7 ДУБАНДА ЖАҢЫ ЖЫЛГА ДАЯРДЫК КАНДАЙ?

Ошентип, бир жылды артка таштап, Жаңы жылга утурлап кирүүдөбүз. Кыргыз эли Жаңы жылга даярдыкты баштады. Кыргызстандын 7 дубанында Жаңы жылга
кандай даярдык көрүлүүдө? Кеп аймактагы кабарчыларыбызда болсун.

ЧҮЙДӨ...
Чү дегенде эле борборубуздан баштайлы дедик. Бишкекте расмий түрдө жаңы жылдык маанай 14-декабрда башталды. Ушул күнү өлкөнүн эң башкы балатысынын ачылышы болуп, шаар башчы Иса Өмүркулов жаңы жылдык майрамды баштап берди. «Ала-Тоо» аянтындагы башкы балатынын бийиктиги 23 метрди түзөт. Мындан сырткары Жогорку Кеңештин, мэриянын, Абдылас Малдыбаев атындагы Опера жана балет театрынын алдына, ичине 4 балаты орнотулду. «Ала-Тоо» аянты кооздолуп, Жаңы жылга карата 130 плакат, баннерлер чыгарылып, көчөлөргө илинди. Мэриядан көчөлөргө кооздук берүүчү 150 гирлянда орнотулуп бүткөнүн маалымдашты.
Баш калааны толугу менен кооздоп, негизги балатыларды орнотуу үчүн жалпысынан 4 миллион 200 миң сом сарпталыптыр. Шаар тургундары үчүн Жаңы жылга карата арзан баада азык-түлүк, белектерди, балатыларды сатып алуу үчүн жарманкелер уюштурулуп жатат. Ибраимов жана Жумабек көчөлөрүнүн кесилишинде 28-31-декабрь аралыгында айыл чарба жарманкеси өтүп, шаардыктар арзан баада азык-түлүк сатып ала алышат. 26-декабрь күнү Абдылас Малдыбаев атындагы Опера жана балет театрында президент Алмазбек Атамбаевдин катышуусунда республиканын булуң-бурчунда эң мыкты окуган окуучулар үчүн балаты майрамы болот. Ал эми 27-декабрь күнү Иса Өмүркуловдун атынан 1500 бала үчүн кайрымдуулук балаты майрамы өткөрүлөт.

ЫСЫК КӨЛДӨ...
КРнын Ысык-Көл облусунун социалдык-мониторинг жана өнүгүү бөлүмүнүн башчысы Бактыгүл Исакова Жаңы жылга даярдыктар боюнча төмөндөгүлөргө токтолду:
– Быйыл Жаңы жылга жакшы ниеттер менен даярдык көрүп жатабыз. Жаңы жылдык кечеге жергиликтүү бюджеттен 25 миң сом бөлүндү. Балаты майрамына
110 миң сом каражат бөлүнгөн. Учурда Каракол шаарында балатыны орнотуп койдук. Борбордук аянтка коюлган балатынын узундугу 11 метрди түзөт. 25-декабрда облустагы алдыңкы окуучуларды, социалдык жактан коргоого муктаж болгон балдарды бириктирип, жаңы жылдык балаты кечесине чакырдык.
120 бала бул мааракеге катышат. Ал эми 31-декабрда атайын иш-чара уюштурулуп, шаардык мэриядан, депутаттардан куттуктоо болот. Жаштардын көпчүлүк бөлүгү борбордук аянтка чогулгандыктан, концерттик программа, конкурстар, викториналар менен коштолот. Соңунда Каракол шаарында саат 23:00дө фейерверк аттырабыз.

БАТКЕНДЕ...
Баткен облусунун социалдык мониторинг жана өнүктүрүү бөлүмүнүн башкы адиси Алижан Абдыкалыков:
– Баткенде кызуу даярдыктар көрүлүүдө. Окуучулар үчүн «Балаты-2013» жаңы жылдык майрамы 26-декабрда Баткен шаарында өткөрүлөт. Шаардын көчөлөрү, көчө боюндагы имараттар, мекеме, ишканалар жаңы жылдык жасалгалар менен кооздолду. Ал эми жаңы жылдык балаты жакында орнотулат.

ЖАЛАЛ-АБАДДА...
Жалал-Абад шаарынын мэринин орун басары Гүлзат Алимбаева жаңы жылдык даярдыктар боюнча буларды айтты:
– Жалал-Абад шаарында Жаңы жыл майрамына карата жергиликтүү бюджеттен 1 миллионго чукул акча каражаты каралды. Жасалгалоо иштерине 480 миң сом каражат бөлүндү. Бийиктиги 16 метрден узунураак болгон балаты борбордук аянтка орнотулат. Балдардын балаты майрамына жана борбордук аянтта өтүүчү майрамдык иш-чарага 312 миң сом акча бөлүндү.

ОШТО...
Ош шаардык мэриясынын басма сөз катчысы Жаңы жылга даярдык тууралуу төмөндөгүлөрдү баяндайт:
– Бийиктиги 26 метрди түзгөн балатыны жасалгалоо менен даярдык башталган. 20-декабрдан 31-декабрга чейин жаңы жылдык балатынын астында улуттук, классикалык музыка жаңырып турат. Ал эми мүмкүнчүлүгү чектелген балдардын үйлөрүнө шаар мэри Мелисбек Мырзакматовдун жаңы жылдык белектери жеткирилмекчи. 31-декабрда борбордук стадиондо жаңы жылдык концерт башталып, шаар жетекчилигинин куттуктоосу айтылат. Ош шаарынын тургундары фейерверктин атылышы менен Жаңы жылды тосуп алышат.

