КАЙСЫ АЗЫКТЫ КӨП ЖЕСЕ, КАНДАЙ ООРУ ЖАРАЛАТ?

Адам үзгүлтүксүз тамактанып, өмүрүнө өмүр улайт. Бирок биз ашыкча жана туура эмес тамактануу менен жашообузду тобокелге салабыз. Анткени адамдардын 90 пайызы туура эмес тамактануунун айынан ооруларга кабылып, ошонун айынан көз жумат. Андыктан 4 миң жылдан ашык тарыхы бар тибет медицинасына кайрылып, кайсы азыкты үзбөй көп кабыл алуудан кайсы оору жараларын карап көрөлү.

ЧАКМАК КАНТ, КУМШЕКЕР

• Организмдеги кальций көп бөлүнүп чыгып кетет. Сөөк морт, бат сынма болот. Булчуңдар алсыз тартат.
• Ооз көңдөйүнүн, кулкундун, ашказандын, он эки эли ичегинин былжырында сезгенүү жаралат.
• Семирүү, алысты жакшы көрбөө, тиштин бузулушу, чириши келип чыгат.

ТУЗ

• Кан басымды көтөрөт.
• Буту-кол жакшы иштебей калышы мүмкүн.
• Организмден калий көп чыгып кетип, жүрөк жана булчуңдар алсызданат.
• Боордун циррозу менен ооругандарды шишик басат.
• Рак оорусун, астманы күчөтөт.

ТУЗДУУ ТАМАК

• Кан тамырлар серпилгичтигин жоготот, көздөн жаш агуу күтүлөт жана беттин өңү бузулат.
• Бронхит, астма оорусу күчөйт. Жөтөлүү жана муунуу айланы кетире баштайт. Ашказандын рагы келип чыгышы ыктымал.
• Туздалган балыкты көп кабыл алуудан кулак, мурун, тамак оорулары  жаралат.
• Ачуу тамакты көп колдонуудан тери кургак тартып, түлөй баштайт. Чач  акырындап түшө баштайт. Тырмак морт болуп, кабатталат.
• Кычкыл тамакты көп ичип-жегенден булчуңдар ооруйт, ооз, эрин жарылат.
• Мурчту кош бойлуу аял көп колдонсо, бойдон түшүү коркунучу бар. Ар кандай жаралар чыгат.

МАЙЛУУ ТАМАК

• Зат алмашуу бузулат,  атеросклероз, семирүү жаралат. Семирүүнүн аягы кант диабетине алып келет.
• Иммунитет төмөндөйт, магний организмден көп бөлүнүп чыгып, онкологиялык оору жаралат.
• Ашказан, ичеги, өт оорулары пайда болот. Ал эми өтүндө, бөйрөгүндө ташы барлардын оорусу күчөйт.
• Артрити барлардын муундары ооруп, шишийт.
• Кан басым көтөрүлөт, геморрой, варикоз оорусу күчөйт.
• Боорго күч келип, оорунун жаралышын шарттайт.

ЭТ

• Кызыл этти (малдын эти) көп жегенден кант диабетинин, бөйрөктө таштын, уйку безинин оорусунун (панкреатит) жаралуу коркунучу бар.
• Этти көп кууруп колдонуудан ичеги-ашказан жана кызыл өңгөч, кулкун оорусу келип чыгат.
• Этти көп колдонгон адам бат картаят.
• Майлуу эт – холестериндин булагы. Демек, инсультка кабылуу коркунучу бар.

ЧАЙ

• Чайда фтор көп болгондуктан, көп ичүүдөн тиштин өңү бузулат. Колдо, бутта, омурткада оорулар жаралат, муундардын формасы өзгөрөт.

ТАТТУУ
(Таттуу шоколад, пряник, шире, пирожное, торт ж.б.)

• Аялдарда эмчектин рагы жаралат.
• Клеткалар бат картаят, адамда шалдыроо күтүлөт. Чач түшүп, эрте ак баса баштайт.
• Кальций организмден көп чыгып, сөөк морт болот.
• Гастрит жаралат. Гастрити барлардын оорусун күчөтүп, жарага айлантат.
• Семиртет, мындан тышкары подагра, кант диабети, бөйрөк жана өттө таш пайда болот.

Канымжан Усупбекова
densooluk@super.kg