Жылдыз Көкүмбаева, Омардын апасы:«ОМАР БИЗ ҮЧҮН ӨМҮРБЕК БОЙДОН КАЛДЫ»

«Балам бир күлсө күлөмүн,
Балам деп жашап жүрөмүн.
Балдарың эгер болбосо,
Кызыгы эмне дүйнөнүн...»- деп ыр саптарында айтылгандай, ар бир апа баласы үчүн жашап келет. Анткени бала – бакыт, бала – байлык, бала – үмүт, жашоо. «Уулумдун туулганына эмес, турганына сүйүнөм, жашоодо эне болгонума кубанам» деген ырчы Омардын апасы кулуну тууралуу кеп куруп берди.

«МЕН КЕЛГЕНЧЕ ТЕРЕЗЕГЕ ЖАБЫШКАН БОЙДОН КҮТҮП ТУРЧУ»
-Биз шаарда студент болгондугубузга байланыштуу тун уулум Уланбекти 4 жарым ай болуп калганда айылга чоң аталары алып кетишкен. Көзгө көрүнүп калганда ал балам чарчап калды. Андан кийинки кызым Аида 29да. Үчүнчү уулума заманбап ат коёлу дегенибизге болбой, чоң атасы өмүрү узун болсун деп Өмүрбек атады. Ырчы Омар болгону менен, биз үчүн уулум Өмүрбек бойдон калды.
Өмүрбекти бала кезден аябай эркелетип өстүрдүк. Кичинекейинде аябай жоош болду, тили эрте чыгып, өзү да эрте басты. Балам сууну аябай жакшы көрчү. Жуунтканда ваннадан чыгара албай кыйналчумун. Бирок Көлгө барганда аяш аталары бир жарым жаштагы Өмүрбекти көлгө сала албай аябай убара болушкан. Ошол окуяны эстегенде аяш аталары күлүп калышат.
Оюнчуктарды да таза кармап, сындырбай жакшы ойночу. Эжеси экөө удаа болгондуктан оюнчук талашып көп урушушчу. Кийим алганда атаандашпасын деп экөөнө тең алып берчүбүз. Кокус бир жакка кетип, экөөнү үйгө калтырып койсом, кайрылып келгенде бут коёрго жер калбай калар эле. Укмуш чачып, эрдик жасагансып үйдүн терезесине жабышып, тартылган сүрөттөй болуп мени күтүп турушчу. Басып алгандан кийин бир жерде жаны тынып тура алчу эмес. Байкуш кызым аңга түшүп кетпесин, машинага урунуп албасын деп артынан калчу эмес. Ушинтип чоңойгон сайын шоктугу чыга баштады.
Окуганда деле мектепке эжесин ээрчип барып жүрдү. Танаписте эшикке чыккан сайын чуркап келип ага жолугуп кетчү экен. Чоңойгондо да бул адаты калбады окшойт. Кызым «балаңызга айтыңызчы, мага мектептен чуркап келе бербесин, балдардан уялып жатам» деп калчу.

«КАНИКУЛ БОЛДУ ДЕГИЧЕ АЙЫЛГА ЖӨНӨЧҮ»
-Кыргыз тилин жакшы өздөштүрсүн деп уулубузду №5-улуттук гимназияга бердик. Мектепте жакшы окуду, анын артынан мугалимдердин арыздануусун такыр уккан жокмун. 9-классты бүткөндө классындагы жакшы окуган балдардын баары окуу жайларга тапшырып кетишти. Мугалим эжеси «Өмүрбекти деле бир окуу жайга тапшыртпасаңыз, бул жактагы балдарга кошулса окуусу начарлап кетет» деп калды. Уулумдан сурасак «экономист болом» деди эле, Финансы техникумуна тапшыртып койдук.
Өткөөл куракта уулубузду жаман балдарга кошулуп, туура эмес жолго түшүп кетпесин деп көбүрөөк көңүл бурдук. Үйдө бирөө балдарды тескеп тарбиялаш керек эмеспи. Атасы такыр катуу айтпай, балдарды оюна коюп, алардын айткандарынын баарына макул боло берчү. Мен кичине катуураак болуп, туура эмес кылса урушуп тарбияладым.
Өмүрбек айыл менен шаардын турмушун көрүп өстү. Каникул башталды дегиче кайнатам Таласка үйүнө алып кетип калчу. Кайра 1-сентябрга бир күн калганда капкара болуп бети туурулуп келер эле. Ушундан улам айылдын турмушун бизге караганда жакшы билет.
Юрмаладагы «Жаңы толкун» сынагына барып утуп келген акчасына айылдагы мечитке азан айтчу микрофон коюп берди. Айылга барганда баарынын көңүлүн алганга аракет кылат. Атасы жалгыз эркек, жети кыз. Эжелеринин бирине жолуга албай калса, «апа, баланча апчеме жолукпай калдым, шашылыш болбосо бармакмын» деп өзүнчө кейип калат.

