10-КАНАЛ КЫРГЫЗСТАНДАГЫ АЛГАЧКЫ СИТКОМ

Кыргызстанда биринчи жолу ситуациялык комедия (ситком) тартылды.SUPER.KG порталынын «Кинозал» бөлүмү жана «ЭлТР» телеканалы аркылуу көрүүчүлөрдүн назарына коюлган «10-канал» аттуу комедиялык сериал тууралуу кененирээк маалымат алыӊыз.

Ситуациялык комедия же ситком – бул туруктуу каармандардын катышуусундагы радио жана телепрограммалардын бир түрү. Телеберүүлөрдүн ситкому 20-30 мүнөткө созулат. Биринчи ситкомдор көрүүчүлөрдүн катышуусунда студияда тартылгандыктан аларды кадрдын сыртындагы күлкү коштоп турат.

Жанр – Ситуациялык комедия (ситком)
Сериясынын саны – 10
1 сериянын узактыгы - 20 мүнөт
Чыккан жылы – 2015-жыл
Режиссёру – Бакай Эген
Сценарийин жазгандар – Нурлан Раззакулов, Каарманбек Кулуев.
Башкы ролдордо – Асел Турдалиева, Нурбек Юлдашев, Айдина Камчыбекова, Дамир Абдраимов, Насиба Тагаева.

Бакай Эген, режиссёр:
– «10-канал» – бул ситуациялык комедия жанрындагы телесериал. Комедиянын жүрүшү кичи шаардагы жеке телекомпаниялардын биринде орун алат. Анда телеканалдын башкы директоруАлия Талгатова (Асел Турдалиева) саясатка аралашууга белсенип, депутаттыкка талапкерлигин коёт. Башкы директордун милдетин аткаруучу болуп Замир Юлдашев (Нурбек Юлдашев) дайындалат. Ал телеканалды толугу менен башкарууну көздөп, Айдина аттуу катчысы менен бирге атаандашы катары көргөн коммерциялык директор Дамира Бөрүбасарова жана көптү үмүттөндүргөн МГУнун бүтүрүүчүсү Кыял Чоротегинди жолунан алып салуу аракетин көрө башташат. Телеканалдын ээси Роман Тен шайлоодо Талгатованын талапкерлигин колдоп, шайлоо алдындагы штабды телеканалдын кеӊсесине орноштуруп берет. Муну менен ал Замир Юлдашевдин ээн-эркин басып-туруусуна тоскоол болуп жагдайды ырбатат. Мына ушундай интригага сугарылган көрүнүштөр күлкүлүү сериалдын өзөгүн түзөт. Сериал ПРООН тарабынан каржыланып, ЭлТР телеканалы ишке ашырды.

Нурбек Юлдашев, актёр:
– Буга чейин Айдина экөөбүз ЭлТРдеги «Таӊкы тамаша» долбоорун алып чыгып, чогуу иштеп көнүп калганбыз. Жетекчиликтен «ушул долбоордогудай экөөӊөрдүн айланаӊарда болгон окуяларды чагылдырган сериал тартышыӊар керек» деген тапшырма берилди. Сценарий жазып, сынамакка 15 мүнөттүк тасма тартып көрсөтсөк, аны жактырышты. Андан соӊ ситкомду кандай тартыш керектигин изилдеп чыгып сценаристтери, режиссёру дайындалды. Жыйынтыгында биздин идеяга таянып ушул комедияны тарттык.

Айдина Камчыбекова, актриса:
– Бул сериалда телеканалдын директорунун катчысынын образын жараттым. Буга чейин «Тагдырдын өгөй балдары», «Сынган тагдыр» деген тасмаларга тартылып бир аз тажрыйба топтогон элем. Ошондуктан ситкомго тартылуу кыйынчылыкты жараткан жок. Баарынан сериалдын сценарийи эмне менен аяктарын билбегендигибиз кызык болду. Себеби сценарий актёрлорго ар бир серияны тартар алдында гана берилип жатты.

Динара Абдыкадырова
star@super.kg