«БЕКНАЗАРОВ ҮЧҮН «КУМТӨР» – ШЫЛТОО»

24-апрель күнү Азимбек Бекназаров баштаган оппозициялык топ «Ала-Тоо» аянтына чогулушту. Артындагы кошууну, алдын ала айтылгандай, 10 миң эмес, миң кишиге да жетпеди. Жамгыр күнөөлүүбү же жетиштүү таратылбай калган акча айыптуубу, кыскасы, митингдин катышуучуларынан да жөн гана кулак төшөгөн, өтүп баратып кызыгып карап калган байкоочулар көп болду.

БЕКНАЗАРОВ ИЧ КҮПТҮСҮН ЧЫГАРЫП АЛДЫ
Өткөн аптада маалымат жыйын өткөргөн Азимбек Бекназаров журналисттерге карап: «Силер токсуңар, ошон үчүн революцияны каалабайсыңар. Биз «Кумтөр» менен болгон келишимди денонсациялоо мыйзамын демилгелеп алып чыктык. Аны депутаттар карабаса, биз парламентти таратабыз. Эгерде жаңы бийлик «Кумтөрдү» элге кайтарып бербесе, мен революцияга чыгып, элдин кызыкчылыгын коргойм»,- деп күпүлдөгөн эле.
Бул билдирүүдөн эки жагдайды түшүнүүгө болот. Азимбек Бекназаров акыркы эки жылдан бери кызматсыз отурат. Ал экс-президент Курманбек Бакиевдин режимин кулаткандардын, кийинки Убактылуу өкмөттүн 14 мүчөсүнүн бири болчу. Алардын көпчүлүгү бийликте, рулда, ал эми жээкке ыргытылып калганы ушул Азимбек мырза эле болду көрүнөт. «Силер токсуңар, ошон үчүн революцияны каалабайсыңар...» деген кеби ириде өзүнө байланыштуу айтылып кетти окшойт.
Экинчиден, «эл үчүн» деген Азимбек мырзанын «эли» 24-апрелде бир ууч митингчилер менен чектелип калды. Кезинде бул саясатчыны октон да жалтанбай жанын берүүгө даяр жигиттер, узак жолго карабай жөө-жалаң Бишкекке чейин таламын талашып келген журт колдоор эле.Убакыттын өтүшү менен эл кимдин чындап күйөрүн, а кимдин бийликсиз калганда утурумдук митингдерди өткөрчү дасыккан уюштуруучуга айланып калганын билип деле бүттү.

АК ҮЙГӨ КИРГИЗИШКЕН ЖОК
Парламентти таратмакчы болгон Бекназаровду Ак үйгө коопсуздук кызматкерлери тийиштүү документтери жок деп киргизбей койду. Эгерде кирсе, «Кумтөр» менен болгон келишимди денонсациялоо боюнча узун кебин депутаттарга айтып бермек. Мамлекеттик комиссия бул маселе боюнча өз жыйынтыгын парламентке ушул жылдын июнь айында кайра алып келмекчи болгон. Ошондуктан каралып жаткан маселеге Азимбек мырзаны кошууну туура көрүшпөдү сыяктанат.
Келишимди жокко чыгаруу боюнча ЖКнын депутаты Өмүрбек Текебаев: «Мен мындай сунушка макул эмесмин. 2009-жылы түзүлгөн келишим гана эмес, 2003-жылы түзүлгөн келишим дагы жокко чыгарылышы керек. Бекназаров кайрадан 2003-жылы түзүлгөн келишимге токтололу деп жатат. Бул такыр туура эмес»,- деди.
Айтмакчы, оппозициянын митингине Нурлан Мотуев да кошулду. Ал катышуучуларга: «Биз кандан коркпойбуз, «Кумтөр» баары бир биздики болот!»- деп кыйкырды. Нурлан мырза мындай билдирүүсү менен эмнени айткысы келгени түшүнүксүз. Өзү кан төгүүдөн коркпошу мүмкүн, бирок аянтка чогулган катышуучулар үчүн жооп бере алар бекен?..

САЯСАТТА ПРИНЦИП ДА, ДОСТУК ДА ЖОКПУ?
Бул митингдин башаты 24-мартта Жалал-Абадда өткөн элдик курултайга барып такалат. Ал күнү Бекназаровду жандап барган Адахан Мадумаров, Ахматбек Келдибеков, Равшан Жээнбеков негедир жамгырлуу 24-апрелде митингден көрүнүшпөдү.
Өзгөчө Мадумаров менен Бекназаровдун ымалага келгени кызык. Кезегинде Адахан мырза 7-апрель окуясынын катышуучуларына байланыштуу: «Ошо жерде каза болгондордун саны 10-12 киши дейт, жанагы бомждорун да кошкон дейт, дүкөн уурдап жатып каза болгондорун да ошол жерге алып келип кошкон дейт, Бакиевди жаман көрсөтүш үчүн өлгөндөрдүн санын көтөргөн. «17 көзгө атарды кармадык» деп Бекназаров канча какшады, бирөөсүн көрсөтө алган жок» деп айтып чыккан эле, парламенттик шайлоонун алдындагы эл менен жолугушуулардын биринде. Ал видео азыр интернетте саякаттап жүргөн кези. Эми минтип кайнаса каны кошулбачудай сүйлөп жаткан Бекназаров менен Мадумаровдун коюн-колтук алышканы саясатта кастык да, достук да жок, болгону кызыкчылык бар экенин дагы бир ирет далилдеди.
Тарыхка кылчайсак, 2006-жылдары «элди митингге чыгарган – кыргыз элинин душманы» деп Мадумаров айтып жүрбөдү беле? Ооба, анткени ал кезде мамкатчы болчу.
Мадумаров менен Бекназаровдун максаты чын эле «Кумтөр» маселесиби же башкабы? Же эптеп «кетсин» менен дагы бир революция жасап, андан пайда көрүү демилгесиби? Же Азимбек мырза эки жыл жатып зеригип, бийликти опузалап койгусу келдиби, айтор, мезгилдин талабы болгон «Кумтөрдү» бетине тутуп чыга келишти. Жаш, жөн салды сүйлөй бербеген депутат Дастан Бекешев муну мындайча сыпаттады: «Азимбек Бекназаров үчүн «Кумтөр» шылтоо гана. Эгерде «Кумтөр» болбогондо ал «Мегаком» боюнча, ал да болбой калса, «эмнеге Курманбек Бакиевди алып келишкен жок?» деген көйгөйдү ойлоп чыкмак».

Эльвира Караева
politika@super.kg