ЖЕТИМ КАЛГАН БАЛДАР ҮЙЛҮҮ БОЛДУ

Быйыл Асият 5 жашта. Ал былтыр 4-декабрда өзү төрөлгөн үйү менен кошо апасы жана 3 жаштагы сиӊдиси Касиеттен айрылган. Түнкү саат 12де күйүп баштаган үй заматта күлгө айланган. Асиятты кошуна жашаган 21 жаштагы улуу эжеси Тинатин менен анын жолдошу Руслан сактап калган. Бул учурда бир тууганы 15 жаштагы Шабдан да эшикке чыгып аман калган.
Чиедей балдар жетим калгандан бери 10 ай өттү. Бүгүн бул үй-бүлөнүн кубанычында чек жок. Аларга «KG Групп» курулуш компаниясы 2 айдын ичинде 3 бөлмөлүү үй салып берди. Үй-бүлө күтүп, 1 уулдун апасы болуп калган Тинатин буларга токтолду.
– Былтыр кырсык болгондон кийин иним менен сиӊдимди өз камкордугума алдым. Жолдошум экөөбүз балдарды өзүбүз эле багабыз деп чечкенбиз. Мынчалык тез убакыттын ичинде үйлүү болобуз деп ойлогон деле эмесмин. Асият дайым өрттөн калган үйдүн дубалдарын аралай басып апам менен Касиетти эстей берчү. Мен кошуна үйгө келин болуп баргам. Карасаӊыз, жакындыгын. Күндө эшикке чыгарым менен балалыгым өткөн үй көрүнөт. Дубалдары күйгөн, жанды ачыткан... Артынан сөзсүз апамды эстейм. Эми минтип ордуна жакшынакай үй пайда болуп калды. Кыялдардын орундалышына себепкер жакшы адамдар жок эмес экен. Үй, акча, оокат мунун баары табыла турган нерсе экенин, ал эми апа, бир тууган, жакын адамдар табылбасын түшүндүм.
Аппак көйнөгүн кийип жапжаӊы үйдү айлана чуркаган Асияттын кубанычында чек жок. Тинатин мындан ары бул жаӊы үйдө жолдошу, уулу, иниси жана сиӊдиси менен чогуу жашаарын айтты.

Гүлжан Асанкожоева
koom@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (3)

meka93

2015-11-09 14:22:31

Азаматсынар KG групп... Ишинерге ийгилик, Кандай сооп иш кылдынар.. Элге болгон жардамынар мындан да жогорулап, кобойо берсин.... Силердин ишинерге чек коюлбасын эч качан.. Ал эми бул уй-булого жалан жакшы кун, жагымдуу коз ирмемдерди насип этсин ЖАРАТКАН. Уйунордо жалан гана жакшылыктар болсун...

chika-chika88

2015-11-09 19:13:05

Аллахы ыраазы болсун KG групптан,козумон жаш тегеренди окуп алып...

Tima07

2015-11-10 22:38:19

жардам бергиси келгендер ушинтип эле жардам берет. соссуз депутат болуш эмес.

Комментарий калтыруу үчүн өз ысымыңыз менен кириңиз же каттоодон өтүңүз.

№ 679, 6-ноябрь-12-ноябрь, 2015-ж