НУРБЕК КЕНЕБАЕВ, сатуучу: «СУПЕР-ИНФО» ЖАШООМДУ ӨЗГӨРТТҮ»
Окурмандар бизге көп кайрылышат, арыз-муңун, оор тагдырын же бактылуу турмушу, ийгилигинин сыры менен бөлүшүп. Бул да болсо элдин ишеними. Маселеси чечилип, үнү жетпей жаткан жакка жетип, адилеттик тапканына сүйүнүп бизге рахмат айткан окурмандарыбыздын кубанычына тең ортоктош болуп келебиз. Ошондон улам биздин гезит менен байланыштуу жашоосун жакшы нукка бурган баян, ырлар-сырларга кат куржунубузду кенен ачканбыз. Эмесе, алгачкы каарманыбыздын баянына орун берели.
«УУЛУМ «СУПЕР-ИНФО» САТЫП БИЗДИ БАГЫП ЖАТАТ»
Нурбек Кенебаев 1983-жылы Ат-Башыда туулган. 7 айлык болуп төрөлүп, ден соолугу начар болгондуктан, ата-энеси азап менен чоңойтушат. Уулу тууралуу Кубат ага мындайча баяндайт:
– Тун балабыз да, көзүн карап, эптеп аман чоңойтуп алсак экен деп тилеп жүрүп өстүрдүк. Мектепке эки ирет алып бардык, өздөштүрө албады окшойт, барбай койду. Ооруп-сыктап, апасы экөөбүздү санаага салып жүргөндө «Качан чоңоюп бизди сүйүнтөт?» дечүбүз. Кудайга шүгүр, азыр «Супер-Инфо» сатып бизди багып жатат. Гезит саткандан башка иш кылып көргөн эмес. Кичинесинен эле ушинтип соода-сатык кыла баштаган.
1995-жылга чейин апасы май токоч жасап, семичке кууруп берип базарга саттырчу. Ал кезде акча санаганды билчү эмес, 1 сомду көрсөтүп «ушундайга 1 май токоч бересиң, тыйынга алданып калба» деп жөнөтчүбүз. Айтканыбыздай эле кечинде жалаң 1 сомдуктарды алып келчү. Кардарлар чоңураак акча берсе «мындайдын кереги жок, 1 сомдук, момундай кагаз берсеңер, анан берем» деп аларга сатпай койчу экен. Кийин чоңураак купюра алып, ага жараша кайрып бергенди үйрөндү.
«Супер-Инфо» жарыкка чыгып, эл арасына тарай баштагандан тарта сатып келет. «Башка гезиттерден да кошуп албайсыңбы?» десек, «өтпөй калат» деп аларды сатуудан баш тартат. Банктан насыя алып, үйүбүздүн шамал алып кеткен чатырын жаап, ичи-сыртын шыбаган элек. Учурда Нурбек карызды жапканга салым кошууда. Ай сайын насыянын пайызын чыгарып берип жатат, ыраазыбыз.
«СУПЕРИН» КОЛТУКТАП ЫРДАП АЛАТ»
«Супер-Инфо» жарыкка чыккандан баштап гезит сатып иштеген кызматташ каарманыбыз Ат-Башы айылындагы окурмандарыбыздын 90 пайызын кардар кылып алганга жетишиптир. Апасы Бурулкүл эже да ой бөлүштү.
– Балам ара төрөлүп, атасы айткандай, чоңойгуча бир топ эле кыйнады. Уулум 2-топтогу майып экенине карабай үй-бүлөбүздү багат. Акчасын келип санап берет. Келинибиз үй оокаттарын кылат, уулум болсо жума күндөн тарта эле «Суперин» колтуктап базарда ырдап кыдырып кардар чогултат. Ага «бизди бак, үйдүн улуусусуң» деген деле эч ким жок. Өзү эле тырмышып, өкмөт берген 3700 сом пенсиясын карап отура бербей үй-бүлө бакканына шүгүр дейбиз. Нурель аттуу 4 жашар неберебиз бар.
