ШЫПЫРГЫ ЭГИП ПАЙДА ТАП
Кадимки үй шыпырып жүргөн шыпыргылар сорго өсүмдүгүнүн бир түрү. Соргонун мекени – Түндүк-Чыгыш Африка. Латынча аталышы – Sorghum. Соргону кыргыздар «конок» деп да аташат.Шыпыргыны өстүрүү кыйын эмес, пайда табууга да болот.
Бишкектин Ак-Босого конушунун тургуну МИДИН КУБАТОВ шыпыргыны өстүрүү тажрыйбасы менен бөлүшөт.
– Бир топ жылдан бери Маевкадан ижарага жер алып, шыпыргы айдайм. Багып-өстүрүү төмөнкүчө жүрөт.
1 гектар жерге 10 килограмм шыпыргы уругу сеялка аркылуу себилет. Бирок себерден мурда урукту ооруларга каршы дарылар менен дарылатып алуу кажет. 1 литри 600 сом болгон дары ошол 10 килограмм урукту дарылоого жетет. Анан жер айдалып, урук 5 сантиметр тереңдикте эгилет. Жөөктөрүнүн арасы 65-70 сантиметрдей болушу зарыл. Уруктар болсо 5-7 сантиметр аралыкта ташталат.
Шыпыргы 10-15 күндө өсүп чыгат. Жерден бийиктиги 15-20 сантиметр болгондо отоо чөпкө каршы дары себилет. Дары кол менен чачылгандыктан, биз 17 литр сууга 100 грамм кошобуз. Дарынын 0,5 литри 500 сом турат жана 1 гектар жерге жетет. Өскөнүнө 25-30 күн болгондо культивация жүргүзүлүп, суюлтулат. 2 ай дегенде жөөк тартылып, селитра берилип, анан сугарылат. Кургакка чыдамдуу өсүмдүк болгондуктан, чапканга чейин 3 ирет сугаруу жетет. Уругу кызарып бышканда чабылат.
Жакшы карап баксаң 4 миң даанага чейин шыпыргы байлап ала аласың. Каралбай калса 1000дей шыпыргы гана байлап каласың. Анан кичинесин 45-50, чоңдорун 80-85 сомго чейин дүңүнөн өткөрө берсең болот. Мен өзүм 1 гектар жерден шыпыргы алуу үчүн жердин ижара акысы, дарылар, жер семирткичтер, иштеген адамдардын акысы болуп жалпысынан 27-30 миң сомдой коротом. Даяр шыпыргыларды сатуудан 120 миң сомго чейин таза пайда көрөм.
Мындан тышкары шыпыргылардын уругун чогултуп, сатып, акча тапсаң да болот. 1 гектар жерден 1,5-2 тонна урук алынат. Килограммын 25 сомдон дүңүнөн өткөзөбүз, кайра базарда 100 сомго чейин сатышат.
Канымжан Усупбекова
kenesh@super.kg
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (2)
жакшы бизнес экен эбин тапкан эки жейт деп бекеринен айтылбаганда.
atamda wipirgi eget 5,10metr jerge bir katar kylyp.Al jerden 20dai wypyrgy bailait 10u uigo kalsa 10u satat ar birin 100 somdon.
