«Чоро» тобунун көркөм жетекчиси МАРАТ АБЫЛОВ: «ЭСТРАДА ЫРЧЫЛАРЫНАН АЙЫРМАБЫЗ ЧОҢ»

«Жылдын супер тобу» наамына талапкер этноэстрадалык «Чоро» тобунун өзүнө тиешелүү өзгөчөлүгү бар. Ошол өзгөчөлүктөр тууралуу топтун көркөм жетекчиси жана урма аспапта ойногон Марат Абылов кеп салып берди.

– Айтсаңыз, топ түзүү идеясы кимге таандык жана топтогу жигиттерди чогултуу демилгесин ким колго алган?
– Топтогу жигиттердин баары мэриянын алдындагы эл аспаптар оркестринде иштечүбүз. Кыргыздын эски ырларын аткарып жүрүп, мындан бир жыл мурун бас-гитарада ойногон Апаз Сыдыков экөөбүз жалаң таланттуу балдарды чогултуп, топ ачуу тууралуу сүйлөшкөн элек. Ошентип, балдарды акырындан чогултуп, алгач тар чөйрөдө эле ырдап жүрдүк. Өзүбүздүн деле чоң ийгиликтерге жетишип, шоу-бизнеске аралашуу максатыбыз жок болчу. Анан жакында болуп өткөн «Фрунзе Life» фестивалына катышып, баш байгени жеңип алгандан кийин биздин ырларыбыз элге жагарын билип, аудиториябызды кеңейтүүнү чечтик.

– Өзүңүз да топто урма аспапта ойнойт экенсиз...
– Ооба. Балдар менен кеңешип музыка тандап берем. Мындан сырткары көркөм жетекчинин кызматын да аткарам.

– Топтун курамындагы жигиттер тууралуу айтып берсеңиз. Топтун ар бир мүчөсү жок дегенде бирден аспапта ойносо керек?
– Албетте, ар бир ырчынын өзүнө тиешелүү кызматы бар. Көпчүлүгү Улуттук консерваторияда окуп жатышкандыктан, музыка жөнүндө түшүнүктөрү кенен. Топто жети жигит бар: Апаз Сыдыков бас-гитарада, Марс Жалилов комузда, Бексултан Маматкулов домбрада, Адилет Серкебаев гитарада, Айжигит Канат уулу клавишада, мен урма аспапта ойнойм. Нурболот Деңизбек деген вокалчыбыз бар.

– Топту эмнеге «Чоро» деп атадыңар?
– Бул атты биз кыргыз эстрадасында өчпөс изи бар улуу инсан Чоро Кожомжаровдун урматына атаганбыз. Ошол инсандын репертуарындагы ырларды жаңыча ырдап чыгабыз. Ага кошумча 1960-жылдардан берки элдин жүрөгүнөн орун алган ырлар жана күүлөр жандуу музыканын коштоосунда, биздин аткаруубузда жаңырмакчы.

– Жалаң кыргыз музыкалары менен эле чектелип каласыңарбы?
– Жок, чет элдик ырларды да аткарабыз. Эми ал публиканын кабыл алуусуна жараша болот.

– Каржы жагынан ким жардам берет?
– Аспаптардын баары өзүбүздүкү. Калган жагынан ата-энелерибиз, жакындарыбыз колдоо көрсөтүшөт.

– Продюсерсиз кыйналып калбайсыңарбы?
– Продюсер бул – товар сатуучу адам. Ал эми жакшы товар жарнамага муктаж эмес. Биз өз күчүбүзгө ишенебиз.

– Эстрада ырчыларынан айырмаңар барбы?
– Чындыгында, жергиликтүү эстрада ырчыларын эч кимибиз укпайбыз деле, алардан айырмабыз чоң. Мисалы, биз фонограмма, минусовка менен ырдабайбыз. Бир гана аспаптардын коштоосунда жандуу үн менен аткарабыз.

Лунара Бекиева
star@super.kg

 Кыстарылган видео