Бишкек шаарында жаңы төрөлүп, көзүн ача элек ымыркай колдон колго өтүп, 11 500 сомго товар болуп сатылып кеткен. Бул кылмышка шектүү деп бир дарыгер кармалганы менен, азырынча ымыркайдын дайыны белгисиз.
«ЫМЫРКАЙ ТАБЫЛБАЙ ЖАТАТ» 27-август күнү жаңы төрөлгөн ымыркай жеке акушер-гинеколог тарабынан Элмира аттуу айымга 11 500 сомго сатылып кеткен. «Сатылган ымыркайдын энеси 21 жаштагы Жалал-Абад облусунун тургуну, Бишкек шаарында ата-энеси менен бирге убактылуу жашап жүргөн»,- дейт ИИМдин маалымат кызматынын кызматкери ЭРНИС ОСМОНБАЕВ: – 21 жаштагы кыз никесиз боюнда болуп калып, жеке медициналык клиникага барып көрүнүп жүргөн. Ал жердин акушер-гинекологу кыздын төрөө убактысы келгенде №1-төрөтканага «менин сиңдим болот» деп алып барып төрөткөн. Ымыркай менен энени төрөтканадан чыгарып кетүүдө да ошол гинекологдун салымы чоң. Ымыркайдын энесинин айтуусунда, төрөтканадан чыккандан кийин баланы жеке акушер-гинеколог алган да, ага дарыланууга деп акча (сумма тактала элек) берген. Ал эми ымыркайды 11 500 сомго Элмира аттуу айымга саткан. Учурда ымыркай кайда экени табылбай жатат. Аны издөө боюнча Бишкек шаарынын Свердлов РИИБинин кызматкерлери иш алып барышууда. Наристе табылган соң бул боюнча кенен маалымат беребиз.
КЫЛМЫШКА ШЕКТҮҮ ҮЙ КАМАГЫНА ЧЫГАРЫЛДЫ Окуя боюнча Свердлов райондук прокуратурасы Кылмыш жана жаза кодексинин «адам сатуу», «документтерди жасоо», «жасалма документ пайдалануу» беренелери менен кылмыш ишин козгоп, тергөөнү Свердлов РИИБине өткөрүп берген. Ымыркайды саткан жеке акушер-гинеколог кармалып, убактылуу кармоочу жайга киргизилген эле. 16-сентябрь күнү Бишкек шаарынын Свердлов райондук соту айыпталуучунун баш коргоо чарасын караган. Сот тарабынан дарыгер оор кылмыш боюнча шектелип жатканына байланыштуу камакта кармалышы керектиги эскертилген. Бирок тергөө органдары айыпталуучу айымдын туруктуу жашаган жери болгондугун, тергөө менен кызматташууга даярдыгын жана төрт айлык наристеси бар экендигин эске алышып үй камагына чыгарып берүүсүн өтүнүшкөн. Буга байланыштуу Свердлов райондук соту тергөө органдарынын өтүнүчүн канааттандырып, кылмышка шектүүнү үй камагына чыгарган.
«АЛ ЫМЫРКАЙ БИЗДЕ ТӨРӨЛГӨН ЭМЕС» Аталган факт боюнча маалымат алуу максатында Бишкек шаарындагы №1-төрөт үйүнө бардык. Башкы дарыгерди сурасак, бири «Саламаттыкты сактоо министрлигине кетти» десе, экинчисинен «иниси каза болгон, ошого куран окутуп жүрөт» деген эки башка жооп алдык. Ал эми бул окуя боюнча төрөткана кызматкерлеринен «Ал бала бизде төрөлгөн эмес. Эмне себептен биздин төрөткананы айтып жатышканын билбейбиз» деген жооп алдык. Мындай ымыркай сатуу өлкөбүздө биринчи жолу эле болуп жаткан жок. Буга чейин да мындай кылмыштар бир нече ирет катталган. Айтор, бул окуяда табышмактуу жагдайлар көп. 27-августта төрөлүп, 29-августта сатылган ымыркайдын апасы сентябрь айынын ортолорунда милицияга арыз жазган. Ал эми окуяга айыпталып кармалган айымдын аты-жөнү, ал иштеген жеке менчик медициналык клиниканын да аты аталбай жатат. Айыптуу кармалса да ымыркайдын ушул күнгө чейин табылбаганы таң калтырбай койбойт. Орган кызматкерлери №1-төрөтканада төрөлгөн десе, бул фактыны ал төрөт үйүнүн кызматкерлери ачык эле четке кагышууда. Наристенин табылышын күтүп, бул окуяга кийин да кайрылабыз.
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (9)
Kg.lady
2014-09-22 14:57:51
Кандай иш алып барышат орган кызматкерлери. Кылмышкер мандайында турат, а кылмыш толугу менен ачыла элек!
0
Ariet7
2014-09-22 15:19:47
Тууган кыз жиндиби эмне?мейли куйоосу жок болсо да эптеп багып кетпейт беле.баары бир билинмек да тууганы.кантип кантип берип салды оз баласын журогу жок акылы кем неме го сыягы
0
Nora
2014-09-22 16:21:11
Vrach torogon kyz menen 11500 somdu bolushpoi koigon okshoit dep oilop kaldym, Kyrgyzda nikesiz torolgon kyzdardyn tagdyry oto tataal bolot, oshonduktan bul baikush kyz ushundai jolgo barsa kerek dep oilom.
+1
ROUSE
2014-09-22 17:30:46
Ошончо убакыттан кийин эсине келиптир ээ? Баланы эми эмне кылат экен?
Эххх ушундайларга кор болгон наристелеер
0
Naimanka-kg
2014-09-23 00:44:10
Окуп отуруп айласыздан :
"Ушундай балдар кичинекей бир кызыл этке жетпей, канчалаган жылдар наристе жытына зар болгон уй булоолордо туулуп калса кана " -деп ойлоп кеттим...
0
adidas.08
2014-09-23 19:01:12
менимче акчаны бербей койгон анан арыз жазган
+1
kamarik
2014-09-24 08:45:15
ХХХ кыз экен.
0
admin_superstan
2014-09-24 09:34:57
kamarik, жаргон сөздөргө тыюу салынган! Билдирүүңүз түзөтүлдү.
0
baigazy0805
2014-09-28 05:22:00
Жаш наристе, куносу эмнеде? Бул дуйного жаны гана келгенде! Таштап кетсе оз энеси атасы. Булда болсо чоон адамдын катасы. Ак халаты булгаган дарыгерге олуум жазасыда кемдик кылат! Оз баласын жоготконун бир ай откондо билген эне кайдан эне намын алып журо алат. жазаага татыктуу деп эсептейм. беренелерге таянып бул эненида шектуу деп эсептейм жазага тартуу керек закондуу турдо оор жазага..
0
Комментарий калтыруу үчүн өз ысымыңыз менен кириңиз же каттоодон өтүңүз.
