1-июнь – Балдарды коргоо күнүнө карата «Супер-Инфо» гезити, super.kg сайты жана «Асанбай» сейил багы менен биргеликте борборубуздагы «Асанбай» сейил багында «Эгиз бөбөктөр» деген аталышта майрамдык акция өткөрдү. Ага эрежеге ылайык 3 жаштан 7 жашка чейинки эгиздер катышып, өз өнөрлөрүн көрсөтүштү. Быйыл жаздын келиши да, кетиши да кыйын болуп жаткандай. Демейде июнда күн чакчайып чыгып калчу эле, бул ирет жайдын биринчи күнү булуттуу болду. Ошого карабай биздин бөбөктөрдү ээрчитип, алыскы райондордон келген ата-энелерди көрүп көзүбүз сүйүндү. Эгиздер чогулганда «тамашоучулар» Самат Эркинбеков менен Эмил Эсеналиев кечени ачык деп жарыялап, жаш ырчы Руслан Абылов «Мекеним» аттуу патриоттук ырын аткарып өттү. Андан кийин кезеги менен бөбөктөрдүн талантына күбө болдук. Кичинекей таланттардын өнөрлөрүн ырчылар Гүлзада Рыскулова, Анжелика, Ильяз Андаш жана super.kg порталынын өкүлү Дамира Арстанова баалап, калыстык кылышты. Эгиздердин арасында ырдаганы, бийлегени, Манас, жомок айткандары да болду. Быйылкы «Кара жорго» модасы балакайларга да жетип, биринен бири калышпай бийлеп беришти. Жалпысынан 16 жуп түгөй келип, алардын арасында атайын даярданып, бирок элден сүрдөп сахнага чыкпай койгондору да кезикти. Бардык эле ата-эне баласы үчүн күйөт эмеспи. Катышуучулардын апаларынын бири таң атпай алыстан келишкенин айтса, көпчүлүгү балдарынын номери мыкты болсун деп атайын кийим тиктирип, ижарага алып, аябай даярданышкан экен. Сынакта эгиздердин аткаруу чеберчилигине, өзүн сахнада алып турганына, кийимдерине карап калыстар өз баасын берип, жыйынтыгында төмөнкү жуптар байгелүү орунга татышты.
Канайым менен Даткайымдын жатка айткан ырынан да моделдик таланттары күч экен.
Айлен жана Айден «Маленькая страна» ырына бийлешүүдө.
Кара-Балтадан келген «жөжөлөр».
Жылдыздардан турган калыстар тобу.
Аяна менен Баяна жарыша Манас айтып беришти.
Аспандияр менен Райдияранын «Кара жорго» бийи өзгөчө болду.
Жеңүүчүлөр аныкталары менен аларга «Супер-Инфо» гезити тарабынан даярдалган белектер тапшырылды. Калыстар да куру келбей, балдарга белектерди ала келишкен экен. Майрамдары менен куттуктап ырдап, өздөрүнүн атынан да белектерин ыйгарышты. Андан соң бөбөктөргө бекер балмуздак таратылып, майрамдык кеченин экинчи бөлүгү болгон эс алууга кезек келди. Таланттуу бөбөктөр ал күнү «Асанбай» сейил багындагы каалаган аттракционго бекер түшүп, көңүл ачышты. Айта кетчү нерсе, ал жакта башка сейил бакта жок интерактивдүү оюндар, бир топ кызыктуу аттракциондор бар экен. Биринен чыгып экинчисине түшүп кубанган, жетелешкен эгиздердин көздөрүндөгү кубанычты көрүп, биз да сүйүндүк.
Жеңүүчүлөр белектерин алып кубанычта.
Аэлита, Элина Аспандияр, Райдияра Ширин, Жасмин
Жаш ырчы Руслан Абылов.
«Асанбай» сейил багынын жетекчиси, ЭЛБУРС КАРБАНОВ: – Балдарга бүгүн каалаган аттракционго түшүү бекер болуп, көңүлдөрү куунак. Биз «Супер-Инфо» гезити менен биргеликте балдарга майрамдык маанай тартуулап жатканыбызга кубанычтабыз.
Балдар чарчаганча аттракциондорго түшүп жыргашты.
Майрамдык акцияда балдарга бекер аттракцион уюштуруп берген «Асанбай» сейил багынын жетекчиси Элбурс Карбановго ыраазычылык билдиребиз.
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (4)
sara90
2014-06-09 14:59:44
menin dagy tilegim kyialym egiz balaluu boluu...;)
0
N.mira
2014-06-10 13:03:16
Сонун сынак болуптур.окшош жожодой эгиз балдар.эгиз балалуу болууну баардык адам эле кааласа керек.Азаматсынар супер инфо.
+1
Aika0812
2014-06-11 09:45:46
эх бактылуу балалык кандай соонун. Супер инфо суперсинер
0
meka93
2014-06-11 15:28:33
мени эгиз балалуу болгум келет
0
Комментарий калтыруу үчүн өз ысымыңыз менен кириңиз же каттоодон өтүңүз.
«Асанбай» сейил багынын жетекчиси, ЭЛБУРС КАРБАНОВ: 
