РОЛЛДОР

«ЧЫГЫШ ГҮЛҮ»
Керектелүүчү азыктар:

Күрүч – 200 грамм
Жумуртка – 2 даана
Майонез – 1 аш кашык
Күрүч уксусу – 1 аш кашык
Кумшекер – 1 аш кашык
Суу – 300 грамм
Кызыл икра – 50 грамм
Нори – 3 даана
Татымына жараша туз

• Күрүчтү таза жууп, суусун толук сарыктырабыз. Андан соӊ мискейге салып, үстүнө сууну куюп отко коёбуз. Кайнап чыкканда отту азайтып, 10 мүнөттөй демдейбиз. Оттон чыгарган соӊ мискейдин капкагын ачпай дагы 10 мүнөт коё турабыз. Күрүч уксусун жылытып, ага туз, кумшекер кошуп аралаштырабыз да, күрүчтүн үстүнө куябыз.
  
• Жумурткага майонезди кошуп жакшылап чалабыз да, мындан алакандай блинчиктерди бышырып алабыз.
  
• 1 норини төрт бөлүккө бөлүп, ар бир бөлүгүнүн үстүнө бирден блинчик жана тоголоктолгон күрүчтү коёбуз. Колуӊузду суулап алсаӊыз, күрүч жакшы тоголоктолот.
  
• Алаканга целлофан баштыкты жайып, үстүнө роллдорду коюп, тоголок формага келтирип 5 мүнөттөй кармап туруу шарт. Норинин четин бир аз суулайбыз.
  
• Целлофанды роллдордон акырын сыйрып, өйдө жагын сүрөттөгүдөй кесебиз. Кесилген жерди сыртты көздөй кайрып, ортосуна кызыл икра себелейбиз.
  

«АССОРТИ»
Керектелүүчү азыктар:

Күрүч – 200 грамм
Суу – 300 грамм
Нори – 4 даана
Күрүч уксусу – 1 аш кашык
Кумшекер – 1 аш кашык
Бадыраӊ – 1 даана
Жашыл болгар калемпири – 1 даана
Эритилген сыр – 1 куту
Чала туздалган форель же лосось балыгы – 50 грамм
Кызыл икра – 50 грамм
Татымына жараша туз, васаби, маринаддалган имбирь, соя соусу

• Күрүчтү бышырып алып, ага уксус, туз, кум шекер аралашмасын кошобуз. Анан эритилген сырды муздаткычка бир аз коюп туруп, ичке кесип чыгабыз.
  
• Болгар калемпирин, туздалган балыкты, бадыраӊды да ичке, узун-узун кылып туурайбыз.
  
• Чий килемченин үстүнө норини салып, үстүнө тегиз кылып күрүчтү жаябыз. Күрүчтүн ортосуна тууралган сыр, балык, болгар калемпирин, бадыраӊды тизебиз.
  
• Аны чий килемченин жардамы менен оройбуз. Даяр болгон роллдорду 6-7 бөлүккө бөлүп, үстүнө икра себелеп дасторконго койсоӊуз болот. Кесерде бычакты суулап алсаӊыз, оӊой кесилет.
  

РОЛЛДОР АРЫКТООГО ЖАРДАМ БЕРЕТ
Роллдор – бул япон ашканасынын тамагы. Японияда маки же макидзуси деп аташат. Кыргыз тилине которгондо оролгон дегенди түшүндүрөт.
1970-жылдары Лос-Анжелестеги «Токио» ресторанынын башкы ашпозчусу, суши жасоочу Итиро Маситой америкалыктарды өзгөчө тамак менен таӊ калтырыш үчүн сушинин жаӊыча түрүн, роллдорду ойлоп тапкан. Ошондон улам япондорго караганда америкалыктарга тааныш «Калифорния», «Филадельфия» аталышындагы роллдорду кезиктиребиз.
Бул тамактын жардамы менен аз убакытта арыктоого болот. Анткени роллдордун калориясы өтө аз. Майлуулугу аз болгону менен, йод көп. Мисалы, норинин курамында йод көп. Мындан сырткары ар түрдүү витаминдер, микроэлементтер бар. Окумуштуулардын изилдөөсүнө караганда, роллдорду көп жеген адам өпкө рагына кабылбайт.

Сүйүн Кулматова
kenesh@super.kg