Жакында эле борбор калаабызда «Оштуктун 11 досу» жана «Гонщик таксист» аттуу тасмалардын кызыктуу жарнамалары илинген. Кызыктуу аталыштагы фильмдер элдин кызыгуусун гана арттырбай, биздин да көӊүлүбүздү бурду. Тасмалар тууралуу кененирээк маалымат алуу үчүн аларды тарткан чыгармачылык топ – «KG Club Production`дын» өкүлү, тартуучу топтун администратору Гузяля Салимовага кайрылдык.
– Саламатсызбы, «Оштуктун 11 досу» тасмасынын башка тасмалардан өзгөчөлүгү эмнеде?
– Тасманын жанры – криминалдык комедия. Биздин алгачкы максат – тасмадагы орундуу тамашаларды элге жеткирүү болчу. Кошумча эӊ кызыктуу экшн-кадрларды, каскадёрлордун катышуусундагы мыкты эпизоддорду дагы ушул тасмадан көрө аласыз. Менин оюмча, ойлогонубуз оӊунан чыгып, максатыбызга жеттик. Жыйынтыгында бул мекенибиздеги адам уурдоо тууралуу мыкты сценарийдин негизинде тартылган криминалдык комедия болду.
Эки тасмада теӊ продюсерлик милдетти аркалаган Нурлан Мамакеев «Гонщик таксист» аттуу тасмага мындай деп токтолду:
– Эки тасманын теӊ тартуу иштери аябай кызыктуу өттү. Алгач биз «Гонщик таксист» фильмин тартканыбыздан кабардар болсоӊуздар керек. Ал дагы комедия болчу, бирок сүйүү жана достук тууралуу эле. Андай болгону менен, аталган тасманын сюжети биздин кино дүйнөсүндө чанда кездешкен экстрималдуу кадрларды камтыган. Айта кетчү нерсе, биз кеп кылып жаткан эки тасма теӊ учурдун талабына ылайык тартылды. Башка заманбап тасмалардан кыйла айырмаланат. Себеби бул биздин текшерип көрүү максатында тартылган фильмдер болду.
Аталган тасмалар, чындыгында, көрүүчүлөрдүн купулуна толуп, кыргыз тасмаларынын арасында айырмаланып турганын кинотеатрга агылып келген элдин көптүгүнөн байкасак болот. Учурда «KG Club Production» чыгармачылык тобунун талыкпай эмгектенип жаткан кези. Азыр «Убактылуу жигит» («Временный парень») аттуу жаӊы тасманын тартуу иштери кызуу жүрүүдө. Продюсер Нурлан Мамакеевдин айтымында, аталган тасма үстүбүздөгү жылдын 14-февралынан тартып борбор калаабыздын бардык кинотеатрларында көрсөтүлө баштайт.
Нуркыз Курманбек кызы
star@super.kg