НАРЫНДА...
Нарын шаарынын борбордук «Теңир-Тоо» аянтына бийиктиги 13 метрге жеткен балаты орнотулуп, түрлүү оюнчуктар, гирляндалар, дюралайттар менен кооздолду. Нарын шаарынын Ленин, Шералиев, Раззаков көчөлөрүн кооздоп жасалгалоо үчүн жергиликтүү бюджеттен 56000 сом акча каражаты бөлүнүп берилип, шаардык муниципалдык «Таза-Нарын» ишканасынын эмгек жамааты тарабынан кооздоо иштери жүргүзүлүп жатат. Шаар ичин жаңы жылдык жасалгалоого 500 метр электрдик түркүн түстүү жарыктар сатылып алынды. Алардын 250 метри мекеме, ишканалардын сырттарын кооздоого кетсе, 250 метри көчөлөрдү көрктөндүрүүгө жумшалат.

ТАЛАСТА...
Талас шаарынын мэринин социалдык маселелер боюнча орун басары Жаныбек Исраилов майрамдык даярдыктар боюнча төмөндөгүлөргө токтолуп өттү:
– Жаңы жылга утурлай балдар үчүн 26-декабрда Атай Огонбаев атындагы музыкалык окуу жайда мэрдин жаңы жылдык балатысы өтөт. Концерттин алкагында ар бир бала 300 сомдун тегерегиндеги белекке ээ болот. 31-декабрда Талас шаарынын борбордук аянтында майрамдар да болот. Күндүз аркан тартмай, көздү таңып боксташуу, гиря көтөрмөй жана тогуз коргоол сыяктуу кызыктуу оюндар өтөт. Жаңы жылдык балаты орнотула элек, бирок орнотулат. 31-декабрь күнү кечинде саат 17:00дө жергиликтүү ырчылардын концерти элге тартууланат. 20:30да Өкмөттүн Талас облусу боюнча ыйгарым укуктуу өкүлү Койсун Курманалиева жана шаар башчысы Анарбек Кушубеков жалпы Талас элине куттуктоо сөздөрүн айтышмакчы.

«Супердин» сурак бурчу
БЫЙЫЛ ЖАҢЫ ЖЫЛДЫ ТОСУУДА КАНДАЙ ӨЗГӨЧӨЛҮК БОЛОТ?

Иса Өмүркулов, Бишкек шаарынын мэри:
– Өзгөчөлүк катары быйыл Аяз аталардын парадын айтсак болот. Парад 31-декабрь күнү эртең менен саат 10:00дө «Ала-Тоо» аянтында башталып, мэриянын имаратынын жанында аяктайт. Ал жерден мен Аяз аталарга белек таратам. Аяз аталар кайра бөбөктөргө тапшырышат.

Мелисбек Мырзакматов, Ош шаарынын мэри:
– Учурда жаңы жылдык кечеге өзгөчө көңүл бурулуп жатат. Шаар калкына майрамдык шарттарды, албетте, түзүп беребиз. Ал күнү биз иштейбиз, элибиз майрамдайт. Бардык мекемелер, шаардык транспорттук каттамдар өз графиги менен иш алып барат.

Ишенбек Өмүрканов, Каракол шаарынын мэри:
– Каракол шаарында 15-декабрдан баштап Жаңы жылга даярдануу иш-чаралары башталган. Биз Жаңы жылда кичинекейлерге балаты майрамын мыкты өткөзүүгө даярдык көрүп жатабыз. Өзгөчөлүк катары ушуну айтып кетсек болот.

Баатырбек Жээналиев, Нарын шаарынын мэри:
– Жаңы жылдык жасалгалоо иштерин аяктап калдык. Борбордук көчөбүз – Ленин көчөсүн башынан аягына чейин жарыктандырдык. Шаардагы кеңселердин баары кооздолуп, Жаңы жылга жасалгаланууда.

Бакытбек Адылов, Жалал-Абад шаарынын мэри:
– Балатыны Токтогул районунан алдырып, жаңы салынып бүткөн аянттагы фонтандын алдына орноттук, өзгөчөлүк ушул болчудай. Анын бийиктиги 16 метрден ашат. Андан тышкары шаардагы көчөлөрдү жасалгалоого өзгөчө көңүл бөлүүдөбүз.

Сейдакмат Эрматов, Баткен шаарынын мэри:
– Бул жылдын өзгөчөлүгү – шаардын негизги көчөлөрү жаңы жылдык жалтырак жарыктар менен кооздолот. Эң маанилүү өзгөчөлүк – 2013-жылды биз кар менен тосо тургандыгыбыз болуп турат. Баткенде Жаңы жылда кардын болушу сейрек көрүнүш.

Анарбек Кушубеков, Талас шаарынын мэри:
– Жаңы жылды тосууга жергиликтүү бюджеттен 191 миң сом акча каражаты бөлүнгөн. Азыркы убакта Талас шаарынын борбордук аянтына башка жылдардан айырмаланып, чоң балаты орнотуу иштери жүргүзүлүүдө.

koom@super.kg