АЯЛДЫ «КЫЗГА» АЙЛАНДЫРУУЧУ КӨНҮГҮҮЛӨР

Интимдик булчуңдарды чыңдоо ыкмалары байыркы кезде эле Кытай, Японияда белгилүү болгон. Бул тууралуу «Камасутрада» да айтылат. Заманбап жашоодо жыныс мүчөлөрүн машыктыруу жаатында көптөгөн ыкмалар бар. Мындай ыкмалар эмне үчүн керек? Ушул жаатта сөз кылабыз.

ЖЫНЫС КЫНЫНЫН КЕҢЕЙИШИ КАНДАЙ КӨЙГӨЙЛӨРГӨ АЛЫП КЕЛЕТ?
Аялдар төрөгөндөн кийин жыныс кынынын канчалык бир деңгээлде кеңейип калары баарына маалым. Ал эми аял улам-улам төрөсөчү? Аял жыныс кынынын кичирейип, ордуна келүүсүнө убагында кам көрбөсө, анда бара-бара бир топ көйгөйлөр жаралат. Мисалы, кийинчерээк жатындын ылдый түшүшү күтүлөт. Жатын ылдый түшсө, анда табарсыкты басып калып, аялда тез-тез заара кылуу, катуу күлгөндө же чүчкүргөндө заара ушатуу кездеше баштайт. Табарсыкта да өзгөрүүлөр жүрөт. Жыныстык органдар сезгенип, ооруга кабылат. Акырында кээ бир аялдар заара сасыбайын деп үйүнөн чыга албай калышат.
Ошол эле кезде жыныс кынынын кең болуп калышы интимдик жашоого да терс таасир тийгизет. Жан шериги төшөк катнашынан ырахат ала албай, аны башкалардан издей башташы мүмкүн. Жыныс кынынын кеңейиши – жыныстык мүчөлөрдүн булчуңдарынын бошоң тартып башташынан келип чыгат. Жыныстык булчуңдар менен көтөн чучуктун булчуңдары да туташ болгондуктан, булчуңдар бошосо, акырындап көтөн чучук да түшө баштаарын (геморрой) көпчүлүк биле бербейт.

МАСЕЛЕНИ КАНТИП ЧЕЧСЕ БОЛОТ?
Учурда пластикалык операция жасатып, жыныс кынын кичирейтип алууга болот. Ал эми жогоруда айтылган көйгөйлөрдүн алдын алып, үйдө отуруп жыныс кынын кичирейтип алууга болобу? Болот, бул жаатында вумбилдинг бар.
Вумбилдинг (имбилдинг, «Вагитон» системи) – жука чурайдагы булчуңдарды көнүгүүлөр, жумуртка формасындагы нефрит таштары, атайын шариктер, машыктыруучу аппараттар жана башкалар менен чыңоо. Бул жогоруда айтылган заара чыгаруучу каналдын жана жыныс мүчөлөрүнүн, көтөн чучуктун ооруларынын алдын алууга багытталган. Ошондой эле аялдын интимдик жашоосунун ойдогудай болуусун көздөйт. Машыккан аялдын жыныс кыны кичирейип, кыздыкындай болуп калат да, эркекке ырахат тартуулайт.
Кош бойлуу аялдар булчуңдарын чыңап алса, төрөт да жеңил өтөт. Андыктан төрөткө чейин жана төрөттөн соң сөзсүз машыгуу зарыл. Чыгыш колдонмолорунда жыныс мүчөнү чыңоону кыз кезден билүү жана көнүгүүлөрдү жасоо, ал эми калган ыкмаларды турмушка чыккандан баштап колдонуу керектиги айтылат.

КӨНҮГҮҮЛӨР
Алгач жыныс булчуңдары канчалык алсыз экендигин тактоо керек. Ал үчүн дааратканага барганда заараңызды токтотуп калууга аракеттениңиз. Эгер убагында токтото албай же аздап чыгып кетсе, анда булчуңдар абдан бош болуп калган.
Же болбосо колуңузду таза жууп, ортончу манжаңызды жыныс кыныңызга салып, эми булчуңдардын жардамы менен кысып көрүңүз. Кыса албасаңыз же бошоң кысылса, демек, көнүгүүлөрдү жасап, машыгуу зарыл.

1-көнүгүү
А) Жука чурайдын булчуңдарын кысып, 10 секунд кармап, кайра бошотуңуз. Буга 5 мүнөт убакыт бөлүнөт.
Б) Бат кысуу, бат бошотуу. Ар бирине 1 секунддан убакыт кетет. Бул көнүгүүлөргө 5 мүнөт сарптайсыз.
В) Адегенде 20 секунд кармап, кайра бат бошотуу. Анан 30 секунд кармап, кайра бат бошотуу. Машыгуу мөөнөтү 5 мүнөт.

2-көнүгүү
Буттарды эки жакка ачып, колду бөйрөккө алып туруу керек. Анан тизелерди эки жакка жиберип, акырындап болушунча ылдый отурууга аракет кылуу кажет. Ушул абалда 15 секунд кармалып, акырындап өйдө көтөрүлүү зарыл.
Муну бош убакыт болгондо эле 7-10 иреттен кайталай берүү туура.

3-көнүгүү
Адегенде булчуңдарды кичине кысып, 3-4 секунд кармаңыз. Эми орточо кысып, дагы 3-4 секунд кармаңыз. Кийинкисинде катуураак, андан кийин өтө катуу кысыңыз.
Эми булчуңдарды бошотууга кезек келди. Аз-аздан бошотуп отуруп, акырында эс аласыз да, анан кайрадан баштайсыз. Бул үчүн да 5 мүнөт бөлүү кажет.

Эскертүү! Биринчи жана үчүнчү көнүгүүнү күнүнө 3 маал кайталоо сунушталат. Жакшы жыйынтыкка жеттим деген мөөнөткө чейин талыкпай эмгектенүү кажет. Жакшы жагы – көнүгүүлөрдү телевизор көрүп отуруп же автобуста кетип баратып, тамак жасап жатып, аялдамада унаа күтүп турганда, кыскасы, ыңгайлуу учур болсо эле жасай берүүгө болот.

КӨНҮГҮҮЛӨР КОМПЛЕКСИ

1. Тегиз, түз жерге жатып, бир бутту көтөрүп, тизени бүгүү. Анан муну экинчи бутка кайталоо.
2. Буттарды өйдө көтөрүп, велосипед тепкендей кыймылдатуу.
3. Эки бутту көтөрүп, тизеден бүгүп, бир аз кармап, кайра түшүрүү.
4. Эки бутту өйдө көтөрүп, кайра түшүрүү.
5. Эки бутту жантайыңкы абалда өйдө сунуу, түшүрүү.
6. Эки бутту алмак-салмак өйдө көтөрүп, түшүрүү.
7. Тизени бүгүп, чыканакка таянып, жамбашты өйдө көтөрүү.
8. Түз жатып, жамбашты бирде оңго, бирде солго которуу.
9. Тизени бүгүп, бутту эки жакка ачып, кайра бириктирүү.
10. Чыканактап жатып, бутту түз сунуу. Анан чогуу өйдө көтөрүү, түшүрүү.

Эскертүү! Ар бир көнүгүү 6-8 иреттен кайталанат.

Канымжан Усупбекова
kenesh@super.kg