«СОЙКУЛУК МЕНЕН КАРМАЛГАН КЫЗДАР ЫЙЛАП ЭМЕС, ЫРДАП КЕЛИШЕТ»

Ош ШИИББинин кылмыш иликтөө бөлүмүнүн кызматкерлери тарабынан Ош шаарындагы сауналарга ыкчам иликтөө иштери жүргүзүлдү. Рейд учурунда көчө кыздарына көмүскө сойкулук уюштуруп берген 10го жакын сауналар жабылып, администраторлоруна кылмыш иши козголду. Иликтөө учурунда 20дан ашык сойку кыздар «иш үстүндө» кармалган. Кармалган кыздардын арасынан бири да уялып же кылган ишине өкүнгөнү кездешпегени бизди таң калтырды. Беттерин жашырганы менен, баары эле күлүп, айрымдары кубангандай...

«БУЛ ЖОЛДОН ЧЫГЫП КЕТҮҮ ООР БОЛУП ЖАТАТ»
Сойкулук менен алектенип кармалган кыздардын айрымдары суроолорго төмөнкүчө жооп узатышты.

– Атың ким, кайдан келгенсиң?
– Динар, 1986-жылы туулгам. Ала-Бука районунан келгем.

– Качантан бери иштейсиң? 
– Бир аптадан бери иштеп жатам. Акча керек болуп калып, бир кызга жолуктум. Ал ушул жерге алып келди.

– Канча сомдон таап жатасың?
– Бир кардардан 250 сомдон алабыз. Бардыгы өзүбүздө калбайт, администратор Жылдыз эжеге беребиз, анан ал бизге канча бир пайызын берет.

Ал эми Нурзат аттуу 26 жаштагы келин бул жолго жолдошуна өчөшүп түшүп, кайра чыга албай калганын айтат.

– Бул ишке оңой менен эч ким барбайт. Эч ким бизди ушул жолго бар деп да мажбурлаган эмес. Турмушка чыккам, бир балабыз бар. Бирок жолдошум экөөбүз ынтымактуу жашап кете албадык. Ата-энемдин өздөрүнчө тиричилиги бар, аларга барсам, «турмушка чыккансың, жолдошуң менен жараш» деп айта беришкендиктен, алар менен сүйлөшпөйм. Курбум, эжем болуп бирге жашайбыз.

– Денеңди сатып иштөөнү дагы канчага чейин улантасың?
– Ким эле үй-бүлөсү менен бактылуу жашашты каалабасын? Жашмын, жакшы жумушта иштеп, жакшы жолго түшөм, балам менен бирге болом деп ниет кылам. Ал күндөр качан келет, азырынча мага караңгы, бирок мага да күн чыгарына ишенем (көзүнө жаш алып). Кыйналып кеттим...

–  «Мындан ары жакшы үй-бүлө куруп, жашап кетем» деп өзүңө ишенесиңби?
– Ишенем, аялга андан артык бакыт жок да. Бул жолго адашып түшүп калганыма өкүнөм. Чыгып кетүү кыйын болуп жатпайбы.

«БАЗАРДЫН ОРТОСУНА САУНА АЧЫП АЛЫШЫПТЫР»
Ош шаардык жана облустук ички иштер башкы башкармалыгынын басма сөз кызматынын инспектору ЗАМИР СЫДЫКОВ төмөнкүлөрдү билдирди:
– Бул жолдо жүргөн кыздардын 98 пайызынын ата-энеси кыздары эмне менен алектенип жүргөнүн билишпейт. «Окуп жүрөм» же «иштеп жатам» деп алдап коюп, башка жолдо жүргөндөрү көп. Булар коркпой да калышкан, кармап алып келе жатсаң ыйлаганы жок, тескерисинче, кыйкырып ырдап келишет. Жашыруун сойкуларды иштеткен сауналарга массалык чоң тинтүү жасоо республикада биринчи жолу болуп жатат. Ош шаардык ИИББинин кылмыш иликтөө бөлүмүнүн кызматкерлери бир айга жетпей 10 саунаны жабышты. Мончо деп коюп, денесин саткан кыздарды иштеткен сауналар бар экен. Алардын администраторлору саунага келген кардарына шаардагы денесин саткан кыздарды чакырып беришет экен. Рейд учурунда базардын ортосуна сауна ачып алгандар да кездешти. Жылаңач балдар-кыздар кирип-чыгып жүрүшөт, бул адамдардын аң-сезимине кандай таасир берип жатканы айтпасак деле белгилүү да. Администраторлордун көпчүлүгү татар, орус улутундагы аялдар. Кылмыш жана жаза кодексинде сойкулук кылгандар үчүн атайын берене жок болгондуктан, биз сауналардын администраторлорунун үстүнөн 261-берененин (сойкулук жасоо үчүн көмүскө жайларды уюштуруу же күтүү) негизинде кылмыш ишин козгодук. Акыркы убактарда ушундай иштер көп жүргүзүлүп жатканына байланыштуу өткөн жылдарга салыштырмалуу сойкулук менен алектенген кыздардын саны азайды.

Уулбү Каныбекова
koom@super.kg