ТАТУИРОВКАСЫ ЖОК РЭП ЫРЧЫСЫ МОТ
Адатта рэп ырчысы десе чолок шым, майка, кепка кийген, чынжырларды моюнуна илип, денесине татуировка тартылган көчө баласын элестетебиз. Каарманыбыз Мот жогоруда биз сүрөттөп жаткан рэп ырчыларына такыр окшошпойт. Ал жаз музыкасын сүйгөн, бекем тартипте өсүп, мектепти алтын медаль менен аяктаган. Анан да денесине татуировка чегүүгө олуттуу себеп керек деп эсептейт. Айдоочулук күбөлүгү жок, метродо жүргөн жөнөкөй Мот көпчүлүк ырларын учакта баратканда жазат.
Толук аты-жөнү – Мельников Матвей Александрович
Сахнадагы псевдоними – Мот
Туулган жылы, күнү – 1990-жыл, 2-март
Туулган жери – Орусиянын Краснодар крайы, Крымск шаары
Чыгармачылыктагы багыты – Ырчы, рэп аткаруучу
Бою – 165 сантиметр
Салмагы – 72 килограмм
Популярдуу ырлары – «Капкан», «Бүтүндөй баары» («Абсолютно всё»), «Апа, мен Дубайдамын» («Мама, я в Дубае») жана башкалар.
Учурда – Тиматинин «Black Star Inc» продюсердик борборунун мүчөсү
БИЙДЕН РЭПКЕ КАРАЙ...
Жакында эле Бишкекке келип, түнкү клубдардын биринин ачылышында ырдап кеткен Моттун балалыгы Краснодар шаарында өткөн. Бала кезинен ырчыны ата-энеси билимге умтулууга, бекем тартипке көндүргөндөн сырткары өзүн чыгармачылыкта да сынап көрсүн деп 5 жашында бий ийримине беришет. Мектепте жакшы окугандан тышкары Мот элдик бий, латын-америка бийлерин үйрөнүп, 10 жашында хореограф Алла Духованын «Тодес» бий коллективине алынат. Аталган коллективде 5 жыл бийлегенден кийин хип-хоп бийине өтүп, бул бий түрү боюнча түрдүү эл аралык сынактарга катышып, ысымы тар чөйрөдө белгилүү боло баштайт. Аны менен катар ыр жаздырып, аны интернетке жүктөп жүрчү. Мот бул тууралуу «рэп ырчысы болуп каларым оюма келген эмес, мен үчүн рэп жөн гана хобби эле» деп айткан. Мектепти аяктаган соң Москва мамлекеттик университетинин экономист-менеджерлик адистиги боюнча билим алат.
ОКУУСУ МЕНЕН ЧЫГАРМАЧЫЛЫКТЫ ЧОГУУ АЛЫП КЕТКЕН
Мот 19 жашында «Битва за респект» деп аталган таланттар сынагында өнөрүн татыктуу көрсөтүп, көзгө көрүнө баштайт. Дал ушул убакта ырчы кесиптештеринин кеңеши менен Мот деген псевдонимди алат (Мот – өз аты Матвейдин кыскартылып айтылышы). Ал эми Тиматинин «Black Star» продюсердик борборуна кантип келип калгандыгы тууралуу мындай дейт: «Бир күнү таң атпай «Black Star» борборунан чалып «сиз менен чогуу иштешели дегенбиз» деп кайрылышты. Ал убакта экономист-менеджерлик адистигинде аспирантурада окуп, аны менен бирге маркетолог болуп иштечүмүн. Ойлондум да «Black Star» берген мүмкүнчүлүктү колдонууну чечтим. Бирок окуумду таштаган жокмун, анткени окуу менен чыгармачылыкты чогуу алып кетким келди».
СҮЙҮҮДӨ ТУРУКТУУ
Туура жүрүм-туруму менен көпчүлүк рэп ырчыларынан өзгөчөлөнгөн Мот сүйүүдө туруктуу. Кыялкеч жигит бала кезинде «Spice Girls» тобунун ырчысы Эмма Бантонго үйлөнгүсү келчү. Учурда Моттун жүрөгү бош эмес, 2 жылдан бери Мария деген бийкеч менен сүйлөшөт. Массалык маалымат каражаттарында, интернетте Мот тууралуу жагымсыз маалыматты дээрлик таппайсың. Орусиянын болочоктогу рэп ырчыларын Моттун жүзүндө көрөбүз дегендер көп. Бул жөнүндө ырчы: «Менин өмүр таржымалым таза, жаман эч нерсе таба албайсың. Бир жолу буга ишенбей өзүм жөнүндө жазылган комментарийлердин баарын окуп чыктым. Негативдүү пикирлерди тапса болот экен, айрымдарга жөн эле жакпасам, кээ бирлер өтө жупуну, жөнөкөй деп жазышыптыр. Биздин коом рэп ырчысы десе эле тентек бирөөнү элестетишет. Кээде «бул сенин сахнадагы образың, жашоодо андай эмессиң» деп жазгандар болот. Мен образ эмесмин, адаммын. Мыкты тарбия бергени үчүн ата-энеме рахмат»,- дейт.
«Тимати көптөгөн орус рэп ырчыларын таптап жүрөт, арасында мен бар экениме сыймыктанам».
«Сүйүктүүм чыдамкай, менин гастролдорума, күйөрман кыздар менен түшкөн сүрөттөрүмө көз жумуп келет».
Лунара Бекиева
star@super.kg
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (15)
Ырлары менен ооруп журом. Чынында эле башка реп ырчыларынан озгочолонуп турат.
aytkulova, Айыгып кетиниз )))
Бир жылдары камеди клабдын резиденттери Тиматини Black starда Тимати эле бар калганын билбейбиз деп аябай шылдындашчу ошондон кийин Тима озуно келдиби же намыстандыбы айтор Егор Крид, Мот, Джиган,L'One,Natan,MC DONI,DJ Dlee,Ратмир Шишков ондуу реп ырчыларын тарбиялады.Азыр Орусиянын алдынкы реп ырчыларын Тимати тарбиялайт. Ал эми Мот озу ырчы катары эмес жонокой инсандык сапаттары аябай жакты.Жашасын жонокой реп ырчылары...!
bela77,Сиз адашып калдыныз Ратмир Шишковду тимати тарбиялаган емес ал тимати доменик. джокер жана шишков учоосу фабрика звезддон чыгышкан тилекке каршы шишков автокырсыкка Учурап калган болбосо ал тиматиден ашса ашмак бирок калбайт болчу
бул ырчы сон кол ресторанындагы клубдун ачылышына келди окшойт э
Ээ ырларды сонун ырдайт. Менда угам ырын. ийгилик
Мен Моттун ырларын звонокко койуп журом дайыма)
Eminem жонундо да маалымат жазсанар болобу?
Diana92kg, саламатсызбы? Сунушуңузга рахмат, тиешелүү бөлүмгө жеткирилди.
Рэп коп уга бербейм.Жарым жыл мурун Виа Гра менен Кислород ырын угуп,жаккан эле.Абсолютно все дегени да жакты.
Колунда татуировка бар екен,же менин козумо корунуп жатабы
nursultan.91, ээ ал как бы жун да хехе
Кристина Si жонундо жазгылачы
Il9s, саламатсызбы? Сунушуңузга рахмат, тиешелүү бөлүмгө жеткирилди.