«ГЕЗИТТИН ЧОҢУНА ЖОЛУККУМ КЕЛЕТ»
Нурбек сүйүктүү жумушу тууралуу мындай дейт:
– Турусбек деген байке менен таанышып, ал мени «Супер-Инфо» сатканга жумушка чакырган. Азыр өз атым өчүп, баары «Супер-Инфо, кел бери, гезитиңен таштай кет» деп чакырып калышкан. Мен дайыма базардагы элдин көңүлүн көтөрүп ырдап жүрөм. «Ат-Башым», «Супер-Инфооо!» деп кыйкырып ырдап сатам. Бир орунда турбайм, базарды бүт кыдырам. Гезит чыккан күнү баары мени кадимкидей күтүшөт. Соода кылган эжелер «абдан кызыктуу гезит» деп баалашат. Алардын кызыгуу менен окуп жатканын көрүп менин да окугум келет. Бирок мен тамга тааныбайм да. Кээде бош отуруп калышса, мага окуп беришет. Үйдөн апам менен атам окуп, маалыматтарды айтышат. Тамга тааныбасам да, эсепти билем. Акчасын алып, кайтарымын бере алам.
Жумасына 3000-3500 сомдой киреше табам. Мен бирөөдөн жалдырап жардам сурабайм. Азыр кимге ким жардам бермек эле? Тилегеним эле «Супер-Инфо» дайыма чыгып турса экен, окурманды маалыматка сугарып, мага окшогон элдин бир керегине жарап жүрө берсе экен. Себеби менин жападан жалгыз тапкан кирешем – «Супер-Инфону» сатуудан түшкөн акча. Мунун арты менен үйлөндүм, атам салган үйдүн маңдайына бир бөлмөлүү үй тургузуп алгам. Дагы бир тилегим, гезиттин чоңуна жолуккум келет. Рахмат сага, «Супер-Инфо»!
Арабызда алты саны аман туруп бир бөлмөлүү үй курмак тургай бир тал куурай сайып койбогон адамдар бар. Аларга салыштырмалуу каарманыбыздын ден соолугунун мүмкүнчүлүгү чектелүү болсо да, үй-бүлөсүн, ата-энесин багып келет.
Гүлжан Асанкожоева
koom@super.kg
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (42)
Тобо, "Супер-Инфо" сатуучуларына чейин велосипед алып берсе, озуно эмне калат.Кызматкерлерине кайсы акчасын берет? Тескерисинче, сатуучулар суйунсун ушундай кызыктуу гезит чыгып жатканына. Менимче эки тарап тен пайда таап жатышат.
Нурбек учун аябай кубандым. ак эмгеги, мандай тер менен тапкан акчасы мындан ары да коп-коп болушуна тилектешмин.
ишине ийгилик тилеген тилектеринизге жетин
Нурбектин тапканына кудай барака берсин супер инфого ийгилик
ээ Нурбек братан тузуксун ээ не болсода
нурбек байке ишинизге ийгилик АЛЛАХЫМ сиздин ден соолугунузду бекем кылсын бар болунуз
:) ден соолугу бекем болсун.
суперинфонун чонуна качан жолуктурасынар бул жигитти эми???...жылда откозгон концертинерге конок кылып чакырып сыйлык берип койсонор болмок,2 грпу майып болсо,жардамынарды аябагыла супер пуперлер!!!!
ден соолугу бекем болуп,уй булоосу менен аман-эсен болсун!!!
Нурбек бактылуу бол уй булон менен! Ишине ийгилик! Сага ден соолук берсин! Эч качан ооруба! Ошондой эле супер инфонун жаматына дагы чон рахмат! Мен дагы Ар дайым окуп келем! Жада калса жолдошуп сурайт бугун эмне жанылык Кыргызстанда деп! Жолдошума окуп дагы берем!
Azamatsyz nurbek brat iwinizge iygilik ui bulonuzgo bakyt ozunuzgo den soluuk e4 ka4an ozunuzdu kaigyga aldyrbai yrdap juro beriniz Allahym daiyma sizdi koldosun super info ki4ine pren9 berip koisonuzdar bolgudai eken
Мен да ыйлагым келип кетти. Аллах ыраазы болсун. Супер Инфо Сулууларга берген белегин, Аллах ыраазычылыгы учун ушундайларга берсенер жакшы болмок экен. Ишинер да онугот сооп да болот дегендей.
Мен кичине кезимден бери коруп келатам бул байкени. Оз колунан бир топ газеталардыда алганмын. Гезитке чыкканын коруп суйунуп атам. Супер инфо жакшы кылыпсынар чыгарып