«АТАСЫНА ТААСИРЛЕНИП ЫРЧЫ БОЛДУ»
-Жолдошум жаш кезинде аккордеонун асынып алып айылдагы чабандарга концерт берип ырдап калчу экен. Атасы менен кызы ырдаса, Өмүрбек да кошулуп алат эле. Аларга таасирленип уулум ырчы болуп кетти окшойт.
Ырчы болом дегенин атасы колдогону менен, мен каршы чыккам. Анткени биздин кезде деле ырчылар кенен баса албай кыйналгандарын байкачумун. Ошондуктан уулумдун элдин көзүнөн, сөзүнөн оолак болуп, эркин жүрүүсүн каалагам. Менин каршы болуп койгондугумдан, мага билгизбей «Где ты?» деген ырын жаздырыптыр. Бир кезде такыр үйгө кирбей машинада отурмай адат таап алган. Көрсө, менден жашынып алып ыр жаздырчу экен.
«Жаңы толкун» сынагына көп атактуу ырчылардын арасынан балабыздын өткөнүн угуп сүйүндүк. Сынакты теледен көргөнгө чыдамыбыз жетпей, интернеттен карап, ага алымсынбай сыналгыдан көрүп, атасы экөөбүз бир жерге отура албай калганбыз. Уулумду карасам жүзү купкуу болуп, сүрдөгөнү билинип турду. Энемин да, баламдын бопбоз болуп араң эле турганын карап аяп кеттим.

«ҮЙЛӨНӨРГӨ ЖАКЫН КЫЗЫМ МЕНЕН ТААНЫШТЫРАМ ДЕЙТ»
-Акыркы кезде Өмүрбекке үйлөн деп көп айтчу болдум. «Жашың деле келип калды, биз эртерээк небере жытын жыттайлы» дей берем. Мурунураак үйлөнөм деп чыкты эле, кайра негедир токтоп калды.
Балдарыма кесип менен жубай тандоодо өз эркине койгом. Жубай тандоодо бул кыз жакшы экен деп сунушташым мүмкүн, мен айткан кызды аласың деп таңуулабайм. Кээде «сүйлөшкөн кызың менен тааныштырбайсыңбы?» десем, «үйлөнөргө жакын тааныштырам» деп калат. Буюрса, жакын арада үйлөнүп калар деп турабыз.

Омар: «МЕНИН АЙЫМДАН ДОСУМДУН АПАСЫ МЕНЕН УРУШУП КЕТКЕН»
– Апамдын түн уйкусун бузуп, эмизген ак сүтүн актай элекмин. Анын жытындай жытты эч бир жерден таппайм. Америкага окууга кетип жатканда деле апамды жыттап-жыттап чыккан элем. Ал жакка жетпей эле сагына баштадым. Үйдөгүлөргө апамды жакшы карагыла деп кеткеним менен күн сайын өзү менен сүйлөшмөйүнчө ыраазы болчу эмесмин. Күнүгө акчамды үнөмдөп эки долларды апам менен сүйлөшкөнгө арттырып турчумун.
Мен үчүн апамдын ар бир сөзү дары. Бир гана апамдын сынын кабыл алам. Апамчалык мага эч ким күйбөй турганын, үзүлүп түшпөсүн билем. Мурда апам катуураак кармагандыктан бир көз карашынан коркуп турчумун. Атам болсо эркелетип, менин оюм менен болду. Мектепке чогулушка апам барат дегенде да корко берет элем. Убакыт өткөн сайын, тескерисинче, апам жумшарып, карааныма жалынып калды да, атам катуу боло баштады.
Кичинемде тентектик кылып балдар менен урушуп кеткен учурларым болгон. Бир жолу дос баламды уруп коюп үйгө качып келгем. Артымдан анын апасы келип апамды урушту. Ал кеткенде үйгө киргизип алып апам мени опузалап, «концерт» болгонбуз.
Апамды, Кудай буюрса, жакшы келиндүү кылгым келет. Келинчегимдин ою менен менин ой-максатым туура келсе экен деймин. Экөөлөп анын да, менин да апаларыбызды капа кылбай, ыраазы кылып өтсөк экен деп тилейм.

Замира Рахманбердиева
star@super.kg

 Кыстарылган видео