Марат Исаев: «БЕЛГИЛҮҮ БОЛУП КЕТКЕНГЕ КӨНӨ АЛБАЙ ЖАТАМ»
Ушул жылдын 11-февраль күнү Москванын "Красносельская" метросунун станциясында рельске кулап кеткен аялды куткарган мекендешибиз Марат Исаев көпчүлүктүн алкоосуна татыды. Өз өмүрүн тобокелге салган 28 жаштагы мигрант бүгүнкү күндүн каарманына айланган кез. Президент Алмазбек Атамбаевден баштап көптөгөн бийлик өкүлдөрү тарабынан сыйланган Марат Исаевди 10-мартта Орусиянын ажосу Владимир Путин да кабыл алып, аны "Өлүмдөн куткарып калгандыгы үчүн" медалы менен сыйлады.
– Саламатсыңбы, Марат? «Качандыр бир убакта журналисттерге интервью берип, белгилүү адам болом» деп кыялданчу белең?
– Саламатчылык! Бала кезде миң түрлүү кыялдар болот эмеспи. Белгилүү адам болом деп деле ойлогон эмесмин. Жашоодо атымды чыгарып, эл көзүндө болууга умтулбайм. Бейтааныш аялды куткарып калганымды эрдик же баатырдык деп эсептебейм. Бул адамдык милдет деп билем. Бир заматта эле белгилүү болуп кеткенге көнө албай жатам. Бир гана Кыргызстанга эмес, Орусияга таанылганыма кубанычтамын.
– Орус телеканалдары сени байма-бай көрсөтүп жатты. Кыргызстанга келгенден кийин дагы бир программага тартылуу үчүн Москвага кайра барып келипсиң...
– Кыргызстанга келгениме эки күн өтпөй «Звезда» телеканалынын «Поступок» аттуу берүүсүнө катышып берүү үчүн чакыруу алдым. Компания жол акысын төлөп беребиз дешкенинен бир күндө барып тартылып келдим.
– Дарегиңе жылуу пикирлер айтылып, ата-энең да уулу менен сыймыктанып жатса керек?
– Мен тааныган, тааныбаган кишилердин чын дилинен айткан каалоо-тилектери, аталардын-апалардын баталары, албетте, жүрөктү жылытат. Социалдык тармактардан келген каттардын аягы суюла элек. Бул окуяга чейин Фейсбукта 100 досум болсо, бир айга жетпей 1500дөн ашып кетти.
– Кыргызда эл назарына түшкөндө кан чыгарып, түлөө өткөрүп, бата алчу эле...
– Ооба, биз дагы ал жөрөлгөнү аткардык. Үйдөгүлөр көпчүлүктүн көңүлүнө түштүң дешип, 150 адамды чакырып түлөө өткөрдүк, бата алдык.
– Жубайың Орусиядан депортация болуп келип, бул маселени элчилик көзөмөлгө алган экен. Чечип бердиби?
– Ал үчүн Кыргызстандын Орусиядагы элчилигине арыз жөнөтүш керек дешти. Бирок биз арыз жибере элекпиз. Учуру келсе бул көйгөйдү бүтүрүп алууга аракет кылабыз.
– «Тамашоу» долбоорунда калыс болдуң. Сен тууралуу даярдалган видеону көрсөткөндө жубайың жашып кетти...
– Видеону көрүп залдагы элдин баары туруп кол чапкан учурдагы толкундоону, кубанычты сөз менен жеткире албайм.
– Алдыда кандай пландарың бар?
– 9-мартта Москвага келдим. Азырынча мурунку эле жумушумда иштеп жатам. Өзгөчө деле пландарым жок.
– Жакындарың «Кыргызстанда эле иштей бер» дешсе керек?
– Туугандарым Кыргызстанда эле иштей бер дешкен, бирок азырынча Орусияда иштөөнү туура көрдүм. Ал жакта фирмалардын биринде курьер болуп иштейм. Сааты чыкса Кыргызстанга барып жумушумду баштайм деген ниетим бар.
– Марат Исаев кандай үй-бүлөдө өскөн?
– Карапайым үй-бүлөдө эле чоңойгом. Ата-энем мугалим. Беш бир туугандын улуусумун. Жубайым, 4 жаштагы кызым бар.
– Максаттарың орундалып, иштериңди ийгилик ыроолосун!
"Бизди тарбиялап өстүргөн ата-энеме алкыш айтам".
Орус ажосу мекендешибизге өз колу менен медаль такты.
АЙТТЫ ДА КОЙДУ
МУРАТ ЖАЛИЕВ:
«МЕН "ТАМАШОУ" ДОЛБООРУНА КАЛЫС БОЛУШ ҮЧҮН 6 ЖЫЛ ОШ-БИШКЕККЕ КАТТАДЫМ. СЕН ПОЕЗДДИН АЛДЫНА ШАП ЖАТЫП, ШАП ТУРА КАЛЫП КАЛЫС БОЛУП КАЛДЫҢ».
4-мартта "Тамашоунун" "Ак калпак" кубогу үчүн болгон таймашта Мураттын аткарган тамашасынан алынды.
Султан Төрөбеков
koom@super.kg
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (36)
Аллахым берем десе берип коет ме деп эле ким ойлоду дейсинер ушундай атактуу болорун.азамат Марат.
Мурат экоо классташ. Мурат ал созду тамашалап эле айткан,жазылып эле турат го тамашоудон алынган тамаша деп. Дагы сонун тамашаларды айткан)))
luna28,видеосун каяктан корсо болот... Рахмат
edelveis0088,видеосун билбейт экенмин. Тамашоуго барган болчубуз...
кандай гана бактылуу жана баатыр адам... мындай эрдик ар бир эле адамдын колунан келе бербейт
бешенесине жазган экен жакшылыкты, чын эле копчулукко (кыргыз мигранттарына айрыкча)дем-куч болот копко)))
Бийкеч айым оюңуз чаржайыт болуп эле жазып коюпсузго?
Андай эле көрбөгөн "Звезда" каналына кое койсом Марат акени көрсөтүп атыптыр, пультту кармаган боюнча көзүм жашылданып бүткүчө бир сүйүнөм...
Ошондон бери ал каналды жакшы көрүп калдым... :) :) :)
jemile, сиз оюнузду бир жерге коюп окусаныз жакшы тушунмоксуз да)))
Сага окшогон адамдар кобойо берсин ийгилик.
Ийгилик кыргыздын чыныгы мырзасы.
Аллах ыраазы болсун.Иштериңизге ийгиликтер.
Мараттын ата-энесинен Аллахым ыраазы болсун! Анын эр журок жардамы- бул жигит учун эле эмес,баарыбызга ар-намысыбыздын бир тепкичке жогорулашына себеп болгондой сезилди. Ушундай сыймыктана турган кыз-жигиттерибиздин саны коп болсун.
Азамат мырза экен. Абдан жонокой,маегине ичим жылып калды. Эн негизгиси аман болсун!
Ха ха )))) шап тура калып шап жата калып эзиптирго ))) албетте бул тамаша.
Азамат ушундай мырзалар коп болсо патриоттор ушудан улгу алышса.
