«МАШИНАМДЫ ТАЛКАЛАГАН МАИчилер КОЛУҢДАН КЕЛГЕНИН КЫЛ ДЕП ЖАТЫШАТ»

Аргасыз таң каласың! Жол көзөмөлдөө кызматкери «жол эрежесин бузду» деп өзү токтоткон автоунааны ээси жокто айдап жол кырсыгына кабылган. Бирок МАИчи айым «бир аз чийилген эле» деп ийин куушурууда. Бул кокустукпу же МАИчилердин чектен чыкканыбы?

Табалды Мадраимов, жабырлануучу:«ҮНДҮГҮҢҮЗДҮ АЛЫҢЫЗ, МАИчилер БЕРИП ЖИБЕРДИ»
–2013-жыл­­дын 21-декабры эле. 3 киши болуп базардан үндүк алып менин машинамда келе жатканбыз. Гүлчө шаарынын борбордук базарына келгенде жол көзөмөлдөө кызматынан бир сержант кыз токтотту. Келип «Ичтиңизби?» деди. «Жок» дедим. «Үйлөңүз!» деди эле, үйлөсөм таза чыкты. Анан документ сурады. Үйдөгү кийимим менен чыгып келе бериптирмин, машинанын документтери костюмумдун чөнтөгүндө калган. Аны айтсам айнек ачык турган эле, колун салып ачкычты жулуп алды. Артынан үчөөбүз тең ээрчип алып: «Кечирип кой, кызым, үйдөн алып келе калалы»,- дегенибизге карабай, сөзүбүздү укмаксан болуп ары-бери басып жүрдү. Базардан үйгө барып документтерди алып келгенче бир сааттан ашык убакыт өттү.
Келсем машинам турат, бирок мени токтоткон Зарина Камбарова жок экен. Аны бир топ күтүп турдум. Келбеген соң таап келейин деп издесем жок экен. Малдарга чөп салып, анан чыгайын деп үйгө келсем, таксист кошунам чакырып, «үндүгүңүздү алыңыз, МАИчилер берип жиберди. Машинаңызды унаа токтотуучу жайдан алып алат экенсиз» деп үндүк менен чогуу бир кагаз берди. Кагазга «Зарина» деп телефон номерин жазып коюптур. Коңшум кайра баратса, Ленин көчөсүндөгү бозокананын жанында менин машинам менен бир тергөөчүнүн машинасы сүзүшүп калыптыр. Аңгыча Оштон келаткан аялым чалып: «Тынчсыңарбы? Машина МАИнин астында авария болгон абалда турат го»,- деп калды. Барсам машинамдын арты былчыйып, капталы алдыңкы эшикке чейин чийилип кетиптир. Жыйырмага жакын милиция, ЖКК кызматкерлери бар экен. Мени тегеректеп «эки миң сомго эле оңдотуп аласың» десе, дагы бирөөсү «эч жерде оңдоп бер деген мыйзам жок, каякка барсаң ошол жакка бар» дейт. «Зарина, мен сага машинаны жакшынакай абалда тапшыргам. Кандай тапшырсам, сен да мага ошондой абалда тапшыр!» деп кетип калдым.

«КЫЗДАРЫМ БЕЛЕККЕ БЕРИШКЕН, АЯП МИНЧҮМҮН»
– Машинаны бир жарым жыл мурун кыздарым маңдай тери менен иштеп жүрүп 8500 долларга алып беришкен эле. Кыздарымдан мага кымбат белек болгондуктан аяп минчүмүн. Заринага күндө телефон чалам, 2-3 күндөн кийин алды. «Машинаңызды оңдотуп жатам, алып барып берем» деди. Шарап, мөмө-жемиш, таттууларын алып үйгө келиптир.»Машинаны сатасыңбы, өзүң минесиңби, эмне кылсаң ошол кыл. Мага өзүндөй машина алып бер же акчасын бер. Сага ишенбей калдым, тил кат жазып бер» десем жазып берди. Көз айнегим жок окуй албадым, анан «келиңиз, мен окуп берейин» деп алды да, «мен машинаңызды жаңы алып берем же акчасын берем» деп окуду. Кийин билсем «оңдоп алып келип берем» деп жазган экен. Зарина дайынсыз жоголуп кеткендиктен, жолугалы деп кызым экөөбүз РИИБге барсак жок экен, күтсөк келбеди. Анан прокуратурага арыз жаздык. Кызым Ошко кетти. Биз эмне кылганыбызды, кызым кайсы такси менен Ошко кеткенин милиция кызматкерлери толук Заринага айтып турган экен.

