ОРУСИЯДАГЫ УЧАК КЫРСЫГЫНДА КЫРГЫЗ КЫЗЫ КАЗА БОЛДУ

19-март күнү Дубай-Ростов-на-Дону багытында сапарга чыккан «FlyDubai» авиакомпаниясынын учагы кырсыкка кабылып, анда болгон 55 жүргүнчү, 7 экипаж мүчөсү, жалпысынан 62 адам көз жумду. Каза болгондордун арасында мекендешибиз Жылдыз Насирдинова да бар.

АБА ЫРАЙЫНЫН КАТААЛДЫГЫБЫ ЖЕ УЧКУЧТУН КАТАСЫБЫ?
Маалым болгондой, 19-мартта Орусиянын Ростов-на-Дону шаарында жамгыр жаап, секундасына 22 метрге жеткен катуу шамал жүрүп турган. «FlyDubai» авиакомпаниясынын Дубайдан учуп келе жаткан Boeing 737-800 учагы аба майданына Москва сааты менен алганда 1:40та конмок. Биринчи ирет конууга аракет кылып, бирок жерге жакындай бергенде кайрадан аба жарып өйдөгө учуп чыккан. Кыязы, бул учурда Кипрдин жараны болгон учкуч Аристос Сократус учакты туура кондурарына ишенген эмес. Аба майданынын үстүндө учак дагы эки сааттай айланып, анан кайрадан конууга бел байлаган. Анын «кайрадан конгону жатам» деген сөздөрү диспетчерлерге угулуп турган. Бирок бул жолу учак аэропорттун учуп-конуучу жолунан 50-100 метр алыс жерге кулап, заматта күйүп кеткен. Интернет булактарына жарыяланган видеотасмаларда да учак дароо күйүп кеткени даана көрүнөт.
Орусиялык Эмгек сиңирген учкуч Вадим Базыкин: «Эки саат аба майданды айланып учуп жүрө берүү келесоолукка жакын»,- деген оюн билдирди. Анын айтымында, аба ырайы катаал болуп, коно албай калган учурда жакынкы башка аэропортко конуу керек болчу. Бирок бул 55 жүргүнчү жана 7 экипаж мүчөсү каза тапкан кырсыктан кийин, өтө эле кеч айтылган сөздөр.
Азыркы тапта кырсыктын чоо-жайы иликтенип жатат. Учактын кулашына катаал аба ырайы, учкучтун катачылыгы же техниканын жарактан чыгуусу мүмкүн экендиги айтылууда.


КАЗА БОЛГОНДОР КИМДЕР?
Жүргүнчүлөрдүн көбү эс алуудан кайтып келе жаткан адамдар болчу. Учактын капитаны Аристос Сократус жакында гана үйлөнгөнү жана келинчеги наристе күтүп жатканы белгилүү болду. Маалыматтарга караганда, Аристос ушул рейсинен кийин арыз жазып жумуштан кетмек.
Экипаж мүчөлөрүнөн Максим Аудрюс Орусиянын, Круз Алехандро Алава, Каро Жавьер Алехандро Курбело Испаниянын, Алекс Доминик Йорам Конфаит Сейшел аралдарынын, Лаура Патриция Делакрус Колумбиянын жана стюардесса Жылдыз Насирдинова Кыргызстандын жараны болгон.

Маркумдун эжеси: «ЖЫЛДЫЗ МЕНЕН СЫЙМЫКТАНЧУБУЗ»
Мекендешибиз Жылдыз Насирдинова 1988-жылы Нарын шаарында туулган. 5 бир туугандын кенжеси болчу. Нарындагы №2-Чкалов орто мектебин артыкчылык менен бүтүргөн Жылдыз Бишкек гуманитардык университетин 2012-жылы аяктаган. Жылдыздын бир тууган эжеси Назира Насирдинова төмөнкүлөрдү билдирди:
– Жылдыз 5 жылдан ашык убактан бери Дубайда иштеп жүргөн. Жылына 2-3 жолу Нарынга келип-кетип турчу. Ушул жылдын февраль айында эле келип, бизди кубантып бир топ жүрүп кеткен. Чет жакта жүргөндө дайыма интернет аркылуу байланышып турчубуз. 28 жашында минтип кырсыкка кабылып отурат. Жапжаш эле, үй-бүлө кура элек болчу. Мектеп жашынан эле активдүү болуп көп ийгиликтерге жетишти. Кийин БГУнун эл аралык экономика факультетин бүтүрдү. Баарыбыз Жылдыз менен сыймыктанчубуз. Өзүнө да жумушу жагарын айтып жүргөн.
Байкелерим кырсык болгон жерге кетишти. Качан кайтып келишери азырынча белгисиз. Байланышып жатабыз, азыр эксперттер иш алып барып жатышканын айтышты.

Агасы КУМАРБЕК НАСИРДИНОВ:
– Жылдыз жаштайынан зирек болуп, сабактарын жакшы окуду. 4-5 тилде эркин сүйлөгөн, максатына жете билген мыкты адам эле. Азыр айла жок, ыйлап-сыктап жоктоп отурабыз.

ОРУСИЯЛЫК БАСЫЛМАЛАР НАСИРДИНОВА КЫЗМАТ КЫЛГАН УЧАККА РАКЕТА АТЫЛГАНДЫГЫН ЖАЗЫШТЫ
Орусиялык ria.ru агенттиги Жылдыз Насирдинова кызмат өтөгөн учак ушул жылдын башында Дубайдан Сауд Арабиясына учуп бара жатып аз жерден кырсыкка кабылып кала жаздаганын жазып чыкты. Агенттиктин маалымдашынча, учак Йемендин үстүнөн өтмөк. Йеменде көтөрүлүшчүлөр менен президент Абд-Раббу Мансур Хадинин күчтөрүнүн ортосунда уруш жүрүп жаткан. Капысынан Жылдыз Насирдинова кызмат кылган учакка жерден эки ракета коё берилген. Ракеталар учакка тийбей, жүргүнчүлөр, экипаж мүчөлөрү аман калышкан. Агенттик «Ошондо стюардесса кыргыз кызы тагдыр ага биринчи жана акыркы жолу эскертүү бергенин сезди бекен?..» деп жазат.
«FlyDubai» компаниясы 2009-жылы Дубай өкмөтү тарабынан негизделген. Ростов-на-Дону шаарында учактын кыйрашы компаниянын тарыхындагы биринчи авиакырсык. Бул авиакомпания Кыргызстанда 2012-жылдын февраль айынан тарта иш алып барып келет. Учурда жарандардын көбү аталган авиакомпаниянын кызматынан колдонуудан чочулап турушат.
Компания Жылдыз Насирдинованын туугандарына компенсация катары 20 миң доллар төлөп берет. Мындай маалымат компаниянын сайтында жайгаштырылды. Жылдыз аталган компанияда 5 жылдан ашуун администратор болуп иштеп, бир нече ай мурун стюардессалык жумушка которулган.

Мирлан Өмүралиев
koom@super.kg