КАЙТАЛАНГЫС РЕТРО КЛИПТЕР

Учурунда уйкудан безип уккан ырларга тартылган клиптер азыр кимдин эсинде болду экен? Эгерде жадыңыздан чыгарып койгон болсоңуз, өткөндү эстетип жылмайта турган ретро клиптерди эсиңизге салалы.

Кубаныч Сатаев:«ТҮШТҮК КЫЗЫ» – АТАМДЫН АКЫРКЫ КЛИБИ»

Режиссёру – Анарбек Мойноков
Тартылган жылы – 1993-жыл
Бекер тартылган

-Бул клип аябай шашылыш тартылган. Атам Талас шаарында гастролдоп жүргөн. Ошондо тааныштары жолугуп калып, эстеликке тартып коёлу дешип жергиликтүү студиялардын бирине алып барышкан. Өмүрүнүн аз калганын сезгенби, айтор, клипке өзгөчө бир каалоо менен тартылган эле. Ошондон бир жумадан кийин атам көз жумду.
Ал фонограмма эмне экенин билбеген жан болгондуктан, алдын ала жаздырып койгон үндөн артта калып калат. Атамдын акыркы эмгеги «Түштүк кызы, карындашым, садага...» күйөрмандары үчүн эң баалуу белек болуп кала бермекчи.

Айчүрөк Иманалиева:«АЙЫЛ КЕЧТЕРИ» – ОШОЛ КЕЗДЕГИ ЭҢ КЫМБАТ КЛИПТЕРДИН БИРИ»

Режиссёру – Александр Губин
Тартылган жылы – 1995-жыл
Кеткен каражат – 500 доллар

-Ал убакта клиптеримдин көпчүлүгүн Александр Губин тартчу. Идеясы да ага таандык. Ошол кездеги эң кымбат клиптеримдин бири. Башкы ролдорду уулум Арген менен Анжелика аткарышкан. Байтик айылынан тартылган. Айылдын тургундары бизди көрүп аябай сүйүнүшүп, майын-чайын алып келип, ал-абалыбызды сурап көңүлүбүздү жылытышкан эле. Ошол учурдун адамдары башкачабы же кандай экенин билбейм, клипти бир сутканын ичинде, ойноп-күлүп, өзүбүздү эс алууда жүргөндөй сезип тартып койгонбуз. Актёрлордун баары менин досторум болгондуктан, акы сурашкан эмес.

Алим Токторов:«АДИНА – БАКТИЯРДЫН ЖЕҢЕСИ»

Режиссёрлору – Рустам Аташов, Алим Токторов
Тартылган жылы – 1996-жыл
Бекер тартылган

-«Адина, Адина, жүрөлү, жаным, ак сүйүүгө багына» деген ырдын клибинин идеясын көпкө ойлондук. Аягында тик учакта тартууну чечип, борборубуздагы аскердик талаалардын бирине барып сурансак, дароо эле макул болушту. Алдын ала сүйлөшкөн кыздарыбыздын колу бошобой, Адинанын ролуна менин жубайым, Бактиярдын жеңесин тартып койгонбуз. Клип эки күндө даяр болгон. Биринчи күнү тик учакты учуруп бийиктиктен, экинчи күнү жөн эле ичинде отуруп ырдаган кадрлар тартылган.
Ал убак такыр башка мезгил экен, акча сураш эч кимдин оюнда жок болчу. Клип тартылып бүткөндө тик учак талаасында иштегендерге жарым саат концерт коюп бергенбиз.

Кубик Калыков:«ЖЕҢЕМ» 5 ЛИТР ЖАРМАГА ТАРТЫЛГАН»

Режиссёру – Гүлсина Чотонова
Тартылган жылы – 2001-жыл
Кеткен каражат – 5 литр жарма

-Анда биз Асел Турдалиеванын концертине кызуу даярданып жүргөнбүз. Анан жарнама тартыш керек болуп калды, арыдан бери жарым саатта «Жеңе» аттуу ырды жаздым. Концертке катышчу актёрлордун баары Кыргыз драма театрында иштешкендиктен, ал жакка бардык. Алдында боз үй тигилип туруптур, ээсинен уруксат алып, тартууга кириштик. Кадрды көбөйтүш үчүн ары жакта бакта отун кесип жаткан байкенин тракторуна чыга калып, жарма сатып жүргөн эженин идишин сурап, кыскасы, окшоштурганга аракет кылганбыз. Жыйынтыгында ушундай тамашалуу клип пайда болду. Тартылган актёрлор менен жанагы жарманы бөлүп ичип, үйгө тараганбыз.

Нуркыз Курманбек кызы
star@super.kg

 Кыстарылган видео