КЫЗДАР КАНЧА ЖАШЫНДА ӨСҮП ЖЕТИЛЕТ?
– Биз, 9-класста окуган курбулар кыздардын жыныстык өсүп жетилүү мезгили тууралуу билгибиз келет. Бул кезде организмде кандай өзгөрүүлөр жүрөт? Кандай кеңештерди эске алуубуз зарыл? Альбина, Гүлира, Мадина, Зуля, Талас.
– Жыныстык жактан өсүп жетилүү кыздарда эркек балдарга караганда эрте жүрөт. Кыздарда бул 10-15, балдарда 12-19 жашка туура келет.
- Бул мезгилдерде бой жылына 10 сантиметрге чейин өсөт. Сөөктөр ар түрдүүчө ылдамдык менен чоңоё баштайт. Мисалы, кол манжалар менен таман, бет сөөк бат өссө, дене акыркы кезекте өсөт. Ошондуктан, кыздар-балдардын колу-буту, жаагы узун көрүнөт.
- Кыздарда булчуңдардан көкүрөк, жамбаш, курсак булчуңдары башка булчуңдарга караганда ылдамыраак чоңоёт.
- Эмчек болжолдуу түрдө 10 жашта өсө баштап, 16 жаштарда аяктайт. Колтукта, бутта түктөр байкала баштайт. Эскерте кетүүчү нерсе, түктөрдү кырбоо керек. Себеби, кырган сайын түктөр коюуланып, катуу болуп өсөт.
- Этек кир келет.
- Тери алдындагы май бездеринин өзгөрүүсүнөн улам бетте безеткилер чыгат. Бетте «өлүм үч бурчтугу» деген бөлүк жайгашкан. Андагы веналар баш мээнин веналары менен тыгыз байланышта. Ошол «өлүм үч бурчтугу» бөлүгүнө безеткини сыгуудан инфекция кирип кетсе, ал вена аркылуу мээге жетип, анда сезгенүүнү – менингоэнцефалитти жаратат. Бул болсо коркунучтуу оору.
Мындан тышкары безеткинин ордуна так же тырык калат.
Ошондуктан, бетке безетки чыкканда тийбей, косметологго кайрылуу кажет. Бетти самын менен жуубай, атайын лосьондор менен тазалоо ылайык. Безетки чыкпоосу үчүн майлуу, таттуу азыктарды аз жеш керек.
ЖУБАЙЛАР БИРИ-БИРИНЕ ТӨП КЕЛБЕСЕ БАЛАЛУУ БОЛУШПАЙБЫ?
– Курбу кызым күйөөсү экөө 4-5 жыл чогуу жашашса да балалуу болушпагандыктан, ажырашып кетишти. Доктурларга текшерилсе, «Силерде баары жайында, болгону бири-бириңерге төп келбейсиңер. Андыктан, ажырашып, башка жан шериктүү болсоңор гана балалуу боло аласыңар» деген имиш. Ушундай болушу мүмкүнбү? Венера, Ош.
– Жубайлар денсоолуктары чың, жыныстык органдарында эч кандай кемчиликтери жок, кыскасы, баары талаптагыдай болсо да балалуу болбоолору толук мүмкүн. Мындай көрүнүш жубайлардын 3 пайызында кездешет да, бул төмөндөгүдөй түшүндүрүлөт.
Аялдын организминде өзгөчө белоктор – антителалар иштелип чыга баштайт. Антителалар болсо аялдын жыныс кынына түшкөн сперматозоиддерди кыймылдуулугунан айрып, шал кылып турат. Бул иммундук жактан дал келбөөчүлүк деп аталат.
Мындай аялдар башка бирөөгө баш кошсо, балалуу боло алышат. Эркек да башка жубайынан бала күтсө болот.
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
