Жанар Акаев, «Жылдын ТВ персонасы» наамына талапкер:«ЧЫНЫГЫ СҮЙҮҮ ҮЙ-БҮЛӨ КУРГАНДАН КИЙИН КЕЛЕТ»

Өзү айткандай, «универсал журналист», «Супер-Инфо» гезитинин тандоосу боюнча «2010-2011-жылдардын ТВ персонасы» Жанар Акаев жакындан бери «Ыңгайсыз суроолорду» алып барууда. Ал эми ушул жылдын май айында Жанардын уулдуу болгонун сүйүнчүлөгөнбүз. Жанар мырзанын жаңы алган өргөөсүндө жубайы Жыргал үчөөбүз жылуу маектешип, жаш үй-бүлө тууралуу көптөгөн кызыктарды билдик.

– Кандайсыңар, уулуңар Айкөл торолуп калыптыр, кылыктары менен силерди кубантып жатса керек?
Жанар: – Жакшы, өзүңөр көргөндөй, Жыргал экөөбүз кечке Айкөлдү эрмектейбиз. Айкөл 5 айдан ашып, отуруп, күлүп калды.
Жыргал: – Ишемби, жекшемби күндөрү уулубуз атасы менен кайрадан таанышып чыгат. Себеби иш күндөрү көрбөй, унутуп калат да.

– Жанар, уулуңа бийлеп-ырдап берет экенсиң, интернеттен көрүп калдым эле...
Жанар: – Ооба, уулума бөлүп-бөлүп концерт коюп турам. Эртең мененкиси «Таңкы шоу» деп аталат. Майкачан, шляпаны башка бастырып туруп Майкл Жексонду, Атай Өмүрзаковду туурап бийлейм. Мирбек Атабековдун ырларын ырдайм. Айкөл карап жата берет, Жыргал боору эзилгенче каткырып, кол чабат. Экөөнүн маанайын көтөрүп коюп, анан жумушка жөнөйм.

– Жыргал, Айкөл төрөлгөндөгү Жанардын эмоциясын сүрөттөп бере аласыңбы?
Жыргал: – Жанар төрөткө катышкан. Чынын айтсам, толгоо учурунда кыйналып, эмоциясын байкабай деле калыптырмын. Бала төрөлгөндөн кийин өзүнөн-өзү эле көз жашым куюлуп кетти, бакыттын көз жашы деп коёт го. Бир карасам Жанар туугандарга сүйүнчүлөп чалып жатыптыр. Жакында эле «Ошондо сен эмне кылдың эле?» деп сурасам, «сага көрсөтпөй ыйлагам» деп жатпайбы.
Жанар: – Төрөттүн ошондой кыйын болорун такыр элестеткен эмесмин. Адамдын өмүрү ошон үчүн баалуу экенин сездим. Ошон үчүн эне ыйык, барктуу экенин, ага арналып толтура ырлар жазыларын түшүндүм.
Жыргал: – Эркек кишинин төрөткө катышканы жакшы деп ойлойм. Ансыз деле биздин коомдо эркектер үстөмдүк кылышат. Эгер катышса, балким, аялдарга болгон катаалдык жумшарат беле дейм. Кандайдыр бир аёо сезими пайда болуп, оюн өзгөрткөнгө жардам берет.
Жанар: – Жаш аталарга төрөткө катышып, келинчегиңердин түйшүгүн чогуу тарткыла деп кеңеш берет элем. Андан силер «подкаблучник» болуп кетпейсиңер. Бизде, тескерисинче, балалуу болсо досторун чакырып жууп, ичимдик ичмей майрамы башталат, келинчеги төрөп кыйналып жатканы менен иши жок.

– «Сүйүү балага өтүп кетет» дешет, иш жүзүндө кандай экен?
Жанар: – Ал сөзгө кошулбайм. Мен үчүн Жыргалдын өз орду бар, Айкөлдүкү башка дегендей. Жумушта кармалып калсам эле жубайым тынчсызданып чала баштайт. Жыргал бир жакка кетсе, дароо СМС жазам. Жумушта отурганда да интернеттен кабарлашып турабыз. Үйлөнгөнгө чейинки кыз-жигит мамилеси мындай эле симпатия экен, чыныгы сүйүү үй-бүлө кургандан кийин келерине ынандым.
Жыргал: – Биз алдын ала сүйлөшүп алганбыз, балдарыбызга болгон сүйүүбүз башка, экөөбүздүн сүйүүбүз ошол бойдон калат деп (күлүп). Бала сүйүүнүн күчөшүнө жардам берет, ата-энесин жакындатат экен. Жанар камкор ата, мени уктап алсын деп өзү таңкы беште конок бөлмөдө Айкөлдү көтөрүп жүрөт. Ичимден аябай ыраазы болуп калам.

