ПЛАСТИКАЛЫК ОПЕРАЦИЯ БИШКЕКТЕ КАНЧА ТУРАТ?

Пластикалык операциядан кийин Шарипа эже Шакира эже болуп калды. Чынында эле азыр абал ушундай. Денесинин кайсы бир бөлүгүнө пластикалык операция жасатуу үчүн кезек күтүп жаткан кардарларды клиникалардан көп жолуктурдук. Кыргызстанда пластикалык операциянын кандай түрлөрү жасалат жана чөнтөгүбүз канча сомго жукарат, байкап көрөлү.

1. Чекени тарттыруу.
   Хирургиялык жол менен жана атайын жип аркылуу тартылып жасалат. Хирургиялык жол менен 35 000-43 000 сом болсо, жип менен тарттыруу 28 000 сомдун тегерегинде. Жип менен жасалган операцияларда тырык калбайт жана тез айыгат.
2. Бетти тарттыруу.
   2 түрү бар. 1) Атайын жиптер менен тарттыруу.
   Бул ыкма өтө шалбыраган беттерге болбойт, кызмат акысы – 35 000-43 000 сом.
   2) Хирургиялык жол. Беттеги шалбыраган ашыкча тери кесилип алынат. Кызмат акысы – 73 000-76 000 сом.
3. Отопластика. Кулагы делдейген, көнчөгү (сөйкө салынчу жери) чоӊ болгондор жасатышат. Кызмат акысы –
   14 000-16 000 сомдун тегерегинде.
4. Моюн. Ээктин алдындагы булчуӊ тартылат. 20 000-25 000
   сомдун тегерегинде.
5. Маммопластика. Эмчекке имплант салынат же өзүнөн сордурулган май куюлат. Кээде имплант организм кабыл албай койсо же башка себеп менен таш болуп катып калышы мүмкүн. Анда кайра алмаштырууга туура келет. Чыгымды операция жасаган клиника моюнуна алат. Имплант коюу – 175 000 сом, май куюу – 100 000 сом. Кичирейткенде ашыкча тери кесилип алынат, кызмат акы – 100 000 сомдун тегереги.
6. Колдогу майларды сордуруу. Колдогу ашыкча майларды көбүнчө кыздар сордуртуп салышат. Булчуӊ нервдери жок жеринен май сордурулуп алынат. Көк ала тактар 2-3 аптада тарайт. Кызмат акысы – 25 000 сомдун тегерегинде.
7. Курсактагы майдан арылуу. Майдын баарын сордуруп салса адам өлүп калат, ошондуктан май клеткаларын бир аз калтырып, анан сордуруп салынат. Толуп кетсе кайра эле ич салаӊдап калат. Кызмат акысы
   70 000–100 000 сомдун тегерегинде.
8. Глютеопластика. Жамбашты чоӊойткондо имплант салынат же өзүнүн майы куюлат, кызмат акы –
   175 000 сом, кичирейткенде липосакция кылынат, кызматы – 36 000-43 000 сомдун тегерегинде.
9. Жыныс кынын кичирейтүү. Операция 1-2 саатка созулат. Кызмат акысы –
   35 000-50 000 сомдун тегерегинде.
10. Бутту түздөө. Денеден сордурулган майды буттун ийри жерлерине куйса бут түзөлөт. Кызмат акысы – 36 000 сомдун тегерегинде.

1. Блефаропластика.
   Көздүн үстүндөгү ашыкча тери кесилип, көзгө сурма жасалат. Операция 40 мүнөттөн 2 саатка чейин созулушу мүмкүн. Көздүн айланасы шишип 3-4 аптага чейин көз айнек тагынууга туура келет. Кызмат акысы – 14 000-16 000 сомдун тегерегинде. Көздүн алдындагы ашыкча терини тарттыргандар да бар. Баасы жогорудагыдай эле.
2. Эриндер.
   Дененин кайсы бөлүгүндө май көп болсо, ошол жерден атайын шприц менен керектүү өлчөмдө сордуруп алып (липосакция) эринге куюлат. Сордурулган май гель сыяктуу болуп калат. Убакыттын өтүшү менен эриндер жукарат, бирок майдын 20-30 пайызы өмүр бою калат. Кызмат акысы – 14 000 сомдун тегерегинде. Эгер бир эринге эле жасатам десе жарым баасы.
3. Ринопластика.
   Пластикалык операциялардын ичинен эӊ оору. Хирург кичине эле ката кетирсе, оорчулук жаратат. Мурундун сөөгүн түздөө 35 000-75 000 сом болсо, тешиктерин кичирейтүү 15 000 сомдун тегерегинде.
4. Димплэктомия.
   Жаӊы жасалганда беттеги уяча 1 ай даана көрүнөт, андан кийин күлгөндө эле чыгат. Жаактын керектүү жерин белгилеп, ошол жердин майы кесилип алынат. Кызмат акысы – 12 000 сомдун тегерегинде.
5. Экинчи ээк.
   Липосакция – 7000 -11 000 сом, жип менен тарттыруу жана хирургиялык жол менен жасалчу операциялар 20 000-25 000
   сомдун тегерегинде. Пластикалык операцияларга түбөлүк деген кепилдик берилбейт. Адам семирип кетсе, экинчи ээк кайра эле пайда болот.

ПЛАСТИКАЛЫК ОПЕРАЦИЯНЫН АРТЫКЧЫЛЫГЫ ЖАНА КЕМЧИЛИГИ
Адамдарды дене мүчөсүндөгү кемчиликтерден арылтат. Бул хирургия айрымдарга нормалдуу жашоо образын түзүп, өздөрүн жакшы сезүүгө алып келсе, айрымдарга өмүрүн өз нугунда улантууга жардам берет. Мисалы, айрымдар өз каалоосу менен эмес, автокырсыктан, өрттөн, ар түрдүү кырсыктардан жабыркап, анан операция столуна жатууга мажбур болушат. Дагы бир артыкчылыгы – сулуулуктун жана жаштыктын узакка кармалышы.

Операциядан кийинки калыпка келүү, пайда болгон өӊ-келбетке көнүү оор процесс. Операция жасатардан мурун жакшылап ойлонуу керек, анткени адам өзүнүн ден соолугун тобокелге салып жатат. Бардыгы ойдогудай болот деген кепилдик эч качан берилбейт. Оор операцияларда (эмчек, жамбаш, ичтеги май) 1 апта клиникада жатууга туура келет. Көптөр пластикалык операцияны башынан өткөргөндөн кийин депрессияга кабылышат. Анткени өзү элестеткен сулуулук дароо эле келип калбайт. Оорутуу, денедеги көк ала тактар, шишик көптө тарайт. Андыктан операцияга чейин кардарды дарыгер психологиялык жактан даярдашы керек. Жасагандан кийин да дайыма пациентти психологиялык жактан колдоого алуу шарт.

КИМДЕРГЕ БОЛБОЙТ?
Кант диабети, тери, көз, жүрөк-кан тамыр оорулары жана психикалык жактан жабыркагандарга жасатканга болбойт.

Сүйүн Кулматова
Адилет Бектуров
kenesh@super.kg