БАЛДАРДЫ БАРЫМТАГА АЛГАН КЫЛМЫШКЕР 10 МИӉ ДОЛЛАР ТАЛАП КЫЛГАН

Ысык-Көл облусунда жаш эне өзүнүн кызы менен кайын сиӊдисинин кызын жашырып, «бирөөлөр уурдап кетти, акча талап кылып жатышат» деген оюн уюштуруп, жыйынтыгында кылмышы билинип, камакка алынган эле. Андан көп узабай Жалал-Абад облусунда да бир келиндин эки уулун белгисиз бирөө уурдап, 10 миӊ доллар талап кылган окуя катталды.

«БАЛДАРЫӉ КЕРЕК БОЛСО 10 МИӉ ДОЛЛАР БЕР»
8 жана 9 жаштагы бир туугандарды барымтага алып, акча талап кылган жаранды УКМК менен ИИМ кызматкерлери биргеликте кармашкан. Окуя боюнча УКМКнын маалымат кызматынын өкүлү Рахат Сулайманов айтып берди.
– 2015-жылдын 18-мартында Сузак районунун тургуну УКМКнын Жалал-Абад облустук Коррупцияга каршы күрөшүү кызматынын бөлүмүнө арыз менен кайрылып, 2006 жана 2007-жылы туулган эки уулун белгисиз бирөө уурдап кетип, 10 миӊ АКШ долларын талап кылып жаткандыгын билдирген. Арыз ээси Жалал-Абад шаарындагы базарда соода-сатык менен алектенет экен. Ал күнүгө балдарын шаардагы мектептердин бирине окууга таштап, өзү жумушка кетип жүргөн. 18-март күнү да адаттагыдай эле балдарын мектепке таштаган. Ошол күнү түштөн кийин анын уюлдук телефонуна белгисиз бирөө чалып, «балдарыӊ менде, алар керек болсо 10 миӊ доллар алып кел. Укук коргоо кызматкерлерине кайрылсаӊ, балдарыӊды көрбөйсүӊ» деп коркуткан. Жабырлануучу ага ишенбей, кимдир бирөө тамашалап жатат окшойт деп ойлогон. Кылмышкер кайрадан байланышып, балдарынын ыйлап жатканын угузган. Аялдын «жанымда 15 миӊ сомдой эле бар, ошону берейин» дегенине кылмышкер көнгөн эмес. Андай чоӊ сумманы таба албаган эне укук коргоочуларга кайрылууга аргасыз болгон. УКМК менен Жалал-Абад ОИИБинин кызматкерлери биргеликте кылмыштын бетин ачуу боюнча иш алып барышкан. Балдар мектептен чыккандан кийин үйүнө алып кетүүгө эч ким келбесе, мектептин астында токтоп турган таксилерге отуруп кете беришчү экен. Ал жердеги таксисттер суралып, балдардын белгисиз машинага отуруп кеткени билинген.

«КЫЛМЫШКЕР АКЧАНЫ АЛЫП КАЧЫП КЕТКЕН»
– Кылмышкер ошол эле күнү кечке жуук балдардын энесине кайрадан байланышып, «Мен түнү үйүӊө барам. Мага акчаны берген соӊ балдарыӊды аласыӊ. Жаныӊда эч ким болбосун» дейт. Кылмышкер жабырлануучу айымды ал жашаган Комсомол айылынын четиндеги толук салынып бүтө элек эки кабаттуу имаратка чакырат. Ал башына кепканы бастыра кийип, жүзүн көрсөтпөгөнгө аракет кылган. Уурдалган эки бала ошол эле имаратта болгон. Кылмышкер балдарды берип, 10 миӊ долларды алып качып кетүүгө үлгүргөн.
Нес болгон аял кылмышкердин эч кандай белгилерин эстеп калган эмес. Балдар ал адамды биринчи жолу көрүп жатышканын, анын бетинде тырыктар бар экенин айтышкан. Мектептен чыкканда ал «үйүӊөргө жеткирип коём» деп балдарды машинасына отургузуп, барымтага алгандыгын айткан. Кылмышкер ошол эле айылдын тургуну же ал жерде көп жүргөн адам экени шексиз болгон. Айыл тургундарынын үстүнөн жүргүзүлгөн ыкчам изилдөө иштеринин натыйжасында ошол эле айылдын 21 жаштагы тургуну уктап жаткан жеринен кармалып, ал кылмышын толугу менен моюнуна алды. Анын үстүнөн Кылмыш-жаза кодексинин 123-беренесинин (адам уурдоо) негизинде кылмыш иши козголуп, тергөө иштери жүрүп жатат. Кылмышка шектелип кармалган жаран мурда соттолгон эмес. Анын бул жолго баруусуна сүйлөшкөн кызы менен уруша кеткендиги себеп болгон. Шектүү көрсөтмөсүндө сүйүктүүсү менен элдешүүгө жана башка көйгөйлөрүн чечүү үчүн акча керек болгондугун айткан.

Уулбү Каныбекова
koom@super.kg