2013-ЖЫЛДЫ ӨРТ КЫРСЫГЫ ЖОК ТОСОЛУ

Нарын облусунда өрт кырсыгы быйыл көп катталганына байланыштуу Жаңы жылды утурлай ушул макаланы берүүнү чечтик. Макала даярдоодо Нарын облусунун ӨКМКБнын өрттүн алдын алуу бөлүмүнүн башчысы, капитан Таалайбек уулу Талгат салым кошту.
Урматтуу теңир-тоолуктар, Жаңы жыл эмнеден башталат? Ооба, балаты, кубаныч-шаттык, белектер... Жаңы жылда мектеп, бала бакча, клуб, театр жана башка мекемелерде балаты майрамы өткөрүлөт. Анда оюн-тамашанын ыгы жок, эрежеден тышкары өткөрүлүшүнүн себебинен өрт чыгып, күтүлбөгөн кырсыкка учурап калышыбыз ыктымал эмеспи. Ошондуктан балаты орноткондо жана майрамдык оюн-тамашаларды уюштурууда коопсуздук эрежелерине айрыкча көңүл буруу керек. Анткени жаңы жылдык майрам көп күнгө уланып, балатылар алынбай турары да белгилүү.

• Балатыны жасоодо гирляндалардын кубаттуулугу 25 вольттон ашпоосу керек. Бенгаль шамдарын күйгүзүүгө тыюу салынат. Балатылар эл чыгуучу жолдорду тоспогондой жерге орнотулуп, (кокус кырсык болуп кетсе, сыртка чыгууга тоскоол болот) ал имарат ОП-5 же ОУ-5 үлгүсүндөгү өрт өчүргүчтөрү, батарея менен иштөөчү кол чырактар жана телефон байланыштары менен камсыз болуусу кажет. Балаты электр лампочкасынан 50 же 70 сантиметр алыс аралыкта орнотулушу зарыл.
• Мектептерде, бала бакчаларда балаты майрамын өткөрүүдө балдарды кароосуз таштоого, аларга ишенип ар кандай иштерди тапшырууга болбойт. Өрт кырсыгы болуп кетсе, алар жабыркап калышы мүмкүн.
• Саат түнкү 12 болору менен көчөгө чыгып ар кандай пиротехникалык каражаттарды жардырат эмеспизби. Жардыргыч заттардын айынан Жаңы жылдын алдында денелерин күйүккө алдырып, олуттуу жаракат алгандар жок эмес. Биз сизди Жаңы жылды оорукананын керебетинде тоспойт деп ишенебиз.
• Пиротехниканы атайын дү­көн­дөрдөн сатып алыңыз. Жасалмага кабылуу мүмкүнчүлүгү азаят. Сатуучудан тарсылдактар жөнүндө мүмкүн болушунча баарын сурап алыңыз: кай жеринен тутандырыш керек, билиги канча убакытка чейин күйөт, ракеталар кандай багыт менен учат, канчалык алыстыкта туруу коркунучсуз экенин. Бул – сатуучунун милдети, уялбастан сураңыз. Мындан тышкары пиротехникалык заттарды колдонуу жөнүндөгү көрсөтмө мамлекеттик же расмий тилде жазылышы керек. Андыктан жазылган көрсөтмөлөрдү окушуңуз зарыл.
• Белгилүү болгондой, пиротехника жардыргыч заттар менен толтурулган. Аларды чөнтөктөргө, сырткы кийимдердин капюшондоруна салбоо керек. Жарылса чоң кырсыкка алып келиши ыктымал.
• Салютту көп кабаттуу турак үйлөрдүн жанынан жандырбаңыз. Эгер алардын бири бирөөнүн балконуна түшсө, ал үйдүн кожоюнуна батирди өрттөөнү ойлобогонуңузду түшүндүрүү кыйын болот.

Нарын облусунун Өрткө каршы мамлекеттик кызматынын башкармалыгынын жалпы жамааты элибизди Жаңы жыл майрамы менен куттуктап, чың ден соолук, узун өмүр, бакыт-таалай жана эмгектеги зор жетишкендиктерди каалайт!