«КӨЧӨГӨ ЧЫГЫШЫҢДЫ ОЙЛО ДЕП КОРКУТУШТУ»
– Кечинде сыналгы көрүп отургам, неберем: «Таята, машинаңызды дарбазадан киргизип жатышат»,- деп чуркап кирди. Чыксам машинаны киргизип коюшуптур. Бир топ адамдар жана Зарина Камбарова болуп келишти. Машинанын бардык жагына боёктон чаптап алып келишиптир. «Эптеп оңдоп келип, «ме ал» дегениң эмнең? Албайм, алып кет»,- деп ачууландым. Такыр көнүшпөйт, машинасына отуруп жөнөйүн деп калды эле, астынан тосуп туруп алдым. Тажаганынан машинаны айдап чыгышты да, «көрөм сени, ушул жерде жашаганыңды. Эртең көчөгө чыгышыңды ойло» деп кетип калышты. Биз жазган арызды эч ким карабай жатат. Райондук ИИБге барсак жетекчиси 3 орун басарын жанына отургузуп алып, «машинаны да, жазган арызыңды да аласың. Албасаң колуңдан келгенин кылып ал. Алсаң ушул машина, үстүнө 500 доллар кошуп берем» дейт. Арызыбыз эмнеге каралбай жатат деп прокуратурага кайрылсак, алар ар шылтоону айтып жатышат.

«ЖАҢЫ АЛЫП БЕРҮҮ МЫЙЗАМДА ЖОК»
Бул боюнча окуянын каарманы болгон ЗАРИНА КАМБАРОВАга кызмат өтөп жаткан убагында жолуксак, Алай РИИБинин жетекчисинин уруксаты менен гана маалымат берерин айтты. РИИБге барып жетекчилигинен уруксат алган соң гана төмөнкүлөрдү билдирди:
– 2013-жылдын 21-декабрь күнү Нар­матов көчөсүндө жайгашкан базардын жанында кызматымды өтөп жаткан учурда тыюу салынган бир тараптуу жолдон Ниссан Примера унаасы баш бербей өтүп бара жатканынан токтоттум. Барып үйлөтсөм бир аз ичимдик жыттангандай болду.Документ сурасам «калып калыптыр»деди. Өздүгү такталбаган кишини мен коё бере албайм да. Сылык мамиледе эле машинанын ачкычын сурадым. «Кызым, кармап тур, мен барып алып келе калайын» деп колума ачкычын карматып кеткен боюнча келген жок. Ал киши эч кандай мага бир саат жалдыраган эмес. Келбегенинен улам жумушчу топ чакырып, машинага кароо жүргүздүм да, акт түзүп аны айып аянтчасына алып барайын десем, документтерим ишканада калып калыптыр. Алып алайын деп Ленин көчөсүндө баратып, жолдун тайгактыгынан улам жол четинде турган Хонда Фит үлгүсүндөгү унаанын четине тийип өттүм. Машина чийилип гана калды. Мен оңдотуп бермек болгом, жаңы алып берем деген эмесмин. Ал нерсе мыйзамда да жок. Оңдотуп, 500 доллар материалдык чыгым төлөйүн дегениме көнбөй жатат.

Уулбү Каныбекова
koom@super.kg