Айзада Турдаалы кызы, Добрдун карындашы: «МЕН ТУРМУШКА ЧЫККАНДА ДОБР ШОЛОКТОП ЫЙЛАГАН»

«Аска зоо бир тууганым» демекчи, бир тууганы бар адамдын аскасы бийик болот экен. Тырмактайынан бир үйдө чоӊойгон уялашыӊан артык сени эч ким билбесе керек. Анда эмесе, рэпер Добрдун карындашы Айзада агасы жөнүндө кызыктуу маек куруп бермекчи.

«БАЙКЕМДИ ЖАЛДЫРАТКАНЫМА ӨКҮНҮП КАЛАМ»
-Биз төрт бир тууганбыз. Улуусу Добр, андан кийин мен. Добр экөөбүздүн ортобуз 3 жаш болгондуктан теӊтуштай эле чоӊойдук. Бир жолу жайкы каникулда Нарында жүрүп, Адилетти (ред. Добрдун азан чакырылган аты) аябай сагындым. Шаарга келгенде «Адилет байке» десем өзүн жаман сезип кетти окшойт, «байке дебечи» деген. Ошондон кийин байке дебей калгам. Ата-энебиз базарда иштегендиктен бизди кичинекейибизде үйгө калтырып, дарбазанын сыртынан бекитип кетишчү. Адилет апамдар келгенче чай берип, үй жыйнап, тамак жасап, кыскасы, бизди карап отурчу.
Бир жолу тамак жасайын деп картошка аарчып отурса атам «экинчи картошка аарчыба, бул кыздардын жумушу» деп урушкан эле, ошондон кийин тамак жасабай калган. Азыр такыр тамак жасабайт, өткөндө атама «ошондо урушпаганыӊызда укмуш ашпозчу болмокмун» деп айтып капаланды. Адилет абдан жоопкерчиликтүү, ата-энебиз жумушка кетип бара жатып эмне дайындашса, ошону бүтүрмөйүнчө жаны тынчу эмес. Мен «апам көрүп коюптурбу?» деп көчөгө чыгып кетсем, артымдан кууп жетип үйгө алып кирчү. Анан экөөбүз үй жумуштарын бөлүп алып жасачубуз, ал «мен шыпырам» деп шыпыргыны талаша берер эле. Көрсө, шыпыргыны кармаганда илхамы келип, ыр жаратчу экен. Үйдү шыпырып жатканда кыйкырып, «я люблю работу, без работы не могу» деген өӊдүү сөздөрдү токуй берчү. Ырдап жатып ортосуна келгенде «азыр кыз ырдашы керек, сен кошточу, шоколад алып берем» деп кадимкидей жалдырачу. Бала экенмин да, азыр байкемди жалдыратпай ырдап берсем болмок экен деп өкүнүп калам.

