КЫЗ МЕНЕН ЖИГИТТИН ӨЛҮМҮНӨ ЭМНЕ СЕБЕП БОЛДУ?

Үстүбүздөгү жылдын 13-апрель күнү борбор калаабыздын 12-кичи районундагы көп кабаттуу үйдөгү батирлердин биринен муунтулуп өлтүрүлгөн кыз жана канга чыланып, бирок жаны чыга элек жигит табылган. Жигит ооруканага жеткирилгени менен, анын өмүрүн сактап калууга мүмкүн болгон эмес.

«КОКОСУ БЕРИ ЧЫГЫП КАЛЫПТЫР»
Жүрөк үшүн алган окуя тууралуу Бишкек шаардык «Тез жардам» борборуна маалымат түшкөн. «Тез жардам» кызматынын башкы дарыгеринин ыкчам иштер боюнча орун басары Бактыгүл Касымбекова окуя тууралуу төмөнкүлөргө токтолду:
– 13-апрель күнү саат 16:30дар чамасында бизге «33 жаштагы агам Дайыр Абылаев өз өмүрүнө кол салыптыр» деп анын иниси телефон чалып билдирди. Биздин кызматкерлер айтылган дарек боюнча барганда, ал жерде болжол менен 25-30 жаштардагы кыздын өлүгү да бар болгон. Анын жанында бир жигит бычактан алган жарааттарынан улам кансырап, өзүнөн аккан канга чыланып жаткан болот. Биринчи жардам көрсөткөнү барган дарыгерлердин айтымында, жаракат алган жигит бычак менен өзүн ичке сайып, колун кескилеген. Мындан тышкары алкымын да кесип, кан тамырлары көрүнүп, атүгүл кокосу бери көздөй чыгып калыптыр. Бирок ал ошол убакта тирүү экен. Кан басымы төмөн болгондуктан биздин кызматкерлер өздөрү ооруканага жеткире албагандыктан жандандыруу бригадасын чакырышып, алар баргыча алгачкы медициналык жардамдарды көрсөтүшкөн. Жандандыруу бригадасы барып, жабырлануучуну Бишкек шаарындагы №4-ооруканага жеткиришкен. Кийин угушубузча, ал жигит ооруканадан каза болуптур.

«ӨЛГӨН ЖИГИТТИН БАТИРГЕ КӨЧҮП КЕЛГЕНИНЕ 1 ЖУМА БОЛГОН»
Андан соӊ биз кандуу окуя катталган үйгө барып, окуяга күбө болгон Сейитмурат Орозмаматовго жолуктук
– Ошол күнү болжол менен саат 16:00 чамасында жумуштан келип үйдө отурсам, бир жигит келип «Сиз домком турбайсызбы, агамдын ушул үйдөгү батирлердин биринде жашап жатканына бир жума болгон. Батирин ижарага берген кожоюнунун телефон номерин билесизби?» деп сурады. Эмне болгонун сурасам, ал «телефонума агам «суицид болуп, өзүмдү өзүм асып алдым» деп СМС жазыптыр. Ошондуктан шашып келдим. Эшигин ача албай жатабыз, эгер үйдүн кожоюну келип эшигин ачып берсе, биз үйгө кирет элек» дегенинен «журналдан карап берейин» дегиче ал кайра үйдөн жүгүрүп чыгып кетти. Бир аз өтпөй эле милиция кызматкерлери келип «Биз эшикти ачтык, сиз домком экенсиз, бизге күбө болуп бериӊиз» дегенинен макул деп алар менен бардым. Батирдин эшиги ачык, ичинде эл толтура экен. «Тез жардам» дарыгерлери, куткаруучулар, милиция кызматкерлери жүрүптүр. «Эшиги бекем эле, кантип ачтыӊар?» десем, үй 2-кабатта да, иниси «Мен балкон аркылуу кирип, ичинен милиция кызматкерлерине ачып бердим. Ачкыч ичинде сайылуу турган экен» деди. Үйдүн залында бир жигит канга боёлуп, аны менен дарыгерлер алпурушуп жатышыптыр. Жигиттин үстүндөгү кийген футболкасы кызыл жаян кан, кекиртегин даки (марля) менен жаап коюшуптур. Бир аз дем алганы билинип турган. Милиция кызматкерлери «Кызды өлтүрүп алган соӊ коркуп кетип өз жанын кыюу максатында өзүнүн колкосун кескен да, андан эч нерсе болбогон соӊ ичине да бычак урган» деген божомолдорун айтышты. Андан кийин 25 жаштардагы кыз төшөктүн үстүндө кийимчен жатканын көрдүм. Жанында жаздык турат, «тирүү окшойт» десем, милиция кызматкерлери «жаны чыгып кетиптир» дешти. Текшеришип, «денесинде көк ала же ийненин тактары жок, сыягы, бул жаздык менен тумчуктуруп өлтүргөн окшойт» деп болжоп жатышкан. Ваннанын ичи да канга чыланган, милиция кызматкерлери бычакты ошол жактан табышты. Кыздын туугандары табылган жок, аны өлүкканага, жигитти болсо ооруканага алып кетишти. Аны жандандыруу бөлүмүнөн 2 күндөн соӊ каза болуптур деп уктум. Алар кеткен соӊ кошуналарын чогултуп «кыйкырык, ызы-чуу болгонун уктуӊарбы?» деп сурасам, баары эч нерсе угушпаганын айтышты.

«АГАМ ЖАКЫНДА ҮЙЛӨНМӨК»
Ал эми маркумдун иниси Русланга телефон аркылуу байланышканыбызда, ал бизге буларды айтты:
– Агам Дайырдын Орусиядан келгенине аз эле убакыт болгон. Жакында үйлөнөм деп жүргөн, бирок үйлөнөм деген кызын биз менен тааныштырган эмес эле. Каза болгон кызды мен тааныбайм. Күтүлбөгөн жерден мындай каргашалуу окуя болуп кетти. Агамдын психикасы жайында болчу, эмне себептен бул кадамга барганы бизге да түшүнүксүз. Ал өзүн өзү өлтүрдүбү же ага бирөө кол салдыбы, азырынча айта албайм. Эми экспертизанын жыйынтыгы чыкканда билинет. Соттук-медициналык экспертизанын кызматкерлери текшерип кетишти. Башка маалымат айта албайм.
Бул кандуу окуя кызганычтан же ичимдиктен келип чыктыбы? Окуя чындап эле суицидби же башка кишилер да кол салышы мүмкүнбү? Ушул сыяктуу суроолорубузга жооп алуу үчүн 21-апрелде Бишкек ШИИББинин маалымат кызматына кайрылсак, кызматкерлери бизди таӊ калтырып, мындай маалымат катталбаганын айтышты. Ал эми Бишкек шаардык өлүкканасынан маркум кыз 18 жашта экендиги жана анын сөөгүн туугандары алып кеткендиги тууралуу билдиришти.

Асхат Субанбеков
koom@super.kg

 Кыстарылган видео