«Меломен» тобу:«КЫРГЫЗСТАНДА ЖҮРГӨНДӨ БОЙДОКПУЗ»

«О, махабат», «Абайла, сулуу кыз» деген ыр менен концертти ого бетер жандандырган «Меломен» тобу болду. Топтун жигиттерин окурмандар менен тааныштыруу иретинде кепке тарттык.

– Салам, жигиттер! Бек Борбиев уюштурган концертке кандайча келип калдыңар?
Жигер: – Салам! Учурда Кыргызстан менен Казакстандын өнөр адамдары алтын чынжыр менен байланып, ортодогу алакалар бекемделип жатат. Бек Борбиевдин ырларын Казакстанда да эргүү менен угабыз. Бизди ушундай таланттуу адам менен табыштырган Казакстанда белгилүү агабыз, «МузАрт» тобунун продюсери Алтынбек Корозбаев болду. Учурда Бек агабыздын «Казак кызына» деген ырын анын уруксаты менен алып, ырдап чыгууга даярданып жатабыз.

– Жигер, залдагы эл менен «таякелер» деп амандашканыңа караганда апаң кыргыз окшойт?..
– Ооба, апам кыргыз, Ысык-Көл облусунун Жети-Өгүз районунан болот. Мен Казакстанда төрөлгөнүм менен, балалыгым Жети-Өгүздө өткөн. Алты жылдай Көлдө жашап, Казакстанга барганда казак тилин унутуп да калган элем, араң үйрөнгөм кайра (күлүп).

– Топко кандайча чогулуп калдыңар?
Ролан: – Төртөөбүз тең Алматыдагы Республикалык эстрада-цирк колледжинде окучубуз. Ошол окуу жайдан дос болдук, чогуу ырдадык, бири-бирибиздин үнүбүз, мамилебиз төп келишти. Ошентип 2009-жылы топ болуп куралдык.
Ж.: – Негизи, биз топ болуп түзүлө электе, 2007-жылы алгачкы ырыбызга аранжировка жасатканы Бишкекке келгенбиз. Мырза деген агабыз мыкты аранжировка жасаган эле. Анда баарыбыз «Ырчы болсок, чоң сахнага чыксак» деп тилек кылып, кыялданып турган кезибиз. Мындайча айтканда, топтун эң алгачкы кадамы дал ушул Бишкектен башталган.

– Келишимдин негизинде ырдайсыңарбы?
Ж.: – Топ түзүлгөндөн баштап эле бизге колдоо көрсөтүп келген Жанна Абулова деген продюсерибиз бар.
Габит: – Ал айым менен расмий келишим жок болсо да, эже катары колдоосун көрсөтүп турат. Ортобузда сый мамиле бар.

– Кыргызстан менен Казакстандын шоу-бизнесинин ортосундагы айырмачылыктар байкалдыбы?
Р.: – Эч кандай деле айырмачылык жок экен. Тамак-ашы, меймандостугу дал эле биздикиндей. Макалдарыбыз, азил-тамашалар да окшош. Сахнасында да, көрүүчүлөрүндө да эч бир айырмачылык жок. «Кыргыз-казак бир тууган» деген кепке эми анык ынандым.
Ж.: – Кыргыз музыкасы менен казак музыкасынын кайрыктары абдан окшош. Өзүңөр билгендей, силердин көпчүлүк ырларыңар казакча аткарылып хит болуп жатат. Негизи, бири-бирибиздин ырларыбызды которуп ырдоонун түбүндө чыгармачылык, достук карым-катыш жатат.
Р.: – Которуп ырдап жатканыбыздын себеби, каныбыз бир эмеспи, ошон үчүн да музыкага болгон табитибиз бир. Чыгармачылык алмашуу сөзсүз болуп турушу керек.

– Кыргыз кыздары жактыбы?
Г.: – Ооба, аябай жакты. Биздин казак кыздарына аябай окшош экен, казакпы деп да ойлоп, ажырата албайсың. Мисалы, Өзбекстанга барсаң, өң-келбетинен айырмаланып турат эмеспи, каштары биригип, жаактарынын формасы башкача болуп дегендей...
Ж.: – Мен өзүмдүн апамды эле үлгү келтирсем болот. Казак кыздарындагы сулуулук, кичипейилдиктин баарын биз кыргыз кыздарынан көрөбүз. Себеби тарбиябыз, динибиз, түбүбүз бир. Тилибизде гана бир аз айырмачылык болбосо, калганын түшүнөбүз.

– Учурда жүрөгүңөр бошпу?
Ж.: – Кыргызстандабы? Ооба, бош (күлүп).
Кайрат: – Мен деле ошентип айта алам.
Р.: – Жүрөгүмдөн орун тапчулар болсо бош эле.
Г.: – Бойдокмун, ээ... (күлүп)

– Кыргыз кызына баш кошуп калышыңар мүмкүнбү?
Баары: – Абден мүмкүн!

– Кандайча, интернеттеги маалыматтарга караганда, көпчүлүгүңөр үй-бүлөлүү экенсиңер го?
Р.: – Хе-хе, жо-ок, биз Кыргызстанда деп жатабыз. Чынында, ооба, Жигер, Кайрат, мен үй-бүлөлүүбүз. Габит эле бойдок.

Лунара Бекиева
Адилет Бектуров
star@super.kg

 Кыстарылган видео