«ЫРДАЙМ ДЕГЕНДЕ БААРЫБЫЗ КАРШЫ БОЛГОНБУЗ»
-Адилет ырдайм деп чыкканда үй-бүлөбүз менен каршы болгонбуз. Үйдөгү жумуштарга көӊүл бурбай, өзү менен өзү болуп калат да. Швабранын башына чүпүрөк ороп алып, аны микрофон кылып үнүнүн болушунча ырдачу.
Эӊ алгач клип тартканы да эсимде. Дүкөндөн иштеп 8 миӊ сом чогултуп, КТРдин эшигинен биринчи чыккан кишиге эле «мага клип тартып бериӊиз» дептир. Ал 8 миӊди алып бирөөгө дайындап койгон экен. Ошентип жүрүп «Ата-эне баркы» деген ырына клип тартып келген. Биз аны жактырбай, 500 сомго камераны ижарага алып, үйдөн кайра башынан клип тартканбыз. «Мени бул жерден тартып койчу» деп өмүрү камера кармап көрбөгөн мага камераны карматып койду.
Сиӊдим Мээримге фонарикти берип «жарык берип тур» деди. Мен таенемдин кийимин кийип кемпирдин ролун ойноп, клип тарттык. Ага биринчи тартылган клибинен кадрларды кошуп, монтаждап алып телевидениелерге алып барса, MTV каналынан башка эч бир канал албай коюптур. MTV`ны коюп алып Адилеттин клибин күтө берчүбүз. Тоскоолдуктарга карабай догурунуп жатып Добр болуп алды. Азыр баарыбыз колдоп, кеӊештерибизди айтып турабыз. Сиӊдим экөөбүз кийимдеринен бери тандап беребиз. Өзүнүн эркине койсок кээде башкача кийимдерди алып боорду эзет. Ошондуктан өзүм менен кошо Адилетке кийим издөө мага адат болуп калган. Кээде базар кыдырып кеткенде «Сен базарга кирбей эле койчу» десем болбой кирип «бул көйнөк канча, канчага бересиз?» деп соодалашса мен урушуп калам. «Коё турсаӊ, бааларын мен сурап берейин» десем, «эмнеси бар экен, мен деле адаммын, мен эмне, уурулук кылып жатамбы?» деп кайра мага кыйкырат.
Мен турмушка чыкканда мага арнап "Карындашым" деген ыр жазып, сюрприз кылган. Аны угуп алып Адилет баш болуп баарыбыз шолоктоп ыйлаганбыз. Ал эч нерсе эмес, көшөгөдө отурсам кирип барып «Айзада, кетесиӊби? Жүрү, кеткиӊ келип жатса алып кетейин» деп барыптыр. Кайненем «кой, биздин кызды ыйлатпа» деп араӊ кетирген.

«АДИЛЕТ КЫЗДАРГА ЖАКЫН ЭМЕС»
-Биздин үй жолдун боюнда болгондуктан нан сатып жүрүп, кеӊейтип дүкөн кылып алдык. Анан мончо ачып иштетип баштадык. Дүкөндү Адилет иштетчү, ал ырчы болуп кеткенден кийин мен иштетип калдым. Мен турмушка чыккандан кийин сиӊдиме өткөрүп бердим, учурда сиӊдим кичүү инибизге үйрөтүп жатат. Азыр мончого келген кишилер «Добр кана?» деп сурай беришет. Коомдук унаада кетип баратсаӊ да «Добрдун мончосунун жанынан токтотуп коёсузбу» деп айтышат. Биздин мончо аялдамага айланган.
Добрга сөз тийгизбөө үчүн өзүмө каранып калдым. Кээде өзүмдү карабай эле эшикке чыгып кетсем, «могу Добрдун карындашы» десе уялат экенсиӊ. Жолдошум менен тил табыша албай ажырашып келгем. Кызым Рамиля Адилетти атасындай жакшы көрөт. Кээде кызымды урушсам, «урушпай түшүндүрсөӊ» деп өзү эринбей «андай кылба, ал жаман» деп түшүндүрүп отура берет.
Жеӊелүү болгонубузда аябай сүйүнгөн элек. Тилекке каршы, экөөнүн жылдызы келишпей калды. Анын үстүнө аз эле сүйлөшүп баш кошуп алышкан эле. Учурда Адилеттин үйлөнүп, балалуу болгусу келип жүргөн кези. Бирок ылайыктуу кыз таппай жатат окшойт. Өзү да кыздарга өтө жакын эмес, биринчи турмушунан жаӊылгандан кийин коркуп калса керек. Ошондуктан биз да сураштырып, кыздарды издей беребиз. Апам дагы менин кызымдын кийимдерин «Адилеттин балдарына» деп ката берет. Кыскасы, баарыбыз Адилет үйлөнүп, жакшы бүлөгө туш болсок экен дегенде эки көзүбүз төрт.

БИР ТУУГАНДАР
Адилет Добранов, 26 жашта, рэпер
Айзада Турдаалы кызы, 23 жашта, финансист
Мээрим Турдаалы кызы, 19 жашта, студент
Эрбол Турдаалы уулу, 10 жашта, мектеп окуучусу

Замира Рахманбердиева
star@super.kg

 Кыстарылган видео