезимде сахнага кийген көйнөктөрүм. Ал кезде баасы 100 доллар болсо, азыр алар 500 доллардай турат го. Акыркы жолу кызыма 3000 сомдун тегерегинде купальник алып бердим.

МАЙРАМБҮБҮ – БАКЫТ БАЙСАРИЕВдин кызы
Бийчи, шоумен Бакыт Байсариевдин кызы Майрам азыр 2 жашта. Атасы “күлүп койчу, сүрөткө түшөбүз” десе, тим эле жылмайып катып калат экен. Анан да атасын Быйтыбай деп чакырганы кызык.
Эми кичинекей Майрамдын гардеробун сөз кылалы. Майрамга ата-энеси кийимди көбүнчө базардан эле алып, сууктан же ысыктан качкан маалда гана дүкөндөргө баш багат экен. Анан да бийчи мырза өзүнө атайын костюм тиктиргенде кызына да тиктирет. Майрамдын эң кымбат кийими 7000 сом болсо, арзаны – бекер. Бекер дегени, Бакыт мырза кээ бир тааныштарынан бир көйнөк алса, экинчисин белек кылып койгон учурлары да болгон.

ШААСЫН – АСЫЛ АПАСОВАнын кызы
Жылдыздарды “жаратуу” жагынан мыкты адиске айланган продюсер Асыл Апасованын кызы Шаасын учурда 2 жаш 3 айга толду. Апасынын жанына киши жолотпой, быйтыйган колдору менен түртүп, “кет, менин апам” деп эле турат экен. Асыл эже кызы жөнүндө төмөнкүлөрдү айтып берди:
– Шаасын мени ушинтип кызгана берет. Бир жолу Канат Култаев бетимден өөп учурашып койсо, ыйлап калбаспы! Эми ини же сиңдилүү кылсам, мындай эркеликти таштайт деген ойдомун. Азыр жалгыз кыз болуп, көңүлүмдүн баары ушул кызымда. Ал эми кийим-кечекти ар кайсы дүкөндөрдөн алам. Кымбатына карабайм. Бул көйнөктү кесиптешим Сүйүн Токсобаев Америкадан Мирбек Атабековдун сүйгөн кызы Мэкага тандатып алып келген. Кызым чоңойгондо саркеч бийкечтерден болот окшойт. Дегеним, менин көйнөктөрүмдөн кокус жагып калса, “чеч, мен кием” деп чыр салат.

РАЯНА – ГҮЛАНДА менен АЙБЕК КАРЫМОВдун кызы
“Ата келди” деген сөздү көп кайталаган Гүланда менен Айбек Карымовдун 1 жаш 11 айлык кызы Раянага кийимди көбүнчө таенеси алып берет. “Кызыңдын кийим-кечегине капчыкты канчалык деңгээлде “арыктатасың”?” деген сурообузга Гүланда: “Кызымдын стилдүү болушунан эч нерсе аябайм. Атасынын анча деле иши жок. Раянанын кийимдеринин эң арзаны 700 сомду чапчыса, жакында эле 3000 сомго сатып берген юбка эң кымбаты болду окшойт”,- деп жооп берди.

РУСЛАН – РОЗА ШАКИРОВАнын баласы
Русландын арзан кийими 350 сом болсо, кымбаты 7000 сомго чыгат экен. Оюнчуктарынын арасында 10 000 сомдук машинасы да бар. Баласынын кийими, стили туурасында сүйлөшүп отурганыбызда Руслан сөзгө аралаша кетти эле, биз да микрофон сундук.

– Атам кийимди “Таш-Рабаттан” сатып берет.

– Бул көз айнекти кайдан алдыңар?
– Апам мурдагы “крутой” очкимди тебелеп кеткен да. Анан бүгүн тамак ичкен базардан сатып берди.

– Чоңойгондо ким болосуң?
– Атамдай боксёр болом, моминтип-моминтип дубалды согом.

– А атаң кимди согот?
– Апамды согот. Моминтип урат.

Колу менен өзүн бетке муштап көрсөтүп кирди. Уулунун бул сөзүнө апасы мындай комментарий берди: “Эми бала көргөнүн айтат да. Жолдошум кээде баланы көнсүн деп муштагылап кирет, андайда мен ортого түшөм. Ошондо мени да урумуш болуп коёт, ошону айтып жатат го”.
Руслан муну менен эле токтоп калбастан, "Салтанат эжем менен атам да урушкан". Муну укканда шаштысы кеткен Роза эже: “Ий, балам, ай. Абийирдин баарын төктүң го, ха-ха. Анда Руслан 1 эле жашта болчу. Эжем Салтанат менен жолдошум айтыша кетишкен эле. Ошону айтып жатат. Эми андай учурлар жашоодо боло берет да”,- деп уулун алаксытууга шашты.

РУЗАНА – ГҮЛЗИНАТ СУРАНЧИЕВАнын кызы
Гүлзинат Суранчиеванын кызы Рузана учурда 3-класска көчтү. Гүлзинат эже кызы тууралуу буларды айтты:
– Балалуу болгондо балаңдан эч нерсени аябай калат экенсиң. Кээде дүкөн кыдырып калганда өзүмө бир нерсе жагып калса, андан көрө тамак-ашка же үй тиричилигине жумшайын деп ары түртүп коём. Бирок кызыма ылайык кийим көрсөм, кымбатына да карабай ала бермейим бар. Чет жактарга чыкканда кызыма көп нерсе алам. Мисалы, бул көйнөгүн Дубайдан алып бергем. Кызымдын кышкы кийимдери 200 доллардан жогору. Ал эми арзаны 500 сомдун тегерегинде. Мисалы, жакында эле Араб Эмираттарынан 300 долларга 999 пробадагы алтын сөйкө сатып бердим.

Бахияна Сатылганова
star@super.kg

 Кыстарылган видео