Дайыр Исмадияров, ырчы: «СҮЙГӨНҮМДҮН ЖАКШЫ СӨЗҮНӨ АРБАЛАМ»

Дайыр Исмадияров сүйүктүүсүн ачыкка чыгарып, үйлөнүү тууралуу жаӊылыгы менен бөлүштү. 5 жылдан бери «эмдиги жылы үйлөнөм» деп келген жигит быйыл чындап эле үйлөнөбү? Анын жүрөгүн кандай кыз багындырды? Маек ушул тууралуу болсун.

– Дайыр, кандайсыӊ? Үйлөнөйүн деп жатканыӊ тууралуу туулган күнүӊдө айтып калдыӊ эле...
– Салам! Ооба, буюрса, үйлөнөм. Бирок быйылкы күздө иштеп калат экенмин. Ошого байланыштуу үйлөнүү тойду эмки жылдын күз мезгилине калтырууга туура келди.
– Жар салып жаткан үйлөнүү тоюӊ орундалабы? Дегеним, берген интервьюларыӊда 5 жылдан бери эле «эмдиги жылы үйлөнөм» деп айтып келесиӊ?
– Мен ал кезде сүйлөшкөн кызым бар деп айтчу эмесмин да (күлүп). Эгер жолуктуруп калсам үйлөнөм дечүмүн. Буюрса, эмки жылы сөзсүз үйлөнөм.
– Үйлөнүү тоюӊду кандай өткөрсөм деп кыялданасыӊ?
– Кыялданган деле жокмун. «Ойлогон ойду кыстаган турмуш жеӊет» дегендей, азырынча пландай элекпиз. Бир гана Ошто өтөрү анык болду.
– Сенин жүрөгүӊдү ээлеген селки тууралуу билгим келип турат...
– Азырынча ал кыз тууралуу эч нерсе айта албайм. Аты-жөнү, кайсы жерлик экени сыр бойдон калсын. Жадакалса досторума тырышып жатып араӊ тааныштырдым.
– Эмнеге?
– Мага азыр ушундай ыӊгайлуу болууда.
– Ал кыз сени кайсы сапаттары менен арбап алды?
– Көбү укмуш модель кызды ээрчитип жүрөт деп ойлошот экен. Бирок ал модель болбосо да, мен үчүн сулуу. Жөнөкөй, оор басырыктуу, сырдуу кыз. Мода куубайт, шиш такага кызыкпайт. Ага өзү аркалаган жумушу болсо эле болду.
– Ушунчалык сыр кылып жатасыӊ, сүйүктүүӊ сенден улуубу же кичүүбү?
– Менден кичүү (күлүп).
– Ушул кыз өмүрлүк жарыӊ болоруна кантип көзүӊ жетти?
– Экөөбүздүн таанышканыбызга 2 жылдын жүзү болсо, сүйлөшкөнүбүзгө 4 ай болду. 2 жыл аралыгында кыз-жигит болуп сүйлөшкөнгө чейин сыртынан байкап жүрдүм. Акыры эч ким менен сүйлөшпөгөн, дискотека, түнкү клубдарга барбаган түз жүргөн кыз экенине ынандым. Сүйлөшүп баштаганда деле болушунча сынадым.
Бир күнү телефондон жөн жерден эле «болду, сүйлөшпөйбүз», «давай, до свидание», «мен башканы алам» деп аны сынамакка уруша кеттим. Ошол күнү катуу шамал болуп, менин унаамдын жанында турган унаага мамыча кулаганда интернеттеги баракчама «Кудай сактады, аман калдым» деп жазсам, ал биринчилерден болуп «Амансыӊбы? Эмне болуп кетти? Мейли, сага тийбей эле коёюн, иши кылып аман болчу» деген билдирүү калтырыптыр. Ошондо чындап эле жүрөгүнөн орун алганымды сездим. Мына ушундай сыноолордон кийин аны өмүрлүк жар кылып алуу чечимин кабыл алдым.
– Аны сүйөсүӊбү? Же сүйүү никеден кийин жаралат деген ишеничтесиӊби?