– Жыргал, шашма, шайыр бул жигит колуңду сураганда да оригиналдуу идея тапса керек?
Жыргал: – Жанар романтик эмес. Прагага 3 айга иштеп кеткенде интернеттен үйлөнүү тууралуу сөз учугун чыгара баштаган. Алыста жүргөндө адамдын баркы билинет окшойт да (күлүп). Ушул боюнча кызыктуу окуя айтып берейин.
Бир жолу туура эмес дары ичип алыптыр. Менин ата-энем дарыгер да, апама чалып «кесиптешим туура эмес дары ичип алыптыр» десем, апам дарынын атын сурап калды. Анда трубканы Жанар колумдан алып, «Бермет эже, саламатсызбы, дарыны көп өлчөмдө ичип алыпмын. Сиз билесизби, сиздин кызыңыз мага жагат, сонун кыз го, үйлөнүп алсак болобу?» деп жатпайбы. Апам эмне дээрин билбей, күлүп трубканы коюп койгон. Ошентип апам менен таанышкан.
Жанар: – Интернеттен «үйлөнбөсөк болбойт окшойт» деп колун сурагам. Анткени аябай жүдөп кеттим, Жыргалсыз жүргөн кызыксыздай туюлду. Азыр деле экөөбүз дайым биргебиз. Эс алуу күндөрү термоско чай демдеп, жумуртка бышырып, Айкөлдү көтөрүп алып тоого, балык уулаганга чыгып кете беребиз.

– Казан-аяк кагышканда ким биринчи компромисске барат?
Жыргал: – Мен аябай токтоомун, оңой менен эмоцияга алдырбайм. Жанар тез жинденет, бирок бат тарайт, анан тез эле унутуп калат. Бул чыгармачыл адам да, баарын чыгарып туруш керек (күлүп). Компромисске Жанар биринчи барат.
Жанар: – Казан-аяк кагышпайт дегендер, менимче, калп айтышат болуш керек. Ар бир үйдө кагышат, кагышпаса, анда абал жаман. Бул бири-бирине кайдигер экенинен кабар берет. Биздин үйдөгү казан-аяктын кагышынын 90 пайызы менин айымдан болот. Болбогон нерсеге эле ачуулана берем. Экөөбүз уруша турган жөндүү деле себеп жок, майда-чүйдө нерселерден эле башталып кетет. Бирок менин жиним 3 мүнөттүк эле.

– Кимиңер кызганчааксыңар? Бири-бириңерди атайын кызганткан учурлар болгонбу?
Жыргал: – Жанар кыз-жигит болуп жүргөндө аябай кызганчаак болчу, үйлөнгөндөн кийин орду менен кызганып калды. Мен кызгансам да, билдирбегенге аракет кылам. Ии, Жанар, баягыны айтып салайынбы?
Жанар: – Кайсыны?
Жыргал: – Экөөбүз сүйлөшүп жүргөндөчү...
Жанар: – Дискотекага барып, сенин көзүңчө башка кыздар менен бийлеп, таанышканымдыбы?
Жыргал: – Ооба, атайын кылгансың, ээ, ошону...
Жанар: – Эми ал жаш кез да, азыр такыр башкачамын.

– Окуянын аягына кызыгып калдым. Жыргал, уруш чыгардыңбы анан?
Жыргал: – Күйөөгө тием деген кыз эч качан жигитинин алдында эмоцияга алдырбашы керек. Уруштун арты түгөнбөйт деп коёт, башталса аны жакшы нерсе менен бүтүрүү кыйын. Ал учурда мен унчукпай кутулгам. Бир чети адамдык сапатыңды, өз бааңды сактап каласың, экинчиден, алардан бийик турарыңды далилдейсиң. Никени сактап калуу эмгекти талап кылат, биздикилер жөн гана эмгектенгиси келишпейт, ага караганда түйшүгүн бирөөгө оодарып, бирөөнү күнөөлүү кылуу жеңил.
Жанар: – Көп учурда Жыргал уруштан баш тартып коёт, урушайын десең да болбой (күлүп). Ушунун мүнөзүнө көнүп алыпмын. Экөөбүз урушсак, эсеп 1:1 боюнча эле калат. Эч кимибиз жеңип же жеңилбейбиз.

– Жанар, быйыл «Жылдын ТВ персонасы» наамына талапкер болдуң, бирок социалдык тармактагы жеке баракчаңа кесиптешиң Элиза Кененбаевага добуш бергиле деп үгүттөп жатасың. Муну кесиптештик тилектештик деп түшүнүүгө болобу?
Жанар: – Конок тосуучу бөлмөмдүн төрүндө силерден алган эки статуэткам жарашып турат. Үчүнчүсүнө орун жок дебейинби (күлүп), тамаша! Чынында, «Жылдын ТВ персонасы» дегенге мен быйыл кичине кирбей калам го деп жатам, анткени «Ыңгайсыз суроолорду» алып барганыма аз эле болду. Элиза быйыл жакшы эмгектенди, Жыргал да Элизага добуш берди.
Жыргал: – Биздин үй-бүлө ошондой чечим чыгарды. Эгер Элиза алып калса, барып куттуктап, сүйүнүчүн тең бөлүшүп келмекпиз.

– Маегиңерге чоң рахмат!

Лунара Бекиева
star@super.kg

 Кыстарылган видео