– Менин мүнөзүм начар, айтканымдан кайтпаган көк бетмин. Ал болсо менин башымды айландырып, өзү каалагандай кылып алат. Ушунчалык акылдуу кыз, мени алдап отурбайт. Болгону жакшы сөз сүйлөп коёт, мен ошого арбалып, аны ээрчип кетем. Балким, сүйүү ушундайдыр.
– Эми кеп нугун чыгармачылыгыӊа буралы. Психолог кесибиӊди шоу чөйрөгө алмаштырганыӊ үчүн өкүнбөйсүӊбү?
– Ар бир адам кээде кылган ишине өкүнөт болуш керек. Бирок мен азыркы абалыма өкүнбөйм. Чыгармачылыгым өркүндөп-өсүп жатат. Анын артынан көп досторду, кеп-кеӊештерин берген эже-агайларды таптым.
– Ырчылык кесибиӊ атактуулукту алып келбесе, 5 жыл коротуп окуган кесибиӊе кайтат белеӊ?
– Чыгармачылык жан дүйнөмө жакын нерсе. Аны баштагандан кийин тийиштүү жыйынтыкка жетмейинче артка кайта албайсыӊ. Азыр деле мугалимдер «жаш, сага окшогон кадрлар керек, каалаган учуруӊда мугалим кылып алабыз» деген сунуштарды айтышат.
– Мурдагы өзгөндүк айылдык жигит, кыргыз эстрадасынын учурдагы көз күйдүргөн бойдогу Дайыр Исмадияров ырчы болууда өзүнө кандай тапшырмаларды койду эле?
– Биринчи кезекте ырчы катары ордумду, стилимди табуу болчу. Көп болбосо да хит ырларды жаратуу эле. Ал нерселер аткарылды. Ашыкча кыялданган адамдардан эмесмин. Отуруп алып оюӊ менен айга учпай, аракеттенип гана ийгиликке жетесиӊ. Өзгөргөнүм – мурда жаӊы телефондордун, автоунаалардын артынан кууп, элге «крутой» болуп көрүнгүм келсе, азыр ал нерселер калды.
– Атактуулугуӊду жоготуп алуудан, сага болгон кызыгуу таркап кетет деп коркпойсуӊбу?
– Жок, мен андай адамдардын катарына кирбейм. Чыгармачылыгымда бир тыныгуу болуп калса, кайра сахнага кайтып келүүдөн коркпойм. Бул текеберлик эмес. Болгону максатыма жетмейинче тырышып жүрө берем.
– 30 жылдан кийин өзүӊдү кайсы жаатта көрө аласыӊ?
– Кийинки 10 жылдыкта өзүмдү саясатта көрөм. Себеби гастролдо жүргөндө элдер эмнегедир муктаждыктарын бизге айтып келишет. «Депутаттарга айта баргыла» деп каттарын беришет. Эл кыдырып, эл адамы болгондон кийин аларга жардам беришим керек. Андыктан өзүмдү саясатта сынап көрөм. 15 жылдан кийин сөзсүз түрдө саясатчылардын катарынан көрүшүӊүз толук мүмкүн. Буюрса, бизнесимди өнүктүрүп, продюсерлик борбор ачам.

МАЕК СОӉУНДА...
– Сендеги эӊ баалуу деген кайсы сапаттар элдерде болушу зарыл?
– Чынчылдык, бир аз өзүмчүлдүк, жөнөкөйлүк менен катар амалкөйлүк керек.
– Бир учурда бир нече кыз менен сүйлөштүӊ беле?
– Бул гезитке чыгат да, ээ?
– Ооба.
– Азыр эмес, өткөн чакта 2 кыз менен сүйлөшкөм (күлүп).
– Блондинкабы же брюнеткабы?
– Менин кызым жөнүндө сөз болуп жатабы, же?..
– Табитиӊ тууралуу...
– Анда табигый брюнетка, менин оюмча, алар жаш көрүнөт.

Динара Абдыкадырова
Адилет Бектуров
star@super.kg